Yesuusira Biitaaniyaho sasu lubbote jaalla noosi. Insano Aliaazaari, Maariyaaminna Maartaati; Maariyaaminna Maarta Aliaazaari roduuwaati. Mitto barra Yesuusi Yordaanoosi Lagira widoonni heeˈreenna, Maariyaaminna Maarta ‘Aliaazaari lowo geeshsha xiwaminona rakke amo ballo!’ yee sokka soyi. Yesuusi kayinni rahe dimarino. Isi lame barra keeshshi gedensaanni rosaanosira togo yii: ‘Kaˈe Biitaaniya haˈnona. Aliaazaari goxino; anino mare kayiseemmosi.’ Soqqamaasinesi, ‘Aliaazaari goxinoha ikkiro higannosi’ yitusi. Konni daafira Yesuusi “Aliaazaari reyino” yee xawise kulinsa.

Yesuusi Biitaaniya iilli woyite, Aliaazaari madaarrinku shoole barra ikkino. Lowo manni Maartanna Maariyaami sheshifachishara daye no. Maarta Yesuusi dayinota macciishshituti, isiwa doddanni marte togo yitu: “Mootichaˈya, ati kawiicho heeˈroottoha ikkoommero rodiiˈya direyanno.” Yesuusi qole, ‘Rodiikki reyotenni kaˈˈanno. Maarta, ati tenne ammanatta?’ yiise. Maarta ‘Konni kaˈa reyotenni kaˈˈannota afoomma’ yitu. Yesuusi “Kaonna heeshsho aneeti” yiise.

Hakkiinni Maarta Maariyaamiwa marte ‘Yesuusi dayino’ yite kultuse. Maariyaami Yesuusiwa doddanni martu; lowo manni ise ledo Yesuusiwa mari. Maariyaami Yesuusira lekkate ubbe hururante wiˈlitu. Ise “Mootichaˈya ati kawiicho heeˈroottoha ikkoommero rodiiˈya direyanno” yitu. Yesuusi ise lowo geeshsha dadillitinota lae isino wiˈli. Mannu Yesuusi wiˈlanna lae, ‘Aliaazaari hiitto baxannoro laˈe’ yii. Gamu manni kayinni ‘Isi jaalisi reyannokki gede assa mayira hoogino?’ yii. Yesuusi hakkunni gedensaanni maa assinoro afootto?

Yesuusi waammanniwa mari; waammate afoo jawu kinchinni cunfoonni. Isi “Kincho hoolle” yee hajaji. Maarta, ‘Reyinkunni shoole barra ikkino daafira xa foole abbanno’ yitu. Ikkollana, mannu waammate afiinni kincho hooli. Hakkiinni Yesuusi togo yee huuccatto assiˈri: ‘Annaˈya macciishshoottoe daafira galaxxeemmohe. Woˈmanka woyite macciishshattoeta afoommo; togo yoommohu kayinni kuni manni ati soottoeta ammanara yeeti.’ Hakkiinni Yesuusi qoonqosi  naggi asse, “Aliaazaari, amo fuli!” yii. Hakka woyite, mittu maalaˈlinanni coyi ikki: Aliaazaari uddanotenni kafannoonni gedeenni heeˈre waammate giddonni fuli. Hakkiinni Yesuusi ‘Tirresi haˈrona’ yii.

Tenne maalale lainohu lowo manni Yesuusa ammanino. Ikkollana mitu manni mare tenne Farisootaho kuli. Hatte yannanni kayise Farisootu Aliaazaarino Yesuusano shaate heddino. Yesuusite 12 soqqamaasine giddo Asqorootu Yihuda yinannihu maaxame mare Farisootaho togo yii: ‘Yesuusa amaddinanni gede assummoˈnero mageeshshi woxe uyitinannie?’ Farisootu 30 birra uyineemmohe yitu; hatte yannanni kayise Yihuda Yesuusa insara sayise aanno faro hasiˈra hanafi.