Saawuli Roomaho Xersesi yinanniwa ilamino. Isi Ayihudete Seera seekke rosino Farisichaati; qoleno Kiristaana lowo geeshsha giwanno. Isi Kiristaana ikkino meentonna labballo, mininsanni haaˈre haˈre usuranno. Wole agurina mannu Isxifaanoosi kinnatenni gane shii yannara isi uurre laˈˈanni no.

Ikkollana, Saawuli Yerusaalamete heeˈranno Kiristaana calla ikkikkinni wolewa heeˈranno Kiristaanano usura hasiˈrino. Konnira Demaasqote heeˈranno Kiristaana usuranno gede fajjasira, kakkalaanote biilo xaˈmiˈri. Saawuli Demaasqote katama iillara rahe heeˈreenna, bilicci yaanno xawaabbi doyisseennasi uulla uwi. Hakkiinni ‘Saawuli, mayira qarrissattoe?’ yitanno huuro macciishshi. Saawuli qole, “Ati ayeti?” yee xaˈmi. Hakkiinni, ‘Ani Yesuusaati. Xa kaˈe Demaasqo haˈri; assattore hakko kullannihena’ yiisi. Hatte yannara Saawuli ille ballino daafira, mannu massage Demaasqo massisi.

Demaasqote Hanaaniya yinannihu ammanamino Kiristaanchi no. Yesuusi ajuujatenni isira togo yiisi: ‘Suwashsho yinanni doogo widoonni higge Yihuda yinanni manchi minira haˈri; hakkiicho Saawuli yinanni mancho xaˈmisiisi.’ Hanaaniya, ‘Mooticha, hakku manchi rosaanokki usurannoha ikkinota macciishshoommo!’ yii. Yesuusi kayinni ‘Saawuli dancha duduwo lowo dagara duduwanno gede doodhoommohona isiwa haˈri’ yii.

Konni daafira, Hanaaniya Saawuli noowa mare, ‘Rodooˈya Saawuli, Yesuusi illekki fanammora soyinoe’ yiisi. Bayichonko Saawulira illesi faˈnantu. Hakkiinni isi Yesuusi daafira rose harunsaanchosi ikkino. Saawuli cuuame Kiristaancho ikke wolu Kiristaani ledo xaadu mine sabbaka hanafi. Ayihude Saawuli mannaho Yesuusi daafira rosiisanna laˈe  mageeshshi geeshsha maalaˈlitinoha lawannohe? Insa ‘Kuni manchi Yesuusi rosaano qarrisannoha diˈˈikkino?’ yitino.

Saawuli sase diro woˈma Demaasqote heeˈranno mannira sabbakino. Ayihude Saawuli gibbino daafira shitara mixidhino. Ikkollana roduuwu tenne macciishshite, katamunni fule haˈranno gede assitinosi. Insa iso gimboolaho worte, huxxu xullo giddoonni qolte dirrissinosi.

Saawuli Yerusaalame iilliti, hakko heeˈranno roduuwinni xaadi. Ikkollana insa iso waajjitino. Barnabaasi yinannihu shaqqadu rosaanchi, Saawuli soqqamaasinenniwa masse, isi bashsho gede busha mancho ikkinokkita kulinsa. Hakkiinni Saawuli, Yerusaalamete noo songo ledo dancha duduwo diinaggaawe sabbakino. Yannate gedensaanni suˈmasi Phaawuloosi yinoonni.