YESUUSI haˈranni doogote Samaariyaho wayi bale mule fooliishshiri. Rosaanosi sagale hirtara katama hadhe no. Tini Yesuusi coyishiishanni noo mancho waa dirridhara dagginote. Isino, ‘Waa hayikkisie’ yiise.

Hatto yaasi manchote lowo geeshsha xagge ikkituse. Xagge ikkinosehu mayiraatiro afootto? Korkaatuno Yesuusi Yihudootu wido ikkinohuraatinna, ise kayinni Samaariyu manni wido ikkitinohuraati. Rooriidihu Yihudu manni Samaariyu manna dibaxanno. Insa coyishiisha nafa dicoyishiishanno! Yesuusi kayinni duuchchanka manna baxanno. Konni daafira togo yiise: ‘Waa hayikkisie yiinohehu ayeetiro afoottaro, atinni xaˈmidheenna isi heeshshote waa aannohenka.’

Mancho qolte togo yitu: ‘Mootichcha, bale diimete; qoleno atera waa dirrirattori dinohe. Ikkina konne heeshshote waa hiikko afiˈratto?’

Yesuusi togo yee xawise kulise: ‘Tenne bale waa agittaro, galagalte gooratta. Ani eemmo wayi kayinni manna hegerera woranno.’

Mancho qolte, ‘Mootichchaˈya, horonta gooreemmakki gedenna waano dirrirate layinkita dayeemmakki gede konne waa uyie!’ yitusi.

Manchote Yesuusi addu wayire coyiˈranni nooha lawinose. Isi kayinni coyiˈranni noohu Maganunna mangistesi halaalireeti. Kuni halaali heeshsho aano wayi gedeeho. Kuni halaali mannaho hegere heeshsho aannoho.

Yesuusi manchote togo yiise: ‘Hadhe minaannakki woshshite higi.’

Manchono, ‘Minaanni dinoe’ yite qoltu.

Yesuusino, ‘Halaale yootta; konni albaanni ontu minaanni noohe, xa ate ledo heeˈranni noohuno minaannakki diˈˈikkino’ yiise.

Yesuusi yiinori baalu adda ikkino daafira, mancho lowo geeshsha maalaˈlitu. Yesuusi konne coye hiitto ikke afi? Yesuusi, Maganu soyeemmo yee qaale einoha ikkinohuranna Maganu tenne balaxe kulinosihuraati. Hakka wote Yesuusi rosaano hadhinowiinni higgu. Samaariyu mancho ledo hasaawannota laˈuti xagge assidhu.

Tenne xaggenni marichcho ronseemmo? Yesuusi baalanta gaˈre baxannota leellishshannonke. Ninkeno hatto assa hasiissannonke. Mannu ninkewiinni gaˈre baxxinohura calla giwa dihasiissannonke. Yesuusi mannu baalu halaale afe hegere heeshsho heeˈrara hasiˈranno. Ninkeno mannu halaale afanno gede kaaˈla hasiissannonke.