1, 2. Yihowa maate hiittoo heeshsho heedhara hasiꞌranno?

 UMO labbaahunna meyaati adhamanno gede assinohu Yihowaati. Qullaawu Maxaafi, Maganu umi meyata kalaqe kae “haaꞌre Addaamiwa [abbinota]” kulanno. Addaami tennera lowo geeshsha hagiidhe, “Kuni miqichi miqichoꞌyaati; maaluno maalaꞌyaati” yiino. (Kalaqama 2:22, 23) Tini Yihowa adhamino manni hagiirru noo heeshsho heeꞌrara hasiꞌrannota leellishshanno.

² Batinyu manni maate kayinni hagiirru dinoote; tini dadillissannote. Ikkirono Qullaawu Maxaafi, woꞌmunku maatete miili maatensa seekkanno gedenna mittimma noota ikkitanno gede assanno gara kulannoha xintu seera amadino.—Luqaasi 11:28.

3, 4. (a) Minaanni minaamasi ma assa hasiissannosi? (b) Minaanninna minaama mimmito gatona yaa hasiissannonsahu mayiraati?

³ Qullaawu Maxaafi danchu minaanni minaamasi baxanna ayirrisa hasiissannosita kulanno. Hanni Efesooni Sokka 5:25-29 nabbawi. Minaanni woꞌmanka wote minaamasira shaqqado ikka hasiissannosi. Qoleno gawajjannose coyinni agarannose, towaatannose, hattono gawajjannosere diassanno.

⁴ Ikkina minaanni minaamasi sodhanno wote maa assa hasiissannosi? Minaannuwa togo yine amaalloonni: “Kiꞌne labballo! Minaamaꞌne baxxe [“baxa agurtinoonte,” NW]; kakkachoota ikkitinoontensa.” (Qolasiyaasi Sokka 3:19) Minaannuwa, kiꞌneno sodhinanni yanna noota qaagge.  Maganu soꞌroꞌne gatona yaaꞌnera hasidhinanniha ikkiro, galteꞌne soꞌro gatona yaa hasiissannoꞌne. (Maatewoosi 6:12, 14, 15) Minaanninna minaama mimmito gatona yaannore ikkiro, maatensa hagiirru noota ikkitanno.

5. Minaanni minaamasi ayirrisa hasiissannosihu mayiraati?

⁵ Yihowa minaanni minaamasi ayirrisara hasiꞌranno. Minaanni minaamasira hasiisannore seekke heda hasiissannosi. Kuni mulluri gede assine laꞌnanni coye diꞌꞌikkino. Minaanni minaamasi garunni amadannokkiha ikkiro, Yihowa huuccattosi macciishsha giwara dandaanno. (1 Pheexiroosi 3:7) Yihowa albaanni lowo waagi heeꞌrannonke gede assannonkehu isira noonke baxilleeti. Isi labbaaha meyatenni roorse dilaꞌꞌanno.

6. Minaanninna minaama “mitto bisooti” yaa mayyaate?

⁶ Yesuusi minaanninna minaama “mitto bisooti ikkinnina lame diikkitino” yiino. (Maatewoosi 19:6) Konnira insa mimmitoho ammanaminore ikkanno ikkinnina ammanama xeꞌinore diassanno. (Lawishsha 5:15-21; Ibiraawoota 13:4) Minaanninna minaama shaqqillunni kuꞌu kuꞌunnita siimu xaadooshshi hasatto wonsha hasiissannonsa. (1 Qorontoosi 7:3-5) Minaanni, “mannimmasi itisannotanna towatannota ikkinnina, mannimmasi giwannohu horonta [nookkita]” qaaga hasiissannosi. Konni daafira minaamasi baxanna towaaxxa hasiissannosi. Wolu coyi baalunkunni roore minaama minaannise shaqqado ikkaranna baxasera hasidhanno.—Efesooni Sokka 5:29.

7. Maatete umo ikkannohu hasiisannohu mayiraati?

⁷ Mitte mittente maatera maatete umi hasiisanno; maatete umi, maate qinaabbanno gede biddishsha aanno. Qullaawu Maxaafi 1 Qorontoosi 11:3 aana togo yaanno: “Labballo baalaho Kiristoosi umoho; meyate umi labbaaho; Maganu qole Kiristoosira umoho.”

