Muse Ferioonira ‘Layinkita atewa didayeemmo’ yiino. Kayinni isi Feriooniwiinni haˈrara albaanni isira togo yii: ‘Hashshu mereero, Feriooni beettinni kayise borojjicho iltino beetti geeshsha, Gibitsete baattora umo ilaminohu baalu reyanno.’

Yihowa Israeelete manni baxxino hurbaate qishiranno gede kulinsa. Isi togo yiinsa: ‘Mittu diriha geˈrechu woy meichu wiliiˈlicho gorritine gama mundee waalchoho gaˈne. Maala durishidhine shiishinokki timinni itte. Haˈrara kaino manchi gede uduunne uddidhine, caamma wodhitine agadhe. Techo hashsha Gibitsete gobbanni fushsheemmoˈne.’ Hakkawote Israeelete manni mageeshshi geeshsha hagiidhinoha lawannohe?

Hashshu taalo Yihowa sokkaasinchi Gibitsete manni minira mari. Sokkaasinchu waalchoho mundee gannoonnikki mine nooha umi umiricho shii. Waalchoho mundee gannoonni mine kayinni agure saino. Gibitsete manni baalaho, yaano buxichohono dureessahono bayiru beettinsa reyino. Kayinni Israeelete ooso giddo mittu nafa direyino.

Feriooni beetti nafa reyino. Feriooni xaate Israeelete manna haˈranno gede aguraraati. Konni daafira isi Muse togo yii: ‘Hadhe kawiinni. Hadhine Maganoˈne magansidhe. Saadaˈneno adhitine hadhe!’

 Aganu waraˈa yee heeˈreenna, Israeelete manni minu minunninna gaˈre gaˈretenni Gibitsete gobbanni fuli. Israeelete manni kiiro meentonna qaaqquulle agurranna 600,000 ikkitanno. Wolu lowo mannino Yihowa magansiˈrate insa ledo haˈrino. Israeelete manni xaate lubbo gatino!

Israeelete manni Yihowa gatisinonsa gara qaagate diru kiiro baxxino hurbaate qixxeessiˈranno. Hakkonne hurbaate Mararrote Ayyaana woy Faasikaho yinanni.