KUNI uulla uwe noohu ayeetiro afootto? Saawuliiti. Isi Isxifaanoosi kinnatenni gantu mannooti uduunne agariha ikkinota qaagatto? Konne waraˈa yiino xawaabba lai! Mayi ikkanni nookka?

Isxifaanoosi reyihu gedensaanni, Saawuli Yesuusi rosaano amade usurate qara ikki. Saawuli minunni mine eanni rosaano goshooshe fushshe, usuru minira eessanno. Duuchcha rosaano wole katamma xooqqe, martinowa mannaho “dancha duduwo” kultu. Saawuli kayinni insa hasanni wole katamma haˈri. Xa isi Demaasqote katama haˈranni no. Ikkollana haˈranni heeˈreenna, mittu xagge ikkanno coyi kalaqami.

Hedeweelcho iiminni xawaabbu bilicci yee, Saawuli doyissi. Misilete aana laˈneemmonte gede, isi uulla uwi. Hakkiinnino mitte huuro, ‘Saawuli, Saawuli! Mayira qarrisattoe?’ yitusi. Saawuli ledo noori xawaabba laˈino; qolteno huuro macciishshitino. Kayinni mayinanni heeˈnoonniro diaffino.

Saawulino, ‘Mootichcha ati ayeeti?’ yee xaˈmi.

Huuro qolte, ‘Ani ati qarrissanni noottoeho Yesuusaati’ yitu. Yesuusi hatto yiinohu mayiraati? Saawuli Yesuusi rosaano qarrisanno wote, Yesuusi iso umosi qarrinsoonnihu gede ikke macciishshamannosi daafiraati.

Saawuli qole, ‘Mootichcha xa ma assoyya?’ yee xaˈmi.

Yesuusi togo yiisi: ‘Gotti yite Demaasqo haˈri. Assa hasiissannohere hakkiichcho kullannihena.’ Saawuli gotti yee illesi faˈnita, ille mittoreno laˈˈa gibbu. Isi ballichcha ikki! Konni daafira ledosi noo manni angasi amade massaganni Demaasqo massisi.

Hakkawote Yesuusi Demaasqote nooha mitto rosaanchosi togo yii: ‘Hanaaniya kai, Suwashshote yinanni doogo higge haˈri. Yihuda mine marte, Saawuli yinanni manchi nooro xaˈmi. Iso baxxino soqqamaanchoˈya ikkara doodhoommona.’

Hanaaniya yinoonnisita hajajame haˈri. Saawulinni xaaditi, angasi isi aana wore togo yiisi: ‘Mootichchu illekki galagalte laˈanno gedenna qullaawu ayyaaninni woˈmatto gede soyinoe.’ Hakkawotenni Saawuli ille aaninni omolcho lawannori uwi; illesino galagalte laˈu.

Saawuli duuchcha gobbara heeˈranno mannira dancha duduwo lowo geeshsha farciˈrino. Qoleno isi hawaariya Phaawuloosi yinanniha ikkino; isire roorsine albaange ronseemmo. Balanxe kayinni, Maganu Pheexiroosi ma assara soyinosiro hanni laˈno.