Israeelete manni borojje ikke daafursanno looso loosanno gede assinoonni. Yihowa Musenna Aarooni hadhine Ferioonira togo yiiyye yiinsa: ‘Manniˈya halalli gobbara haˈre magansiˈroena aguri.’ Feriooni kayinni togo yee naaxxe coyiˈri: ‘Yihowa yiinota dimacciishsheemmo; Israeeleno diagureemmo.’ Hakkiinni Feriooni Israeele bashsho loossanno loosinni roore loossanno gede assi. Yihowa Ferioonira rosiisara hasiˈrino coyi no. Hiitto asse rosiisinoro afootto? Yihowa Gibitsete gobbara Tonne Qoomama dirrisi. Yihowa Muse togo yii: ‘Feriooni coyiˈroommore macciishsha giwino. Soodo guto isi Abbayi Laga dirranno. Isiwa marte togo yii: “Mannaˈya haˈrisa giwootto daafira Abbayi Lagi mundeete soorramanno.”’ Muse Yihowara hajajame Feriooniwa mari. Feriooni Aarooni siqqosinni Abbayi Laga gananna lai; hakkiinni lagu mundeete soorrami. Lagu giddo noo qulxuˈme reyitu, laguno olooqe bowi; konni daaafira Abbayi Lagi angannikki gede ikki. Feriooni kayinni xaano Israeelete manna diagurino.

 Lamalu barri gedensaanni Yihowa Muse galagale mare Ferioonira togo yaanno gede soyi: ‘Mannaˈya agura giwittoro Gibitsete gobbara becheˈnaama woˈmitanno.’ Aarooni siqqosi gotti assita becheˈnaama fulte baatto baala woˈmitu. Becheˈnaama mannu minira eˈu, daallassansa gidditu, hattono sagalete uduunni giddora nafa eˈino. Becheˈnaama baalankawa woˈmitu! Feriooni Musera, ‘Israeelete manna agureemmona Yihowa becheˈnaama hoolanno gede huuccie’ yii. Konni daafira Yihowa qoomamu uurranno gede assi. Gibitsete manni reyitino becheˈnaama gamba asse base basete duuni. Hakkiinni bowanye gobba woˈmitu. Ikkollana Feriooni xaano Israeelete manna diagurino.

Hakkunni gedensaanni Yihowa Muse togo yii: ‘Aarooni siqqosinni baattote aana noo buko ganona; hakkiinni buko biinnete soorrantanno.’ Bayichonko biinne gobba baala woˈmitu. Konnira mitu Gibitsete manni Ferioonira, ‘Konne qoomama dirrisinohu Maganoho’ yii. Feriooni kayinni Israeelete manna xaano diagurino.