1, 2. Huuccatto muxxe eltooti yineemmohu mayiraati? Qullaawu Maxaafi huuccattote daafira kulannore afa hasiissannonkehu mayiraati?

 KALQETE alame hendiro uulla lowo geeshsha shiimate. Yihowa uulla qole laꞌꞌanno wote, daga baalanti gambayichu giddo noote wayi copho geeshshite. (Faarso 115:15; Isayaasi 40:15) Kalqete alame laꞌniro ninke lowo geeshsha shiimmaadda ikkinummorono, Faarso 145:18, 19 togo yitanno: “Kaaliiqi woshshidhannosirira, woy taxidhe woshshidhannorira baalaho mule no. Ayirrissannosirira hasiisannonsare baala aannonsa; raarensa macciishshe gatisannonsa.” Addanko dhagge ikkitanno elto noonke! Woꞌmankare Dandaanno Kalaqaanchi Yihowa, ninkewa gamba yaanna  huuccattonke macciishsha hasiꞌranno. Ee, huuccatto Yihowa ninke mittu mittunkura uyinonkete baxxitino eltooti.

² Ikkollana Yihowa huuccattonke macciishshannohu isi hasiꞌranno garinni huucciꞌnummoro callaati. Hatto assa dandiineemmohu ma garinniiti? Hanni Qullaawu Maxaafi huuccattote daafira yaannore laꞌno.

3. Yihowa huucciꞌra hasiissannohehu mayiraati?

³ Yihowa iso huucciꞌrattora woy hasaawisattosira hasiꞌranno. Tenne mayinni anfeemmo? Filiphisiyusi Sokka 4:6, 7 nabbawi. Hanni konni koyishshi daafira hedi. Kalqete alame Kalaqaanchi ninke daafira lowo geeshsha hedanno; qoleno giddonketa fushshine hasaaphinammoranna qarranke isira kuꞌlinammora hasiꞌranno.

4. Ganyite Yihowa huucciꞌrakki isi ledo noohe jaaloomi lexxanno gede assitannohu hiittoonniiti?

⁴ Huuccatto Yihowara muli jaalla ikkineemmo gede kaaꞌlitannonke.  Jaalla mimmitoho hedonsa, huluullisinonsare, hattono godowinsata fushshite ganyite hasaabbu kiiro jaaloominsa lexxanni haꞌranno. Yihowa huucciꞌrano tennera kaaꞌlitanno. Isi Qullaawu Maxaafi widoonni giddiidi hedosi kulinonke; qoleno albillitte assannore anfeemmo gedeno assino. Woꞌmanka wote iso huucciꞌranna giddokkita fushshite isira hasaapha dandaatto. Hatto assitto kiiro, Yihowa ledo noohe jaaloomi roore lexxanni haꞌranno.—Yaiqoobi 4:8.

5. Yihowa baalanta huuccatto macciishshannokkita mayinni anfeemmo?

⁵ Yihowa baalanta huuccatto macciishshannoni? Dimacciishshanno. Masaalaanchu Isayaasi waro Yihowa Israeele togo yiino: “Angaꞌne mundeetenni karsantinota ikkitinohura, aye geeshshano huuccidhineenna dimacciishsheemmoꞌne.” (Isayaasi 1:15) Konni daafira, qoropha hoongummoro, Yihowa giwannore assinammora dandiineemmo; tini qolte isi huuccattonke macciishsha giwanno gede assitanno.

6. Ammana lowo geeshsha hasiissannohu mayiraati? Ammana nooheta leellisha dandaattohu hiittoonniiti?

 ⁶ Yihowa huuccattonke macciishshara hasiꞌneemmoha ikkiro, ammana noonkere ikka hasiissannonke. (Maarqoosi 11:24) Soqqamaasinchu Phaawuloosi togo yiino: “Ammaꞌna nookkiha Magano hagiirsiinsara didandiinanni; mayira yiniro, Maganunniwa shiqqi yaanno manchi Maganu nootanna iso hasiꞌranno mannirano baꞌraaꞌra aannota ammana hasiissannosi.” (Ibiraawoota 11:6) Anera ammana nooe yaa calla kayinni diꞌꞌikkitanno. Ammana noonketa leellishate barru baala Yihowara hajajama hasiissannonke.—Yaiqoobi 2:17 nabbawi.

7. (a) Yihowa huucciꞌneemmo wote shooshaqoota ikkanna iso ayirrinyunni coyishiisha hasiissannonkehu mayiraati? (b) Godowinta huucciꞌnanni heeꞌnoommota leellisha dandiineemmohu hiittoonniiti?