8. Minaama minaannase addinta ayirrissannota leellisha dandiitannohu hiittoonniiti?

 ⁸ Hige soꞌrannokki minaanni dino. Ikkirono, minaama minaannise yiinorira sumuu yitannohanna isi ledo kaaꞌlantannoha ikkiro, woꞌma maate horo afidhanno. (1 Pheexiroosi 3:1-6) Qullaawu Maxaafi togo yaanno: “Galteno minaannase ayirrisso.” (Efesooni Sokka 5:33) Minaannise ammanasera gutamannokkiha ikkirona? Hatto ikkirono, iso godowinta ayirrisa hasiissannose. Qullaawu Maxaafi togo yaanno: “Kiꞌne meentu, galteꞌnera hajajamme! Kunni garinni mitu mitu Maganu qaale ammana hooggurono, qaale affukkinni meentinsa amanyoote laꞌe tenne heeshshowa gamba yaa dandiitanno. Gamba yaa dandiitannohu, xalalanna manna ayirrisate heeshshoꞌne laꞌurooti.” (1 Pheexiroosi 3:1, 2) Minaama dancha lawishsha ikkitannoha ikkiro, minaannise ammanase huwataranna ayirrisara dandaanno.

9. (a) Minaama minaannise ledo sumuu yitinokki coyi heeꞌriro maa assa hasiissannose? (b) Tiito 2:4, 5 aana minaama mayine amaalloonni?

⁹ Minaama minaannise ledo sumuu yitinokki coyi  heeꞌriro maa assa dandiitanno? Hedose ayirrinyunni kula dandiitanno. Lawishshaho, Saara coyidhino coyi Abirihaami dibaxisinosi; ikkirono Yihowa iso, “Saara yitannohere baala assi” yiino. (Kalaqama 21:9-12) Minaanni yiino woy murino coyi Qullaawu Maxaafi ledo sumuu yaannokkiha ikka hoogi geeshsha, minaamasi iso irkisa hasiissannose. (Soqqamaasinete Looso 5:29; Efesooni Sokka 5:24) Dancha minaama minise manna towaaxxitanno. (Tiito 2:4, 5 nabbawi.) Minaannisenna oosose ise insa towaaxxate diinaggaabbe loossanno gara laꞌanno wote, ise albinni roore baxxannose, hattono ayirrissannose.—Lawishsha 31:10, 28.

10. Qullaawu Maxaafi babbaxxe heeꞌratenna galte diigate daafira mayyaanno?

¹⁰ Mitu minaanninna minaama muddame babbaxxe heeꞌrate woy galtensa diigate kaꞌꞌanno. Ikkollana Qullaawu Maxaafi, “Minaama minaanniwiinni baxxitoonke. . . . Minaannino minaamasi fushshe haꞌrisoonke” yaanno. (1 Qorontoosi 7:10, 11) Minaanninna minaama babbaxxe heeꞌranno gede assara dandaannohu mitu mitu baxxino coyi no; ikkirono kuni gura qiniite laꞌne assinannireeti. Adhanna adhama diigana? Qullaawu Maxaafi, galte diiga dandiinannihu minaanninna minaama giddo mittu soorriro calla ikkinota kulanno.—Maatewoosi 19:9.

11. Oosote wolu baalunku coyinni roore hasiisannori maati?

¹¹ Annuwanna amuuwa, dandaamiꞌne deerrinni oosoꞌne ledo mitteenni yanna sayisse. Oosoꞌne hasidhannori kiꞌneeti; qoleno wolu baalunku coyinni roore Yihoware rosiissinansara hasidhanno.—Marro 6:4-9.

12. Annuwunna amuuwu oosonsa gawajjotenni agarate maa assa hasiissannonsa?

¹² Sheexaanu alame albinni roore bushshanni hadhino;  hakko daafira qaaqquullenke gawajja wole agurina bushiisha hasiꞌranno manni no. Mitu anninna ama tenne hajore qaaqquullinsa ledo hasaawa waajjanno. Ikkirono annuwunna amuuwu, togoo manni nootanna insa gargadha dandiinanni gara qaaqquullinsara kulte qorophisiisa hasiissannonsa. Annuwanna amuuwa, qaaqquulleꞌne gawajjotenni agara hasiissannoꞌne. a—1 Pheexiroosi 5:8.

