1. Magano halaalunni magansiꞌneemmo gara kulannonkehu ayeti?

 ROORE ammaꞌno Maganu daafira halaale rosiinseemmo yitanno. Ikkirono kuni ikkannokkireeti; mayira yiniro, addi addi ammaꞌno Maganu ewelumma daafiranna iso magansiꞌnanni gara rosiissanno rosi lowo geeshsha babbaxxinoho. Magano halaalunni magansiꞌnanni gara afa dandiineemmohu hiittoonniiti? Magansiꞌneemmosi gara kula dandaannohu Yihowa callaati.

2. Magano halaalunni magansiꞌnanni gara afa dandiineemmohu hiittoonniiti?

² Yihowa iso halaalunni magansiꞌneemmo gara ronseemmo gede Qullaawa Maxaafa uyinonke. Konni daafira Qullaawa Maxaafa xiinxalli; Yihowa ate daafira hedannohura rosiisannohe roso huwatanna harunsa dandaatto gede kaaꞌlannohe.—Isayaasi 48:17.

3. Maganu maa assinammora hasiꞌranno?

³ Mitu manni baalanti ammaꞌno Magano hagiirsiissanno yaanno; Yesuusi kayinni hatto yee dirosiisino. Isi togo yiino: “‘Mootichaꞌya! Mootichaꞌya!’ yaannoehu baalu gordu Gashshoote dieanno. Gordu Gashshoote eannohu Anniꞌya yiinore [woy, fajjo] wonshannoho.” Konni daafira Maganu fajjo maatiro rosanna wonsha hasiissannonke. Kuni mulluri gede assine laꞌnannire diꞌꞌikkino; mayira yiniro, Yesuusi Maganoho hajajamannokki manni finqilu woy ‘bunshe assanno’ manniwiinni bande laꞌnanniha ikkinokkita coyiꞌrino.—Maatewoosi 7:21-23.

4. Yesuusi, Maganu fajjo wonshate daafira mayyiino?

⁴ Yesuusi, Maganu fajjo assa woꞌma wote shota ikkitannokkita  coyiꞌrino. Isi togo yiino: “Ruukkashsho waalcho higgine eꞌe! Baote widira massanno waalchi halaꞌladoho. Doogono halaꞌladote; hakkaanni higge eꞌannorino batinyeho. Heeshshote widira massanno waalchi ruukkashshoho; doogono gurchote [woy, shaaladote]; ise afiꞌranno manni kiiro shiimaho.” (Maatewoosi 7:13, 14) Shaalado doogo woy addu ammaꞌno hegere heeshshowa massitanno. Halaꞌlado doogo woy kaphu ammaꞌno kayinni reyote widira massitanno. Yihowa kayinni mittu manchino baꞌꞌara dihasiꞌranno. Isi mittu mittunku manchira isire rosanno gede faro fanino.—2 Pheexiroosi 3:9.

5. Magano halaalunni magansidhannore badde afa dandaattohu hiittoonniiti?

⁵ Yesuusi, Magano halaalunni magansidhannore bande afa dandiineemmota coyiꞌrino. Afa dandiineemmohu ammantannorenna assitannore laꞌneeti. Yesuusi togo yiino: “Insa baddine affinannihu guminsanniiti.” Ledeno togo yiino: “Dancha haqqicho baala dancha laalo laaltanno.” (Maatewoosi 7:16, 17) Hatto yaa Magano magansidhannori disodhannoreeti yaa diꞌꞌikkitino. Ikkirono Maganu soqqamaasine woꞌmanka wote gara ikkinore assate sharrantanno. Aanchine Magano halaalunni magansidhannore bade afate kaaꞌlannonkeri maatiro laꞌneemmo.

6, 7. Magano halaalunni magansidhannori Qullaawu Maxaafi aana xintamino roso rosiissannohu mayiraati? Yesuusi assinorinni maa ronseemmo?