⁷ Yihowa huucciꞌneemmo wote, shooshaqoota ikkanna iso ayirrinyunni hasaawisa hasiissannonke. Mayira? Moote woy pirezidaanticha coyishiinsheemmoha ikkiro, ayirrinyunni coyishiinsheemmoti egennantinote. Yihowa Woꞌmankare Dandaanno Maganooti; ikkina iso coyishiinsheemmo wote iso ayirrisanna shooshaqoota ikka roore dihasiissannonke? (Kalaqama 17:1; Faarso 138:6) Qoleno Yihowa huucciꞌneemmo wote yinoommota calla yaantenni wodaninke hedo kulle godowinta huucciꞌra hasiissannonke.—Maatewoosi 6:7, 8.

8. Yihowa mitto coye huucciꞌneemmo wote wolere maa assa hasiissannonke?

⁸ Hakkiinni saeno, mitto coye huucciꞌneemmo wote, huucciꞌnoommore afiꞌrate dandiinummore baala assa hasiissannonke. Lawishshaho, Yihowa barru sagale aannonke gede huucciꞌnummoro, ceeꞌma agurre looso loosa hasiissannonke ikkinnina baalankare Yihowa aannonkena yine anga xaaxiꞌne ofolla dihasiissannonke. Looso minshummokki afiꞌnummo looso jawaante loosa hasiissannonke. (Maatewoosi 6:11; 2 Teselonqe 3:10) Woy Yihowa busha coye assa agurreemmo gede kaaꞌlankera huucciꞌnummoro, fonqolu  giddora eessannonke coyi baalunkuwiinni xeertiꞌra hasiissannonke. (Qolasiyaasi Sokka 3:5) Tenne hanni huuccattote daafira xaꞌminannita mite rosantino xaꞌmuwa laꞌno.

9. Huucciꞌra hasiissannonkehu ayeti? Yohaannisi 14:6 huuccattote daafira maa kultannonke?

⁹ Huucciꞌra hasiissannonkehu ayeti? Yesuusi rosaanosi ‘gordoho heeꞌranno Annanke’ huuccidhanno gede rosiisino. (Maatewoosi 6:9) Isi togono yiino: “Doogono, halaaluno, heeshshono aneeti. Ane widoonni ikka hoogiro, ayino Anniꞌyawa daannohu dino.” (Yohaannisi 14:6) Konni daafira huucciꞌra hasiissannonkehu Yesuusi widoonni Yihowa callaati. Yesuusi widoonni huucciꞌrate yaa mayyaate? Yihowa huuccattonke macciishshanno gede, isi Yesuusira uyinoha baxxinoha loosu qeecha ayirrisa hasiissannonke. Albaanni ronsummonte gede, Yesuusi uullara dayinohu ninke cubbunninna reyotenni gatisaraati. (Yohaannisi 3:16; Roomu Sokka 5:12) Yihowa Yesuusa Kakkalaanote Biilonna Yoo Yaannoha asseno shoomino.—Yohaannisi 5:22; Ibiraawoota 6:20.

10. Huucciꞌra hasiissannonkehu guluphine callaati? Xawisi.

¹⁰ Huucciꞌra hasiissannonkehu guluphine callaati? Deeꞌni; Yihowa iso huucciꞌneemmo wote gulupha, ofolla, woy uurra hasiissannoꞌne yee bade dikulino. Qullaawu Maxaafi Yihowa ayirrinyunni coyishiinshummo geeshsha ikkine huucciꞌneemmo gari qarra abbannokkita xawisanno. (1 Duduwo 17:16; Nehimiya 8:6; Daanieeli 6:10; Maarqoosi 11:25) Yihowa roore laꞌꞌannohu ikkine huucciꞌneemmo gara ikkikkinni iso ayirrinyunni coyishiishankenna godowinta huucciꞌrankeeti. Afuunni coyiꞌne woy wodaninkenni huucciꞌra dandiineemmo; qoleno aye bayichono heeꞌne woy hashshano ikko barra hasiꞌnummo saatera huucciꞌra dandiineemmo. Huucciꞌneemmo wote  mannu macciishshinokkiha ikkiro nafa, Yihowa macciishshannonketa addaxxa dandiineemmo.—Nehimiya 2:1-6.

