MANCHOHO umu taalo dagganni noo lemboolcho lai. Hakku manchi Yesuusaati. Xa isira 30 diro ikkinosi. Ledosi noohu kayinni Yohaannisiiti. Albaanni Yohaannisire ronsoommo. Maariyaami fiixase Elsaabeexi laˈara hadhu wote Elsaabeexi godowi giddo noo qaaqqi hagiidhe kubbinota qaagatto? Hakka wote godowise giddo noo qaaqqi Yohaannisiiti. Yohaannisinna Yesuusi xa ma assitanni no?

Yohaannisi Yesuusa Yordaanoosi Lagira waaho lixise fushshe kaino. Manna cuuˈnannihu hatto assineeti. Balanxe wayi giddora lixinsanni; hakkiinnino wayi giddonni fushshinanni. Yohaannisi manna cuuanno daafira, iso Cuuaancho Yohaannisi yinanni. Ikkina Yohaannisi Yesuusa cuuinohu mayiraati?

Yohaannisi tenne assinohu, Yesuusi isiwa mare cuuannosi gede xaˈmirino daafiraati. Yohaannisi assitino bunshera gaabbitino mannoota cuuino. Ikkina Yesuusi bunshe asse egenninoyya? Deeˈni, horonta diegennino; korkaatuno isi iiminni dayinoho Maganu Beettooti. Konni daafira Yesuusi Yohaannisi cuuannosi gede xaˈmirinohu wolu korkaatiraati. Hakku korkaati maatiro hanni laˈno.

Yesuusi Yohaannisiwa marara albaanni, haqqe boce soofannoho. Haqqe boce soofanno manchi haqqa soofe, xaraphpheessa, wombarenna barcima seekkanno. Maariyaami ayiddaanni Yooseefi haqqe boce soofannoho; isi Yesuusano konne looso loosanno gede rosiisinosi. Yihowa kayinni Beettosi uullara soyinohu haqqe boce soofara diˈˈikkino. Beettisi loosanno gede hasiˈrinohu mittu baxxino loosi no; hakkawote konne looso loosannoti yanna iillite no. Konni daafira Yesuusi Annisi baxannore assara dayinota leellishate, Yohaannisi cuuannosi gede xaˈmiri. Maganu tennenni hagiidhinokka?

Ee hagiidhino; korkaatuno Yesuusi cuuame wayi giddonni fulita, iiminni togo yitanno huuro daggino: ‘Isinni tashshi yaannoehu, Beettiˈya konneeti.’ Qoleno iimi faˈnameenna, tini lemboolcho Yesuusi aana dirritu. Ise lemboolcho labbolla ikkinnina addu lemboolcho diˈˈikkitino. Ise Maganunniho qullaawa ayyaanaati.

Xa Yesuusi heeshshi gotti asse hedannohu lowo coyi noosi daafira, mannu nookki base haˈre 40 barra keeshshi. Hakko heeˈreenna Sheexaanu isiwa mari. Sheexaanuno Yesuusi Maganu seeri gobbaanni ikkino coye assanno gede assate sase hige woˈnaali. Yesuusi kayinni togoo coye diassino.

Hakkunni gedensaanni, Yesuusi noowiinni hige shiimu manninni xaadi; hakku mannino Yesuusire umi harunsaano woyi rosaano ikki. Hakko manni giddo gamu suˈmi Indiriyaasi, Pheexiroosi (wolu suˈmisi Simooniiti), Filiphphoosinna Naatinaeeli (wolu suˈmisi Bertelemewoosiiti) yinannireeti. Yesuusinna kuri haaruuddu rosaano Galiilu awuraajja hadhu. Galiila martuti, Qaana yinanni katamira fooliishshidhu; Naatinaeeli ilaminohu hakko katamiraati. Hakkiichchono Yesuusi sargete minira haˈri; sargete mineno umi maalale assi. Mayi maalale assinoro afootto? Waa woyinete xajjera soorrino.