KOYE misilete aana mayi leellannohe? Eewa, waajjuulle farado gulufino wottaaddari no. Kayinnilla hiikkiinni daanni nooro huwati. Kuni faradi iiminni uullara hige gomichchu aana hadaraasanni no! Isi addinta iima faradu nooni?

Deeˈni, kuni addu farado diˈˈikkino. Togo yinoommohu faradu gomichchu aana dode afannokki daafiraati; dode afannoni? Qullaawu Maxaafi kayinni iima faradu noota kulanno. Mayira hatto yaannoro afootto?

Korkaatuno, mannu konni albaanni ola olamanno wote farado lowo geeshsha horonsiˈranno daafiraati. Konnira Qullaawu Maxaafi iiminni farado gulufe daanno wottaaddarire coyiˈrannohu, Maganu uullate aana noo manni ledo olamannota leellishateeti. Hakku oli ikkanno bayichcho mayinanniro afootto? Armageedooni yinanni. Kuni oli ikkannohu uullate aaninni bunshe baalanta hoolateeti.

Konne ola massagannohu Yesuusaati. Yihowa gashshootisira nugusa ikkara doorinohu Yesuusa ikkinota qaagi. Koye misilete aana Yesuusi umoho nugusu wodhanno zawude wodhinohu iseraati. Angasi noo bise kayinni, isi Maganu diinna baala shee gudannota leellishshanno. Maganu busha manna baala hunasi xagge ikkitankera hasiisanno?

Konni maxaafi giddo 10⁠^ki Xagge galagalte lai. Hakkiichcho mayi leellannohe? Eewa, busha manna gudihu baote wayi no. Hakko waa dirrisinohu ayeeti? Magano Yihowaati. Xaano galagalte 15⁠^ki Xagge lai. Hakko mayi ikkanni no? Yihowa soyino giira Soddoomanna Gomoora ittanni no.

Xa qolte 33⁠^ki Xagge faˈni. Gibitsete faradinna olu saragalli hiikkanni nooro lai. Wayi insa diwe beeshshanno gede assinohu ayeeti? Yihowaati. Isi tenne assinohu mannasi gatisaraati. Hanni 76⁠^ki Xagge lai. Hatte xaggera, Yihowa mannasi Isiraeele nafa bunshe assitino daafira baˈara agurinota huwatatto.

Konni daafira, Yihowa iimi wottaaddarasi soye uullate aaninni bunshe baala hunannoti xagge ikkitankera dihasiisanno. Uullate aaninni bunshe baala hunanno yaa mayyaatero hanni hedi! Aane noo qoola faˈniteenna hanni laˈno.