⁶ Rosiinseemmo rosi Qullaawu Maxaafi aana xintaminoha ikka hasiissannosi. Qullaawu Maxaafi togo yaanno: “Qullaawa Borro baala Maganunnihu Qullaawu Ayyaani kulanna borreessinoonnite. Tini borro halaale rosiisate, sodhinore seejjate, soꞌro hoolatenna halaalaancho heeshshora ikkanno biddishsha aate kaaꞌlitanno. Qolteno, Maganu manchi guuta ikkano gedenna dancha coye assate qixxaawinoha ikkanno gede kaaꞌlitanno.” (2 Ximootewoosi 3:16, 17)  Soqqamaasinchu Phaawuloosi Kiristaanaho togo yee sokka borreessino: “Maganu qaale kullummoꞌne yannara, mannu qaali gede assitine ikkikkinni, Maganu qaali gede assitine adhitinoonni. Addanko [loosannoho] Maganu qaaleeti.” (1 Teselonqe 2:13) Magano halaalunni magansidhannori rosiissanno rosi, Qaalisi yaano Qullaawu Maxaafi aana xintaminoho. Insa mannu hedo, woga woy woluri aana xintamino roso dirosiissanno.

⁷ Yesuusi rosiisino rosi baalunku Maganu Qaali aana xintaminoho. (Yohaannisi 17:17 nabbawi.) Isi duucha wote Qullaawa Borro yitannore qummi assanno. (Maatewoosi 4:4, 7, 10) Halaalunni Maganoho soqqantannorino isi lawishsha harunsite Qullaawu Maxaafi aana calla xintamino roso rosiissanno.

8. Yesuusi, Yihowa magansiꞌrate daafira mayyee rosiisino?

⁸ Yihowa calla magansiꞌra hasiissannonke. Faarso 83:18 (NW) togo yitanno: “Suꞌmakki Yihowa yinannihu ati callu uulla woꞌmate aana Woꞌmunkura Aliidiha ikkoottota mannu afona.” Yesuusi mannu halaalaanchu Magani ayetiro bade afara hasiꞌrino; qoleno mannaho Maganu suꞌma kulino. (Ibiraawoota 2:12 nabbawi.) Yesuusi togo yiino: “Mootichu Maganikkira kumbuuli; iso calla magansiꞌri!” (Maatewoosi 4:10) Konnira ninkeno Maganu soqqamaasine ikkinoommohura, Yesuusi faale haꞌneemmo. Yihowa calla magansiꞌneemmo, suꞌmasi woshshineemmo, qoleno suꞌmasinna albillitte assannonkere mannaho rosiinseemmo.

9, 10. Mimmito banxeemmota leellinsheemmohu hiittoonniiti?

⁹ Mimmito godowinta baxa hasiissannonke. Yesuusi rosaanosi mimmito baxxanno gede rosiisino. (Yohaannisi 13:35 nabbawi.) Heeꞌneemmo gobbanna budinke baxihano ikkiro, dureeyye woy buxaneno ikkino, mereeronke babbadooshshu dino. Mimmito banxeemmo daafira roduuwu mereero heedhanno mittimma noonke. (Qolasiyaasi Sokka 3: 14) Konni daafira olaho gaande manna dishineemmo. Qullaawu Maxaafi togo yaanno: “Maganu oosonna Daawuloosi ooso bande anfannihu [konninniiti]; keeraanchimma assannokkihunna rodoosi baxannokkihu baalu Maganu ila diꞌꞌikkino.” Qoleno togo yaanno: “Mimmitinke ledo baxammo. . . . Bushunniha ikkinohu Qaayeeli rodoosi shiino; ninke hattoore ikkinoonke.”—1 Yohaannisi 3:10-12; 4:20, 21.

¹⁰ Yannanke, wolqankenna miinjanke horoonsiꞌne mimmito kaaꞌlineemmo hattono jawaachinsheemmo. (Ibiraawoota 10:24, 25) ‘Manna baalaho dancha coye assineemmo.’—Galatiyu Sokka 6:10.

