Lowohu Israeelete manni xaano Yihowa agure kaphu maganna magansiˈrate higi; konni daafira Yihowa Filisxeemete dagara sayise uyinsa. Ikkollana Israeelete mereero Yihowa baxanno manni no. Yihowa baxanno manni giddo mittu Maanuheeti. Isinna galtesi ooso diˈˈilino. Mitto barra Yihowa Maanuhe galtewa sokkaasincho soyi. Sokkaasinchu togo yiise: ‘Labbaa beetto ilatta. Isi Israeele Filisxeemete anganni gatisanno. Isi Naaziricha ikkanno.’ Naazirichu maatiro afootto? Naazirichu Yihowara baxxino soqqamaanchooti. Naazirichu umo meexxa dihasiissannosi.

Yannate gedensaanni Maanuhe labbaa qaaqqo ili; isira suˈma Samisoni yee fushshi. Samisoni lophita, Yihowa wolqaataamo assisi. Isi anga callatenni doobbiicho shiino. Mitte hige callichisi 30 Filisxeemete manna shiino. Filisxeemete manni iso giwino daafira, shaasira hasiˈri. Mitto hashsha Samisoni Gaaza yinanni katami giddo goxe heeˈreenna Filisxeemete manni soodiro shaasira katamu xullichira agarisi. Kayinni Samisoni hashshu taalo goxinowiinni kae katamu xullichiwa mari; xullichu cufana buqqi asse kayise haaˈre haˈri. Hakkiinni cufana qoteho duhe Kebirooni yinanni ilaali mule masse hunino!

Samisoni Daliila yinanni beetto adhara layiˈri; yannate gedensaanni Filisxeemete manni isewa mare togo yii: ‘Samisoni wolqaataamo assinosiri maatiro xaˈmite afittaro, lowo birra uyineemmohe. Ninke iso amande usuru minira eessa hasiˈnoommo.’ Daliila woxe afiˈra hasidhino daafira maahoyye yitu. Umi qara Samisoni wolqaataamo assinosiri maatiro kula giwise. Ikkollana, Daliila fojosi xawo fushshitara kulie yite uurranna ofolla hoˈlitusi. Hakkiinni Samisoni togo yiise: ‘Naaziricha ikkoommo daafira umo meende diegenninoonnie. Umoˈya meendiro wolqaˈya baˈanno.’ Samisoni isera hatto yee kulasi soˈrote; dihattooti?

 Daliila bayichonko Filisxeemete mannira ‘Wolqaataamo assinosiri maatiro afoomma!’ yitu. Ise Samisoni giwoodise aana goxisse mittu manchi umosi meedanno gede assitu. Hakkiinni ‘Samisoni, Filisxeeme dagguhe!’ yitusi. Samisoni goxichunni baqqi yaanno woyite, wolqasi baˈino. Filisxeeme amadde illesi fushshite usuru minira eessitusi.

Mitto barra lowo Filisxeeme Daagooni yinanni maganinsa mine gamba yite heedhe togo yitu: ‘Maganinke Samisoni angankera sayise uyinonke! Albankeenni godoˈlanni ososhshiishonkena fushshitine abbe!’ Hakkiinni iso tuuqqate mereero uurrise osoˈlitusi. Samisoni, ‘Yihowa, eeggatena mitte higge calla wolqa uyie’ yee huucciˈri. Hatte yannara Samisoni dananchi galagale lophe no. Isi noosi wolqa baalatenni tuuqqa xiiwi. Hakkiinni minu aanansa toeenna hakko noo manni baalu reyi; Samisonino ledonsa reyino.