Mitto barra Moote Akiaabi Iyiziraeeli katamira noohu mootimmate minesi heeˈre, maskootete widoonni qole woyinete kaashshi base lai; tini kaashshu base Naabute yinanni manchite. Akiaabi tenne base adha hasiˈrino daafira Naabute ‘Anera hirie’ yii. Naabute kayinni hira giwi; korkaatuno Yihowa ‘Ragidhinoonni baatto hirtinoonte’ yiino. Akiaabi Naabute gara ikkinore assino daafira naadinosi? Dinaadinosi. Akiaabi lowo geeshsha hanqi. Isi lowo geeshsha hanqe goxinowiinni kaˈˈa giwi, sagaleno ita giwi.

Akiaabi minaama busha Mootitte Elzaabeeli iso togo yitu: ‘Ati Israeelete moote ikkootto daafira, hasiˈrittore assa dandaatto. Naabuteta woyinete kaashshi baatto ani haaˈreemmahe.’ Hakkiinni Elzaabeeli katamu geerrira togo yite sokka borreessite sokku: ‘Naabute Magano xonino yitine kinnatenni gantine shiiyye.’ Katamu geerri Elzaabeeli yitinonsare assi; hakkiinni Elzaabeeli Akiaabi togo yitu: ‘Xa Naabute reyinona hadhe isita woyinete kaashshi baatto adhi.’

Elzaabeeli beebbate shitinohu Naabute calla diˈˈikkino. Ise Yihowa baxannoha lowo manna shitino. Ise kaphu maganna magansidhanno; wole busha coyeno assitanno. Yihowa Elzaabeeli assitannoha busha coye laino. Isi ma assiyya?

Akiaabi reyi gedensaanni, beettisi Iyoraami moohi. Yihowa Elzaabelinna minise manna shee gudanno gede Iyu yinanni mancho soyi.

Iyu faradi-gaaresi gulufe Elzaabeeli heedhannowa haˈri. Iyoraamino faradi-gaaresi koodhe Iyunni xaadara fuli; hakkiinni isi Iyu ‘Maaho dikeereho?’ yee xaˈmi. Iyu togo yee dawari: ‘Amakki Elzaabeeli busha coye assitanni heedheenna mayi keeri heeˈranno!’ Iyoraami xooqe baˈˈara faradi-gaaresi badhera qoˈli; hakkiinni Iyu Iyoraami qalaccotenni qase shiino.

 Hakkiinni Iyu Elzaabeeli heedhannohu mootimmate miniwa mari. Elzaabeeli Iyu daanni noota macciishshituti, kuula buudhitenna umo amaxxite fooqete aana heedhe maskootete giddoonni qolte laˈanni agartu. Iyu minisewa iillita, Elzaabeeli fenjeejjite coyidhu. Hakkiinni Iyu mulese uurrite noo soqqamaanose, “Elzaabeeli woro qoltine tugge!” yiinsa. Insa Elzaabeeli maskootete widoonni uulla qolte tuggeenna uullate gaˈnite reyitu.

Hakkunni gedensaanni Iyu 70 Akiaabi ooso shiino, hattono Baˈˈaali magansiˈranno manna shee gudino. Yihowa assinannire baala laˈˈannotanna busha coye assitannore qorichishannota afitto?