11. Yesuusira hajajama hasiissannonkehu mayiraati?

¹¹ Gato afiꞌnannihu Yesuusi widoonni calla ikkinota ammana hasiissannonke. Qullaawu Maxaafi togo yaanno: “Gato wolewa ayewano dino. Gatote hasiisannonkehu mannaho uyinoonni suꞌmi gordoho woroonni wolu dino.” (Soqqamaasinete Looso 4:12) Konni maxaafira Fooliishsho 5te, Yihowa hajajamanno mannira heeshshosi wodo asse aanno gede Yesuusa soyinota ronsoommo. (Maatewoosi 20:28) Yihowa, Yesuusa uulla gashshanno gede shoomino. Qullaawu Maxaafi hegerera heeꞌra hasiꞌnummoro Yesuusira hajajama hasiissannonketa kulannohu iseraati.—Yohaannisi 3:36 nabbawi.

12. Poletiku coyira anga wodhineemmokkihu mayiraati?

¹² Poletiku coyira anga wodha dihasiissannonke. Yesuusi poletiku coyira dikarsamino. Isi yoote shiqinshoonniwa heeꞌre Roomu gashshaanchira Philaaxoosira, “Ane gashshooti tenne gobbaha diꞌikkino” yiino. (Yohaannisi 18:36 nabbawi.) Yesuusi gede ninkeno Maganunnite iimi Mangistera ammanammoommoreeti; konni daafira heeꞌneemmo gobba baxxutano ikkituro poletiku coyira anga diwodhineemmo. Ikkollana Qullaawu Maxaafi “aleenni noo gashshaanora” yaano uullate gashshootira hajajamme  yaannonke. (Roomu Sokka 13:1) Heeꞌneemmo gobba higge ayirrinseemmo. Kayinni uullate gashshooti fushshino higge Maganu higge ledo sumuu yitannokkita ikkituro, soqqamaasinete faale haꞌneemmo; insa togo yitino: “Mannaho hajajamantenni Maganoho hajajama hasiissannonke.”—Soqqamaasinete Looso 5:29; Maarqoosi 12:17.

13. Maganu Mangiste daafira mayine sabbankeemmo?

¹³ Alamete aana noo qarra tirtannoti Maganu Mangiste calla ikkitinota ammanneemmo. Yesuusi “Maganu Gashshootihu Danchu Duduwi” alame woꞌmate aana sabbakamannota coyiꞌrino. (Maatewoosi 24:14 nabbawi.) Maganu Mangiste assitannonkere assa dandaannohu uullate gashshooti horo dino. (Faarso 146:3) Yesuusi Maganu Mangiste daggara huucciꞌneemmo gede rosiisanni togo yiino: “Gashshootikki dayo, hedoottori gordoho ikkinonte gede, baattote aanano ikko.” (Maatewoosi 6:10) Qullaawu Maxaafi, Maganu Mangiste uullate gashshoote baalanka hunte ‘ise calla hegerera kaajjite uurritannota’ kulanno.—Daanieeli 2:44.

14. Magano halaalunni magansidhanni noori ayeooti yite ammanatto?

¹⁴ Kageeshsha xiinxalloottore heddanni ateneeto togo yite xaꞌmi: ‘Qullaawu Maxaafi aana xintamino roso rosiissannori ayeooti? Mannaho Maganu suꞌma kultannori ayeooti? Mimmito godowinta baxxannorinna gatisannonke gede Maganu Yesuusa soyinota ammantannori ayeooti? Poletiku coyira anga wodhitannokkiri ayeooti? Qarranke tirtannoti Maganu Mangiste calla ikkitinota dudubbannori ayeooti?’ Koye yinire baalankare assitannori Yihowa Farciꞌraasine callaati.—Isayaasi 43:10-12.

15. Magansiꞌranke Magano hagiirsiissannota ikkitanno gede maa assa hasiissannonke?

¹⁵ Maganu noota ammana calla diguddanno. Agaaninte nafa Maganu noota ammantanno; ikkirono insa isira  dihajajantanno. (Yaiqoobi 2:19) Magansiꞌranke Magano hagiirsiissannota ikkitanno gede, isi noota ammana calla ikkikkinni isi yaannore assano hasiissannonke.

