YESUUSI koye Ejedhete ilaalira no. Ledosi noori shoolu mannooti hawaariyaatesiiti. Insano roduuwu Indiriyaasinna Pheexiroosi, hattono roduuwu Yaaqoobinna Yohaannisiiti. Kuuˈˈu xeertote leellannohu Yerusaalamete nooho Maganu mineeti.

Yesuusi harrichchote darmichcho gulufe Yerusaalame haˈrinku lamu barri saino. Hakko barri Maakisanynyote. Konne barra soodo Yesuusi Maganu minira mare no. Hakko heeˈreenna kakkalaano amadde shitasira hasidhu. Ikkollana Yesuusa mannu baxannosi daafira shaa waajjitu.

Yesuusi tenne ammaˈnote cimeeyye, ‘Kiˈne hamasunna buutete ooso!’ yiinsa. Hakkiinnino assitino bunshe baalate Maganu qorichchishannonsata kulinsa. Hakkunni gedensaanni Yesuusi Ejedhete ilaala giddi; hakkiinnino kuri shoolu hawaariyaatesi xaˈmo xaˈmitusi. Hawaariyaatesi marichcho xaˈmitinosiro afootto?

Xaˈmitinosihu konni albira ikkannoreeti. Hawaariyaatesi Yesuusi uullate aana noo bunshe baala hoolannota affino. Ikkollana mamaro hoolannoro afa hasidhino. Yesuusi nugusa ikke gashshate galagale daannohu mamarooti?

Yesuusi galagale daanno wote uulla noo rosaanosi laˈasira dandiitannokkita afino. Korkaatuno isi iima heeˈranno daafira dileellannonsa. Konni daafira Yesuusi iima nugusa ikke gashshanno yannara uullate aana ikkannore mito mito coye hawaariyaatesira kulinsa. Kulinonsari giddo gamu maati?

Yesuusi goofate oli ikkannota, lowo manni xiwamannotanna hudirannota coyiˈrino; hattono bunshe batidhannotanna, uulla lowo geeshsha huxidhannota kulino. Qoleno Yesuusi, Maganu mangistehu danchu duduwi gobba baalate duduwamannota coyˈrino. Yannankera kuni coyi ikkanna laˈnoommo? Ee laˈnoommo! Konni daafira Yesuusi xa iima heeˈre gashshanni noota dihuluullammeemmo. Isi muli yanna giddo uullate aana noo bunshe baala hoolanno.