13. Annuwunna amuuwu oosonsa rosiisa hasiissannonsahu hiittoonniiti?

¹³ Annuwunna amuuwu oosonsara dancha amanyoote  rosiisa hasiissannonsa. Oosoꞌne rosiisa dandiitinannihu hiittoonniiti? Oosoꞌnera qajeelshu hasiisannonsaha ikkirono, seejjitinanni wote godowa kaajjadda ikka dihasiissannoꞌne. (Ermiyaasi 30:11) Hakko daafira, oosoꞌne hanqitine seejjitinoonte. “Urdete gede qasanno” coye coyidhine insa gawajja hasidhinannikkiti egennantinote. (Lawishsha 12:18) Oosoꞌne hajajama hasiissannonsahu mayiraatiro huwattanno gede rosiissensa.—Efesooni Sokka 6:4; Ibiraawoota 12:9-11; Jeefote Hedo 30 lai.

14, 15. Ooso anninsaranna amansara hajajama hasiissannonsahu mayiraati?

¹⁴ Yesuusi woꞌmanka wote, wole agurina hajajama shota ikkitannokki wote nafa Annisira hajajamino. (Luqaasi 22:42; Yohaannisi 8:28, 29) Yihowa oosono anninsaranna amansara hajajantara hasiꞌranno.—Efesooni Sokka 6:1-3.

¹⁵ Ooso, anniꞌneranna amaꞌnera hajajama qarra labbe leeltuꞌnero nafa, hajajamaꞌne Yihowano annaꞌnenna amaꞌneno tashshi assitannota qaagge. b—Lawishsha 1:8; 6:20; 23:22-25.

16. (a) Sheexaanu wedellootu gara ikkinokkire assitanno gede jifannohu hiittoonniiti? (b) Yihowa baxanno manna jaala assiꞌra hasiissannohu mayiraati?

¹⁶ Daawuloosi gara ikkinokkire assitinanni gede jaallaꞌnenna wolu wedellooti widoonni jifaꞌnera dandaanno. Isi darawote widoonni daanno fonqoli shota ikkinokkita afino. Lawishshaho, Yaiqoobi beetto Diina Yihowa baxannokki manni ledo jaaloontino. Kuni jaaloomi iseno maateseno baasa gawajjino. (Kalaqama 34:1, 2) Jaallaꞌne Yihowa baxxannokkire ikkituro, Yihowa giwannore assitinanni  gede xixxiibbaꞌnera dandiitanno; tini qolte kiꞌnenna maateꞌne xissiissanno, Maganono dadillissanno. (Lawishsha 17:21, 25) Yihowa baxanno manna jaala assiꞌra lowo geeshsha hasiissannohu iseraati.—1 Qorontoosi 15:33.

17. Maatete giddo mittu mittunku manchihu loosu qeechi maati?

¹⁷ Maatete giddo noo manni Maganu seera harunsannoha ikkiro, lowo qarranna xisso gatanno. Konni daafira minaanna, minaamakki baxi, hattono baxillunni towaatise. Minaama, minaannakki ayirrisi, hattono isira maahoyye yite gali; qoleno Lawishsha 31:10-31 kulloonni minaama lawishsha harunsi. Annuwanna amuuwa, oosoꞌne Magano baxxanno gede rosiissensa. (Lawishsha 22:6) Annuwa, maateꞌne ‘seekkitine woy danchu garinni gashshe.’ (1 Ximootewoosi 3:4, 5; 5:8) Ooso, anniꞌneranna amaꞌnera hajajamme. (Qolasiyaasi Sokka 3:20) Maatete giddo noohu baalunku soꞌrannota qaaggine, shooshanqetenni mimmito maaro xaꞌmidhe. Ee, Qullaawu Maxaafi maatete giddo noohura mittu mittunku manchira kaaꞌlitanno amaale aanno.