16. Kaphu ammaꞌnowiinni xeertiꞌra hasiissannonkehu mayiraati?

¹⁶ Magansiꞌranke Magano hagiirsiissannota ikkitanno gede, kaphu ammaꞌnowiinni xeertiꞌra hasiissannonke. Masaalaanchu Isayaasi togo yee borreessino: “Baabilooninni baxxitine fulle! . . . Giddonsanni fultine keeraaꞌme!” (Isayaasi 52:11; 2 Qorontoosi 6:17) Kaphu ammaꞌno ledo xaado afiꞌrino coyi baalunkuwiinni xeertiꞌra hasiissannonkehu iseraati.

17, 18. “Bayira Baabiloone” maati? Ise giddonni rahe fula hasiissannohu mayiraati?

¹⁷ Kaphu ammaꞌno maati? Magano Qaalisi yaannokki garinni magansiꞌnanni gede rosiissanno ammaꞌno baalanti kaphu ammaꞌnooti. Qullaawu Maxaafi kaphu ammaꞌno woꞌmanta “Bayira Baabiloone” yaanno. (Yohaannisi Ajuuja 17:5, NW) Mayira? Nohi dirihu Baote Wayi gedensaanni, batinyu kaphu ammaꞌno rosi hanafinohu Baabiloonete katamiraati. Kuni rosi alame woꞌma tuqino. Lawishshaho, hunda Baabiloonete heeꞌranno manni sase waaxo maganna magansiꞌranno. Yannankerano batinye ammaꞌno Maganu Sillaaseeti yite rosiissanno; ikkollana Qullaawu Maxaafi halaalaanchu Magani mitto Yihowa calla ikkinotanna Yesuusi Beettosi ikkinota rosiisanno. (Yohaannisi 17:3) Baabiloonete heeꞌranno manni, mannu reyanno wote reyikki gatannori giddosi no, qoleno hakkurichi fule sioolete giiramanno yeeno ammananno. Kunino kaphoho.—Jeefote Hedo 14, 17 nna 18 lai.

¹⁸ Maganu kaphu ammaꞌno baalanti muli yanna giddo baꞌanno yiino. (Yohaannisi Ajuuja 18:8) Kaphu ammaꞌno giddonni rahe fula hasiissannohu mayiraatiro leellihe? Maganu Yihowa yanna gooffukki konne assattora hasiꞌranno.—Yohaannisi Ajuuja 18:4.

19. Yihowara soqqama doodhatto wote, isi towaatannohehu hiittoonniiti?

 ¹⁹ Kaphu ammaꞌno giddonni fulte Yihowa magansiꞌrate higatto wote, mite jaallakki woy miniꞌne manni tenne doodhoottohu mayiraatiro huwata hoogaranna waadahera dandaanno. Yihowa kayinni ditugannohe. Mimmito addinta baxannohu lowo miliyoone ikkanno manni noote halaꞌlado maate miila ikkatto; qoleno Maganu abbannote haaro alamera hegerera heeꞌrate hexxo heedhannohe. (Maarqoosi 10:28-30) Yihowara soqqama doodhiteenna gibbannohe jaallakki woy maateꞌne giddo mitu, gale hosanni Qullaawa Maxaafa xiinxallannoha ikkara dandaanno.

20. Magano halaalunni magansiꞌra hasiissannohu mayiraati?

²⁰ Muli yanna giddo, Maganu bunshe baalanta hunanno; qoleno Mangistesi uulla woꞌma gashshitanno. (2 Pheexiroosi 3:9, 13) Hatti lowo geeshsha hagiirsiissanno yannaati! Hakkawote baalunku manni Yihowa isi hasiꞌranno garinni magansiꞌranno. Konni daafira assa hasiissannohere xaanni assite Magano halaalunni magansiꞌri.