MITTO barra Yesuusi mittu manchira jaalasi baxa hasiissannosita kulisi. Manchuno Yesuusa, ‘Jaaliˈya ayeeti?’ yee xaˈmi. Yesuusi kuni manchi ma hedinoro afino. Kuni manchi, ‘Ane jaali sirchoˈya ikkinohonna ammanaˈya harunsanno mannaati’ yee hedino. Yesuusi iso mayinoro hanni laˈno.

Yesuusi mito wote xagge coyiˈre rosiisanno. Konne manchono hatto asse rosiisaraati. Yesuusi mittu Yihudu manchinna Samaariyu manchi xagge coyiˈri. Lowohu Yihudu manni Samaariyu manna baxannokkita albaanni ronsoommo. Yesuusi coyiˈrino xagge konni woroonni noote.

Mitto barra Yihudu manchi ilaalaame doogo tayise Iyyaarko haˈranni no. Ikkollana mulqidhannori qalxite amaddusi. Woxesi mulqidhe isono gante heeshshotenna reyote mereero tugge hadhu.

Kuni coyi ikki gedensaanni mittu Maganu mini kakkalaanchi hatte doogo dayi. Isi ganneenna doogote uwino mancho lai. Kuni kakkalaanchi marichcho assannoha lawannohe? Konne mancho afiti wirri yee wole doogo hige haˈri. Hakkiinnino Magano lowo geeshsha ammaˈnino yinoonnihu wolu manchi hakkaa hige dayi. Isi Leewaawichchaho. Isina gannoonni mancho kaaˈlara uurriyya? Deeˈni, diuurrino. Kuueeti kakkalaanchunna Leewaawichchu doogote faffe hadhanna lai.

Ikkollana gannoonni manchi ledo noohu ayeetiro lai. Isi Samaariyu manchooti. Yihudu mancho kaaˈlanni no. Madasira xagichcho gananni no. Hakkunni gedensaanni konne Yihudu mancho fooliishshirannowanna woyyaawannowa massisi.

Yesuusi tenne xagge gudihu gedensaanni xaˈmo xaˈmisi mancho togo yii: ‘Kuri sasunku mannooti giddo ganamino manchi jaali hiikkonneeti? Kakkalaanchohonso, Leewaawichchahonso Samaariyu manchooti?’

Manchuno togo yee qoli: ‘Samaariyu manchooti. Kuni manchi ganamino manchira danchare assino.’

Yesuusi qole togo yii: ‘Halaale yootto. Atino hadhe wolootaho hatto assi.’

Yesuusi rosiisino gari didanchaho? Yesuusi Qullaawu Maxaafi giddo yiinore macciishshineemmoha ikkiro lowore danchare ronseemmo; dihattooti?