TINI qaaqqonna jaallase nabbabbanni noohu hiikko maxaafaatiro afootto? Qullaawu Maxaafi Xagge Roseemmo Maxaafaˈya yinanniha, konne ati nabbawatto maxaafa nabbabbanni no. Qolteno insa tenne ati nabbawattota, “Hegerera Heeˈra Dandiineemmo Gara” yitanno xagge nabbabbanni no.

Insa marichcho rossanni nooro afootto? Umo, hegerera heeˈrate Yihowarenna Beettisi Yesuusire afa hasiissannota rossanni no. Qullaawu Maxaafi togo yaanno: ‘Hegerera heeˈra dandiinannihu, mittu halaalaanchu Maganirenna isi uullara soyinohure Yesuusi Kiristoosire rosatenniiti.’

Maganu Yihowarenna Beettisi Yesuusire rosa dandiineemmohu hiittoonniiti? Umo assine, konne Qullaawu Maxaafi Xagge Roseemmo Maxaafaˈya yinanni maxaafa uminni kayinse qaccete geeshsha nabbawa hasiissannonke. Kuni maxaafi Yihowarenna Yesuusire lowore kulanno; dihattooti? Qoleno insa konni albaanni assitinorenna konni kaˈa assitannoha lowo coye kulanno. Ikkollana konne maxaafa nabbawa calla ikkikkinni wolurino assineemmori no.

Kuneeti uulla nooha wole maxaafa laitto? Kuni Qullaawa Maxaafaati. Qullaawu Maxaafi giddonni, konni maxaafi xagge noo bayichcho mannu nabbawannohe gede assiri. Qullaawu Maxaafi assa hasiissannonkere seekke kulannonke daafira, Yihowara garunni soqqamatenni hegere heeshsho afiˈra dandiineemmo. Konni daafira Qullaawa Maxaafa barru baala nabbawa hasiissannonke.

Ikkollana Maganu Yihowarenna Yesuusi Kiristoosire rosa calla diˈˈikkitanno. Insarenna rosiissino roso seekkine anfoommo daafira calla, hegere heeshsho afiˈneemmo yaa diˈˈikkino. Woluri hasiisannori maatiro afootto?

Ronsoommo rosi garinni heeˈra hasiissannonke. Asqorootu Yihuda qaagatto? Yihuda, Yesuusi hawaariyaatesi ikkitara doorino 12 manni mereero nooho. Yihuda Yihowarenna Yesuusire lowore afino. Ikkollana maa assinoro qaagatto? Shiima yanna gedensaanni isonooto baxannoha ikki; hakkiinnino Yesuusa 30 birrira diinnasira hiri. Konni daafira Yihuda hegere heeshsho diafiˈranno.

Xagge 69⁠te ronsummoha Giyaazi yinanni mancho qaagatto? Giyaazi isiha ikkinokki uduunnenna woxe adhara hasiˈrino. Konne uduunne adhara yee kaphphi. Konni daafira Yihowa qorichchishinosi. Ninkeno higgesi ayirrisa hoongummoro, Yihowa qorichchishannonke.

Ikkollana Yihowara ayeewoteno ammaname soqqaminohu lowo manni no. Ninke hakko manni gedeere ikka hasiˈneemmo; dihasiˈneemmo? Qaaqqu Saamueeli dancha lawishsha ikkannonke. Xagge 55⁠te ronsummonte gede, Saamueeli Yihowara xaadooshshu dunkaanisira soqqama hanafi wote shoole woyi onte dirolla ikkannosi. Konni daafira ayee geeshshano qaaqqo ikkittoro, Yihowara soqqamate diajatto.

Ikkollana ninke baalinke roorsine harunsa hasiˈneemmohu Yesuusi Kiristoosiiti. Xagge 87⁠te ronsummonte gede, Yesuusi shiimu heeˈrenni Maganu minira mare iimi Annisire wolootaho kulino. Ninkeno isi lawishsha harunsino. Baxillu Maganinke Yihowarenna Beettisi Yesuusi Kiristoosire, dandiinummo geeshsha manna baalaho kullo. Konne baala assineemmoha ikkiro, uullate aana Maganu abbanno haaro gannatera hegerera heeˈra dandiineemmo.