Yooseefinna Maariyaami, Yesuusi ledo Naazireetete katamira heeꞌrino; insara wolu labballunna seennu oosono noonsa. Yooseefi minisi mannira hasiisannore wonshate hanaatsicha ikke loosino; hattono Yihowa daafiranna Seerasi rosiisinonsa. Insa duucha woyite Magano magansidhara xaadu minira woy gambooshshe hadhanno; qoleno Faasiku ayyaana ayirrissara Yerusaalame hadhanno.

Yesuusi 12 dirihu heeꞌre minisi manni ledo Yerusaalame haꞌrino. Hatte yannara katamu giddo Faasiku ayyaana ayirrisara dayinohu lowo manni no. Gedensaanni, Yooseefinna Maariyaami katamunni fule qaensa higara fuli; insara Yesuusi mannu mereero karsame ledonsa haꞌranni nooha lawinonsa. Ikkollana insa Yesuusi fiixinsa ledo nooha laweennansa laꞌanno woyite isi dino.

Yooseefinna Maariyaami galagale Yerusaalame hige sase barra woꞌma Yesuusa hasanni keeshshi. Hakkunni gedensaanni insa, qullaawu minira haꞌri. Insa maranno woyite Yesuusi rosiisaanote mereero ofolle, coyidhannore seekke macciishshanninna insa xaꞌmo  xaꞌmanni no. Rosiisaanono dhagge assidhe iso xaꞌmo xaꞌmitanni no. Qoleno Yesuusi qolanno dawaro dhagge ikkitinonsa. Insa Yesuusi Yihowa Seera wodanchinota huwattino.

Yooseefinna Maariyaami kayinni lowo geeshsha masino. Maariyaami togo yitu: ‘Beettoꞌya, ninke ate hansanni base baala tunqoommo! Ati mamira higitto?’ Yesuusi qole, ‘Anniꞌya mine heeꞌra hasiissannoeta diaffinoonni?’ yiinsa.

Yesuusi annisinna amasi ledo Naazireete higino. Yooseefi, isi loosannoha hanaatsimmate looso Yesuusira rosiisinosi. Yesuusi wedellichu noo waro hiittooha lawannohe? Yesuusi lophiti, roore hayyicha ikkino; hattono Maganunna mannu albaanni ayirrinye afiꞌrino.