Yesuusi soqqamaasinesi ledo fooqete mine heeꞌre, ‘Techo hashsha kiꞌne baalunku huntine hadhinannie’ yiinonsa. Pheexiroosi kayinni, ‘Wolu baalunku hunte hadhuhero nafa, ani hune dihaꞌreemmohe’ yiino. Yesuusi kayinni Pheexiroosi, ‘Techo lukkichu gana geeshsha sase higge kaadattoe’ yiinosi.

Olanto Yesuusa Qeyaafa minira hadhe hadhu woyite, rooriidi soqqamaasine xooqqe baꞌino. Ikkollana insa giddo lamu mannu mereero karsante hoodesi hadhino. Kuri giddo mittu Pheexiroosiiti. Isi Qeyaafa mini hoowe geeshsha marino; qoleno hakkiicho giira giwaarino. Hakko mitte soqqamaancho Pheexiroosi laꞌe, ‘Atino Yesuusi ledo heedheenna afoommahe!’ yitu.

Pheexiroosi qole, ‘Ani iso diafoommo’ yii. Isi gobbara fulanni heeꞌreenna wole soqqamaancho affe mannaho, ‘Kuni manchi Yesuusi ledo heeꞌreenna afoomma!’ yitu. Pheexiroosi ‘Ani Yesuusi ayetiro diafoommo!’ yii. Wolu manchino Pheexiroosi, ‘Yesuusi ledo noori giddo mittu ateeti! Coyiꞌratto gari atino Yesuusi gede Galiilunni dayottota leellishanno’ yii. Pheexiroosi kayinni ‘Ani iso diegennoommo!’ yee xaari.

Hakkawoyintenni lukkichu gani. Hakkiinni Pheexiroosi Yesuusiwa hige lai. Isi Yesuusi yiinori qulli yeennasi gobbara fule hururame wiꞌlino.

Sanihediriini yinannihu Ayihudennihu yoote mini miilla, Yesuusi aana yoo yaate Qeyaafa mine gamba yite no. Insa wonanni Yesuusi reya hasiissannosi yite kaꞌino; xa kayinni iso shitanno korkaata hasidhanni no. Ikkollana insa Yesuusi aana mitte soꞌrono diaffino. Jeefote Qeyaafa Yesuusa ‘Ati Maganu Beettooti?’ yee xaꞌmi. Yesuusino ‘Ee’ yii. Qeyaafa ‘Kuneeti isi Magano xonanni no. Kawiinni saino korkaata dihasiꞌneemmo’ yii. Yoote mini miilla, ‘Kuni manchi reya hasiissannosi’ yitu. Insa Yesuusa qawaaddinosi, anja tuffinosi, hattono alba dibbe  gantinosi; hakkiinni ‘Hanni ati masaalaanchohoro ganihehu ayetiro kulinke’ yitinosi.

Soodita insa Yesuusa Sanihediriini songo gamba yitannowa massite xaano, ‘Ati Maganu Beettooti?’ yite xaꞌmitusi. Yesuusino, “Ee, kiꞌne yitini gedeeti” yiinsa. Hakkiinni insa isi Magano xonino yite Roomu gashshaanchi Philaaxoosiwa haadhe massitu. Hakkiinni mayi ikkiyya? Aante noo xaggera tenne daafira ronseemmo.