KUNI guluphphe noo manchi Isxifaanoosiiti. Isi ammanaminoho Yesuusi rosaanchooti. Kuneeti iso assinanni heeˈnoonnire lai! Kuni mannooti iso jajjabba kinnanni gantanni no. Insa Isxifaanoosi mayira gibbeetikka togo kinnatenni gantanni noohu? Hanni laˈno.

Maganu, Isxifaanoosi hagiirsiissanno maalale assanno gede kaaˈlinosi. Kuri mannooti kayinni tenne dibaxxino; konni daafira mannaho halaale rosiisinohura isi ledo heewisantu. Ikkollana Maganu Isxifaanoosira lowo hayyo uyinosi daafira, kuri mannooti kaphpho rosiissanni keeshshitinota kuli. Insano tenne macciishshite wonanni roore hanqitu. Hakkiinnino amaddusi gedensaanni, isi aana kaphpho farciˈranno manna gamba assitu.

Kakkalaanote biili Isxifaanoosi, ‘Kuni yiniri halaaleho?’ yee xaˈmisi. Isxifaanoosino Qullaawu Maxaafinni qaale dancha gede asse kule, tenne xaˈmora dawaro qoli. Hakkunni gedensaanni, bushu manni konni albaanni Yihowa masaalaano giwino gara kulinsa. Qoleno togo yiinsa: ‘Kiˈne hakko manni gedeereeti. Maganu soqqamaancho Yesuusa shitinoonni; Maganu higgeno diayirrissinoonni.’

Hatto yiita ammaˈnote cimeeyye lowo geeshsha hanqitu! Hanqite suumensa gaˈmidhu. Isxifaanoosi kayinni iima hige lae togo yii: ‘Kuneeti Yesuusi iima annisira qiniiteenni ofolle nooha laummo!’ Hakkiinnino kuri mannooti angansanni macca cuˈmidhe Isxifaanoosiwa higge doddu. Amaddusihu gedensaanni goshooshshanni katamu gobbaanni fushshitusi.

Iimaanni uddidhino uddano fushshite, Saawuli yinanni wedellichchiwa wodhitu. Kuneeti Saawuli laitto? Hakkiinnino gamu mannooti Isxifaanoosi kinnatenni gantu. Misilete aana laˈˈattonte gede, Isxifaanoosi guluphphe togo yee Magano huucciˈri: ‘Yihowa, tenne bunshensara qorichchishshootinsa.’ Isxifaanoosi gama manna ammaˈnote cimeeyye dogginonsata afino. Hakkunni gedensaanni Isxifaanoosi reyi.

Mittu manchi atera bunshe assihero, ati qolte isira bunshe assatto? Woyi Maganu qorichchishannosi gede huuccatto? Isxifaanoosinna Yesuusi hatto diassitino. Insa bunshe assinonsa mannira nafa danchuulleho. Ninkeno insa lawishsha harunsino.