Yesuusi dhiwantinore hursinoha calla ikkikkinni reyitinoreno kayisino; hattono bubbenna dambalu sammi yaanno gede assino. Yesuusi ilaalu aana huuccatto assiꞌre kae Galiilu Baara laꞌꞌanno woyite hombobalatte kaꞌe no. Soqqamaasinesi yowolote giddo heedhe, bubbe gargadhate sharrantanni no. Hakkiinni Yesuusi ilaalu aaninni dirre wayi aana haꞌranni yowolonsawa mari. Soqqamaasinesi wayi aana haꞌranni nooha laꞌe lowo geeshsha waajjitu. Yesuusi kayinni ‘Aneetina waajjitinoonte’ yiinsa.

Pheexiroosi, ‘Mooticha, ateetiro atewa dayeemmo gede fajjie’ yii. Yesuusi Pheexiroosi ‘Amo’ yiisi. Konni daafira Pheexiroosi yowolotenni dirre, wayi aana haꞌranni Yesuusiwa hige mari. Ikkollana, Pheexiroosi Yesuusiwa shiqqi yiiti dambala lae waajji. Isira wayi giddo itamannoha lawinosi. Hakko daafira, ‘Mootichaꞌya gatisie!’ yee raari. Yesuusi angasi amade, “Ati ammana xeꞌinohehu, mayira huluullamitto?” yiisi.

Yesuusinna Pheexiroosi yowolo gidditanni heedheennanni dambalu uurri. Hatte yannara Yesuusi soqqamaasine mageeshshi geeshsha hagiidhitinoha lawannohe? Insa “Halaalinta ati Maganu Beettooti” yitu.

Yesuusi dambalu sammi yaanno gede assinohu tenne yannara calla diꞌꞌikkino. Wole woyiteno, Yesuusinna soqqamaasinesi baaru aana yowolotenni hadhanni heedheenna, Yesuusi yowolote giddo badheenni haꞌre goxi. Isi goxe heeꞌreenna, wolqaataamu dambali kai. Dambaluno yowolote daye gaꞌnanna yowolote giddo wayi woꞌmi. Soqqamaasine Yesuusa goxinowiinni kayisse, ‘Rosiisaancho, reyinummona gatisinke!’ yite raartu. Yesuusi goxinowiinni kae baara ‘Sammi yii’ yee hajaji. Bayichonko bubbenna baaru sammi yii. Yesuusi soqqamaasinesi, ‘Ammana ajjinoꞌne’ yiinsa. Insa mimmitoho, ‘Isira bubbenna baaru nafa hajajamannosi’ yitu. Soqqamaasine woꞌmunni woꞌma Yesuusa ammanturo, mitturino waajjishannonsakkita huwattino.