11. Yihowa huucciꞌra dandiineemmoti mite coyibba hiikkuriiti?

¹¹ Mayi daafira huucciꞌra dandiineemmo? Yihowa fajjo ledo sumuu yaannore baalankare huucciꞌra dandiineemmo. Qullaawu Maxaafi togo yaanno: “Isi hedino garinni huucciꞌneemmore baala macciishshannonke.” (1 Yohaannisi 5:14) Meessi hajo daafira huucciꞌra dandiineemmo? Ee, dandiineemmo. Yihowa huucciꞌneemmo wote muli jaalanke hasaawinseemmohu gede ikka hasiissannonke. Yihowara wodaninkenna surrenke giddo noore baalankare kula dandiineemmo. (Faarso 62:8) Gara ikkinore assate kaaꞌlannonke gede wolqaataamo qullaawa ayyaanasi aankera huucciꞌra dandiineemmo. (Luqaasi 11:13) Qoleno danchare doodhineemmo gede kaaꞌlitannonke hayyo afiꞌrate huucciꞌra dandiineemmo, hattono qarra dandiine saꞌꞌate jawaante afiꞌneemmo gede huucciꞌra dandiineemmo. (Yaiqoobi 1:5) Yihowa cubbonke gatona yaannonke gede huucciꞌra hasiissannonke. (Efesooni Sokka 1:3, 7) Hakkiinni saeno, mininke mannirano ikko songote giddo noo roduuwira huucca hasiissannonke.—Soqqamaasinete Looso 12:5; Qolasiyaasi Sokka 4:12.

12. Huuccattonke giddo balaxisiisa hasiissannonkeri maati?

¹² Huucciꞌneemmo wote balaxisiisa hasiissannonkeri maati? Yihowaatinna isi fajjooti. Iso assinonke coyi baalunkura giddonkenni galaxxa hasiissannonke. (1 Duduwo 29:10-13) Yesuusi uullate aana noo waro rosaanosira huuccidhanno gara rosiisino; hatti huuccatto huucciꞌneemmo wote balaxisiisa hasiissannonkere leellishshannote. (Maatewoosi 6:9-13 nabbawi.) Isi insa balaxxe Maganu suꞌmi qullaawa ikkara woy ayirrara huuccidhanno gede rosiisino. Hakkiinni Maganu Mangiste daggaranna Yihowa fajjo uulla woꞌmate aana ikkitara huucciꞌneemmo gede rosiisino. Yesuusi rosiisino garinni, meessi hajo daafira huucciꞌra hasiissannonkehu tenne lowo geeshsha hasiissanno coyibba daafira huucciꞌnummo gedensaanniiti. Huuccattonke giddo Yihowanna  fajjosi balaxisiinseemmoha ikkiro, roorsine laꞌneemmo coyi maatiro leellinshanni heeꞌnoommo.

13. Mageeshshi yanna huucciꞌra hasiissannonke?

¹³ Mageeshshi yanna huucciꞌra hasiissannonke? Qullaawu Maxaafi bade dikulanno. Huuccattonke hasiisannonke coyi garinni harancho woy seeda ikkitara dandiitanno. Lawishshaho, sagalete yannara harancho huuccatto assiꞌnammora, Yihowa galanteemmo wote woy dhiwinonke coye isira hasaaphineemmo wote kayinni seeda huuccatto  assiꞌnammora dandiineemmo. (1 Saamueeli 1:12, 15) Yesuusi waro heeꞌrinohu mitu manni gede, mannaho leellamate yine huuccattonke seedisa dihasiꞌneemmo. (Luqaasi 20:46, 47) Yihowa hattoo huuccatto dinaadanno. Isi laꞌꞌannoti wodaninkenni huucciꞌrankeeti.

14. Mamoote mamoote huucciꞌra hasiissannonke? Tini Yihowa daafira maa rosiissannonke?

¹⁴ Mamoote mamoote huucciꞌra hasiissannonke? Yihowa woꞌmanka wote huucciꞌneemmo gede koyisinonke. Qullaawu Maxaafi ‘jaante huucciꞌneemmo’ gedenna ‘agurrummokki huucciꞌneemmo’ gede amaalannonke. (Maatewoosi 26:41; Roomu Sokka 12:12; 1 Teselonqe 5:17) Yihowa duuchanka wote huuccattonke macciishshate qixxaawinoho. Baxillisiranna shaqqillisira iso barru baala galata dandiineemmo. Qoleno biddishsha, jawaantenna shesho aannonke gede huucciꞌra dandiineemmo. Yihowa huucciꞌrate eltonke addinta  naandeemmoha ikkiro, afiꞌnummo faro baalantenni iso hasaawinseemmo.

15. Huuccattote jeefora “hamiiꞌni” yaa hasiissannonkehu mayiraati?

¹⁵ Huuccattote jeefora “hamiiꞌni” yaa hasiissannonkehu mayiraati? “Hamiiꞌni” yaa “addinta” woy “ikkona” yaate. “Hamiiꞌni” yineemmohu, huuccattonke giddo coyiꞌnoommore addanka woy godowinta yinoommota leellishateeti. (Faarso 41:13) Qoleno Qullaawu Maxaafi wolu manni huuccatto assiro hatte huuccattora coyiꞌrino hedora sumuu yinoommota leellishate, coyiꞌne woy wodaninkenni “hamiiꞌni” yaa hasiissannota kulanno.—1 Duduwo 16:36; 1 Qorontoosi 14:16.

