YESUUSI lame balloota huucciˈraano hursihunni shiima yanna gedensaanni, Yerusaalamete mule noo qachcha dayi. Lame rosaanosi togo yii: ‘Qachchaho giddooggine martine harrichchote ilmattichcho usurante noota affinannina tirtine abbeˈˈe.’

Insano harrichchote ilmattichcho abbitusita Yesuusi gulufi. Hakkiinnino mule noo katama Yerusaalame haˈri. Katama shiqqi yiita lowo manni isiwa dayi. Dayinohu rooru manni uddirino uddano fushshe doogote kari. Wolootu kayinni saatte hiiqqaqqite abbitu. Abbitino saatte doogote karte qoonqonsa gotti assite togo yitu: ‘Yihowa suˈminni daanno nugusi maassaminoho!’

Seeda yanna albaanni haaruuddu Isiraeelete nugussa mannaho leellate harrichchote ilmattichcho guluffe Yerusaalame dagganno. Yesuusino xa hatto assanni no. Kuri mannooti Yesuusi nugusansa ikkara hasidhinota leellishshanni no. Ikkollana nugusa ikkannota baxinohu baalanka manna diˈˈikkino. Yesuusi Maganu minira mari yannara ikkinorinni tenne afa dandiineemmo.

Maganu mine Yesuusi ballootanna naafoota hursi. Tenne ikkito qaaqquullu laˈuti, qoonqonsa gotti assite Yesuusa galattu. Ikkollana kuni coyi kakkalaano hanqiseenna Yesuusa, ‘Qaaqquullu yitannoreno macciishshattoni?’ yitu.

Yesuusino togo yee qoli: ‘Ee macciishsheemmo. ‘Qaaqquullu afiinni Maganu galata qixxeessanno’ yaannoha Qullaawu Maxaafi giddo dinabbabbinoonni?’ Konni daafira qaaqquullu Maganu doorino nugusa galatansa suffu.

Ninkeno kuri qaaqquulli gede assa hasiˈneemmo; dihattooti? Mitu mitu manni Maganu mangistere mannaho kulleemmokki gede assara woˈnaalanno. Ikkollana ninke kayinni Yesuusi mannaho assannore xaggete coye wolootaho kula diagurreemmo.

Yesuusi uulla noo yannara nugusa ikkanno yanna diˈˈiillitino. Tini yanna daggannohu mamooteetiyya? Yesuusi rosaano tenne yanna affara hasidhino. Aanchine tenne hajore ronseemmo.