Ayihudete manni diru kiiro Niisaani yinanni aganira 14^ki barra Faasiku ayyaana ayirrisanno. Insa konne ayyaana ayirrisannohu, Yihowa Gibitsete borojjimmanni fushshe Hexxote Gobba eessinonsata qaagateeti. Yesuusinna soqqamaasinesi 33 M.D. Yerusaalamete fooqete mini giddo Faasiku ayyaana ayirrissino. Insa hurbaate ittu gedensaanni Yesuusi, ‘Kiˈne giddonni mittu ane sayise hirannoe’ yii. Soqqamaasine lowo geeshsha masse, ‘Sayise hirannohehu ayeti?’ yite xaˈmitu. Yesuusi qole, ‘Sayise hirannoehu ani tima hiiqqe eemmosiho’ yii. Hakkiinni Yesuusi Asqorootu Yihudara tima hiiqqe uyi. Hakkawoyintenni Yihuda fule haˈrino.

Hakkiinni Yesuusi huuccatto asse tima hiiqqaqqe gattino soqqamaasinera uyi. Isi togo yii: ‘Hiiˈe konne tima itte. Kuni timi kiˈne daafira eemmo maalaˈya riqiwanno.’ Hakkiinni Yesuusi woyine haaˈre huuccatto asse soqqamaasinesira uyi. Isi togo yiino: ‘Tenne woyine agge. Tini woyine cubbiˈnera maaro afidhinanni gede kiˈnera yee eemmo mundeeˈya riqibbanno. Kiˈne iima ledoˈya mootoolle ikkitinanni. Tenne diru kiiro qaagge.’ Xaa geeshsha Yesuusi harunsaano diru kiiro hakkonne hashsha gamba yite ayirrissanno. Xa konne gambooshshe Mootichu Hurbaate yinanni.

 Hurbaate ittu gedensaanni, Yesuusi soqqamaasine ‘Ninke mereero roorannohu ayeti?’ yite heewisantu. Yesuusi kayinni togo yiinsa: ‘Kiˈne giddo rooriidihu, isonooto wolu baalunkunni ajinohu gede asse kiirannoho.’

‘Kiˈne jaallaˈyaati. Anniˈya kulammoˈnera hasiˈrannore baalare kuloommoˈne. Mulenni ani Anniˈyawa iimira haˈreemmo. Kiˈne kawiicho heedhinanni; mimmito baxxinanniha ikkiro, mannu ane rosaano ikkitinoonnita konninni afanno. Ani baxummoˈnente gede mimmitoˈne baxxe.’

Jeefote Yesuusi Yihowa rosaanosi agarannonsa gede huuccatto assino. Insa sumuu yite mitteenni loossanno gede Yihowa kaaˈlansara huucciˈrino. Yesuusi Yihowa suˈmi qullaawa ikkanno gedeno huucciˈrino. Hakkiinni Yesuusinna soqqamaasinesi faarsotenni Yihowa guwissu gedensaanni fulte hadhino. Hakkawoyite Yesuusa diinnasi amaddanno yanna gambissino.