BARRU lexxanni haˈri kiiro, Yesuusi rosaanosira duuchcha hige leelli. Mitte yannara 500 saˈanno rosaanora leellino. Insara leelli wote, marichcho kulinonsaro afootto? Maganu mangistere kulinonsa. Yihowa Yesuusa uullara soyinohu Mangistesire farciˈranno gedeeti. Yesuusi konne looso reyotenni kai gedensaanni nafa loosino.

Maganu mangiste maatiro qaagatto? Eewa, iima nooho umosi dandiino Maganu gashshooteeti. Maganu mangistesira nugusa asse doorinohu Yesuusaati. Albaanni ronsummonte gede, Yesuusi hudidhinore itise, xiwantinore hursenna reyitinore nafa kayise konni albira dancha nugusa ikkannota leellishino!

Yesuusi iima nugusa ikke kume diro moohanno wote, uullate aana mayi ikkanno? Woˈma uulla biifado gannate ikkitanno. Olu, jaddonna xibbu diheeˈranno; woluri gateenna reyo nafa diheedhanno. Kuni ikkannota anfoommo; korkaatuno Maganu uulla kalaqinohu mannu hagiidhanni heeˈranno gannate ikkitaraati. Hunda Edenete kaashshu base kalaqinohuno iseraati. Konni daafira Yesuusi baalanka coye Maganu ikkara hasiˈrino gede assanno.

Yesuusi iimira higanno yanna iillitu. Isi rosaanosira leellanni 40 barra keeshshino. Konni daafira rosaanosi isi reyotenni kainota dihuluullantino. Yesuusi rosaanosi agure iimira haˈrara albaanni togo yiinsa: ‘Qullaawa ayyaana adhitina geeshsha Yerusaalamete keeshshe.’ Qullaawu ayyaani Maganu loososi loosanno wolqaati; qoleno bubbissanno bubbe gedeeho. Kuni ayyaani Yesuusi rosaano Maganu fajjo assitanno gede kaaˈlannonsa. Gedensaannino Yesuusi togo yiinsa: ‘Uullate qacce geeshsha anere farcidhinanni.’

Yesuusi hatto yee kaihu gedensaanni, mittu xagge ikkannori kalaqami. Koye misilete aana laˈˈattonte gede, Yesuusi iima hige haˈri. Hakkiinnino gomichchu diwisita rosaanosi layinkita iso dilaˈino. Yesuusi iimira haˈre, uullate aana iso harunsitannore hakko heeˈre gashsha hanafi.