Kanaani gobbara heeˈrannohu wolu manni Iyyaarkote katami diigaminota macciishshi. Kanaani mootoolla Israeelete manni ledo olamate kaˈu. Gebaooni manni kayinni wolere hedino. Insa tattaˈˈaame uddano uddidhe Iyyaasuwa marte togo yitu: ‘Ninke dangoommohu xeerto gobbanniiti. Yihowa daafiranna Isi Gibitsetenna Moaabi gobbara assinoˈnere macciishshinoommo. Shitinanninkekki gede xaarrenke; hakkiinni ninke soqqamaanoˈne ikkineemmo.’

Iyyaasu insa yitinore ammane, dishineemmoˈne yee xaari. Sasu barri gedensaanni kayinni, Iyyaasu insa dagginohu xeerto gobbanni ikkinokkita afi. Insa dagginohu Kanaani gobbaanniiti. Iyyaasu Gebaooni manna, “Mayira doggininke?” yee xaˈminsa. Insa togo yite qoltu: ‘Maganiˈne Yihowa kiˈnera olamanni noota anfoommo daafira waajjineetina ballo shitinoontenke.’ Iyyaasu xaarino xaaro garinni insa ledonsa heedhanno gede fajjinsa.

Shiima yanna gedensaanni, onte Kanaani mootoollenna olantonsa Gebaooni manna shineemmoˈne yite  waajjishiishshu. Iyyaasunna olantosi Gebaooni manna gatisate hashsha woˈma hadhanni galtu. Layinki barra soodo guto olu kai. Kanaani manni addi addi raga hige xooqi. Insa martuwa baalawa Yihowa lowiddaanna kaade dirrise shiino. Hakkiinni Iyyaasu Yihowa arrishsho noowa uurritanno gede assara huucci. Bashsho arrishsho noowa uurrite diegentino; ikkina Iyyaasu arrishsho noowa uurritanno gede huucciˈrinohu mayiraati? Isi Yihowa ammanino daafiraati. Israeele Kanaani mootoollanna olantonsa ledo olante qeelta geeshsha arrishsho dieˈino.