16. Yihowa addinta huuccatto macciishshe qolanno? Xawisi.

¹⁶ Yihowa addinta huuccattonke macciishshe qolanno? Ee, qolanno. Qullaawu Maxaafi isi ‘huuccatto macciishshanno Magano’ ikkinota kulanno. (Faarso 65:2, 3) Yihowa lowo miliyoone ikkanno manni huucciꞌranno huuccatto macciishshe qolanno; isi konne assannohu duucha doogonniiti.

17. Yihowa huuccattonkera dawaro qolate sokkaasinenna uullate aana noo soqqamaasinesi horoonsiꞌrannohu hiittoonniiti?

¹⁷ Yihowa huuccattonkera dawaro qolate sokkaasinenna uullate aana noo soqqamaasinesi horoonsiꞌranno. (Ibiraawoota 1:13, 14) Qullaawu Maxaafi yaannore huwata dandaanno gede kaaꞌlo afiꞌrate huuccatto assiꞌre kae, mulenni Yihowa Farciꞌraasine ledo xaadinohu lowo manni no. Qullaawu Maxaafi sokkaasine “dancha duduwo” uulla woꞌmate aana sabbakate loosira kaaꞌlitannonketa kulanno. (Yohaannisi Ajuuja 14:6 nabbawi.) Qoleno, ninke giddo batinyu roduuwi noonsa qarra woy hasiisannonsare kulte Yihowa huuccidhu gedensaanni, hasiissannonsa kaaꞌlo ammanate roduuwinsawiinni afidhino.—Lawishsha 12:25; Yaiqoobi 2:16.

18. Yihowa huuccattonkera dawaro qolate qullaawa ayyaanasinna Qullaawa Maxaafa horoonsiꞌrannohu hiittoonniiti?

 ¹⁸ Yihowa huuccattonkera dawaro qolate qullaawa ayyaanasino horoonsiꞌranno. Isi iillinonke qarra qeelleemmo gede kaaꞌlankera huucciꞌnummoro, ninkera biddishshanna jawaante aate qullaawa ayyaanasi horoonsiꞌrara dandaanno. (2 Qorontoosi 4:7) Yihowa huuccattonkera dawaro qolatenna gara ikkinore doodhineemmo gede kaaꞌlate Qullaawa Maxaafano horoonsiꞌranno. Qullaawa Maxaafa nabbambeemmo wote, ninkera kaaꞌlanno qummeeshsha afiꞌnammora dandiineemmo. Hakkiinni saeno, Yihowa mittu rodii gambooshshu yannara ninkera kaaꞌlitanno hedo coyiꞌranno gede woy mittu songote cimeessi Qullaawu Maxaafinni hasiissannonke hedo kulannonke gede kakkayisara dandaanno.—Galatiyu Sokka 6:1.

19. Yihowa huuccattonkera dawaro qolinokkiha lawannonkehu mayira ikkara dandaanno?

¹⁹ Mito wote, ‘Yihowa huuccattoꞌyara dawaro qolikki kageeshsha sammi yiinohu mayiraati?’ yine hendammora dandiineemmo. Huuccattonkera dawaro qolanno yannanna qolanno gara afinohu iso ikkinota qaagi. Isi hasiisannonkeri maatiro afino. Huucciꞌnoommo coye addinta hasiꞌnoommotanna Yihowa addinta ammanneemmota leellishate, agurrummokki huucciꞌra hasiissannonke woti no. (Luqaasi 11:5-10) Yihowa mito wote huuccattonkera hendoommokki garinni dawaro qolara dandaanno. Lawishshaho, qarrisinonke coye kulle huucciꞌnoommoha ikkara dandaanno; isi kayinni hakkonne qarra hoola agure kaajjine uurrate kaaꞌlitannonke jawaante aankera dandaanno.—Isayaasi 40:28, 29 nabbawi.

20. Yihowa ganyine huucciꞌra hasiissannonkehu mayiraati?

²⁰ Addanko Yihowa huucciꞌra dandaanke kaajja eltooti! Isi huuccattonke macciishshannota addaxxa dandiineemmo. (Faarso 145:18) Qoleno ganyine giddonkenni Yihowa huucciꞌnummo kiiro, isi ledo noonke jaaloomi roore lexxanni haꞌranno.