TENNE jajjabba haqqe, biifado daraaronna seeddaanna ilaalla lai. Tini dibiifado baseeti? Shiimu qaaqqi bullichchira itannore aannasi lai. Qoleno xawoho noore doobbiyonna farado lai. Ati togoo basera minnoonni minira heeˈra dibaxatto?

Maganu, ati uullate aana gannatete hegerera heeˈrattora hasiˈranno. Qoleno xa manna qarrisanno xiwaninna xisso iillitahera dihasiˈranno. Qullaawu Maxaafi konni kaˈa haaro gannatera heeˈranno mannira togo yee hexxo aanno: ‘Maganu insa ledo heeˈranno. Reyo woyi wiˈla woyi xibbu konni kaˈa diheeˈranno. Albi coyi sainona.’

Yesuusi tini hagiirsiissanno hexxo woˈmitanno gede assanno. Mamoote assannoro afootto? Togo assannohu uullate aaninni bunshe baalantanna busha manna baala huni gedensaanniiti. Yesuusi uulla noo waro, babbaxxino xiwani amadino manna hursinotanna, reyitinore nafa kayisinota qaagi. Tenne assinohu, Maganu mangistera Nugusa ikkanno wote uullate aana assannore leellishateeti.

Uullate aana haaro gannatera heeˈra mageeshsha hagiirsiissannoro hanni hedi! Yesuusi doodhino manni ledo iima heeˈre gashshanno. Kuri gashshaano uullate aana heeˈranno manna baala towaattanno; qolteno hagiidhanno gede assitanno. Maganu haaro gannatera hegere heeshsho aannonke gede maa assa hasiissannonkero hanni laˈno.