Yesuusi Galiilaho harunsaanosinni xaadino. Hakko heedheenna isi lowo geeshsha hasiissannota mitte hajajo hajajinonsa. Togo yiinonsa: ‘Hadhine manna baala rosaanoꞌya asse. Ani rosiisoommoꞌnere rosiissensa, hattono cuuꞌensa.’ Hakkiinni, ‘Duuchanka woyite ani kiꞌne ledo noommota qaagge’ yiinsa.

Yesuusi reyotenni kaihu gedensaanni 40 barri giddo, Galiilahonna Yerusaalamete lowo xibbe ikkitano rosaanosira leellino. Isi kaajja roso rosiisinonsa, hattono duucha maalale loosino. Hakkiinni Yesuusi goofimarchoho soqqamaasinesinni Ejedhete Ilaalira xaadino. Isi togo yiino: ‘Yerusaalametenni fultinoonte. Anniꞌya uyino hexxo agadhe.’

Isi yiinori soqqamaasinesira dileellinonsa. Insa togo yite xaꞌmitusi: ‘Israeelete Moote ikkattohu xaatini?’ Yesuusi togo yiinsa: ‘Yihowa Moote assannoe yanna dixaati. Mulenni qullaawu ayyaani wolqa adhitinanni; hakkiinni ane daafira farcidhinanni. Hadhine Yerusaalamete, Yihudaho, Samaariyahonna xeertote noo gobba baalate sabbakke.’

Hakkunni gedensaanni Yesuusi iimira hige haꞌreenna gomichu guggushshisi. Rosaanosi iso laꞌanni keeshshitino; isi kayinni haꞌre kaino.

Rosaano Ejedhete Ilaalinni Yerusaalame hadhino. Insa mitto mine gamba yite duuchanka woyite huuccidhanno. Yesuusi biddishsha aannonsa yanna agadhitino.