Yihowa Muse togo yiisi: ‘Ani noommowa ilaalu iimira amo. Boncoonni kinna aana seeraꞌya borreesse eemmohe.’ Muse ilaala gidde hakko 40 barranna 40 hashsha keeshshi. Muse hakko heeꞌreenna Yihowa lame boncoonni kinna aana Tonne Seera borreesse uyisi.

Shiima yanna gedensaanni Israeelete manni Muse hune haꞌrinonsaha laweennansa Aarooni togo yitu: ‘Albankeenni haꞌrannohu hasiisannonke; konni daafira magano seekkinke!’ Hakkiinni Aarooni ‘Culkaꞌne anewa abbe’ yii. Isi culka giiratenni daashshe siitu misile seekkinsa. Israeelete manni “Kuni Gibitsete gobbanni fushshe abbinonke Maganooti” yii. Hakkiinni insa culkunni seekkinoonni siito magansidhu, hattono ayyaana ayirrissu. Hatto assansa garahoni? Digaraho, korkaatuno insa ‘Yihowa calla magansiꞌneemmo’ yite qaale eꞌino. Kayinni eꞌino qaale diwonshitino.

 Yihowa Israeelete manni assinore lae Muse togo yii: ‘Mannu ani hajajoommore agure kaphu magano magansiꞌranni noona rakke insawa dirri.’ Hakkiinni Muse lame boncoonni kinna haare ilaalu aaninni dirri.

Muse Israeelete manni noowa shiqqi yiiti, mannu faarsanna macciishshi. Hakkiinni isi mannu sirbannanna siitu misilera sagadanna lai. Muse lowo geeshsha hanqi. Hakkiinni haare noota lamenta boncoonni kinna ole cancani. Isi siitu misile haare uullate gani. Hakkiinni Muse Aarooni togo yee xaꞌmi: ‘Kuni manni ma asseennaheeti kageeshshi cubbo loosara worte laittohu?’ Aarooni togo yee qoli: ‘Anera hanqitootie; konni manni gara afootto. Insa magano seekkinke yitueta, culkansa giirate giddo tugeenna tini siitu misile ikkitino!’ Aarooni togo assasi digaraho. Muse galagale ilaala haꞌre Yihowa Israeelete mannira gatona yaanno gede huucci.

Yihowa Isira hajajamino mannira gatona yiino. Israeelete manni Muse yaannonsare assa hasiissannonsaha dilawannohe?