Seeraaliyoonete ilaminohu Dawudda “Lophphoommohu aliyyee qoqqowira shiimu qachchiraati” yaanno. “Shiimu heeꞌreenna maateꞌyanna wole maate mereero baattote yekkeero no. Lamenti maate baatto ninkete yite yekkeerantanno. Konne coye tirate mitto kiilaancho woshshine abbini. Kuni kiilaanchi wolu manchira hincilaallo amadisiise waajjo hocco diwi. Kuni manchi hakkawoyitenni huxiꞌranna hunkaa hanafi. Hakkiinnino hincilaallo lae ‘mittu geerchi waajjo uddano uddiꞌre daanna laeemmo, hojjaameessahonna geerchoho, dananchono awuuwinoho, haꞌrannohuno ukkeeti yee maalaꞌle coyiꞌri.’

“Kuni manchi coyiꞌranni noohu ahaahiꞌyareeti! Xaggeeffate: ‘Yeemmore ammana hoogginiro amme kiꞌne umiꞌne lae!’ yii. Addaho, mereerinkenni mittuno laꞌꞌate bareedinohu dino! Kiilaanchuno qoonchunni amadinoha digintete waa, darchunni wixe konne mancho sammi assi.

“Hincilaallo laꞌꞌanni noo manchi ragaanni, ‘Ahaahiꞌya’ baatto ninkera ikkitanno gede coyiꞌri. Ahaaheꞌyara baatto mitte yaaddo nookkiha loosidhanno gede kulise. Wole maateno tenne yoonni sumuu yitu. Yekkeerono muro afidhu.”

 Togoo rosi galchimi Afrikira halaꞌladunni rosaminoho. Wolu alamete golira miliyoonetenni kiirranni manni reyino manni uullate aana noo manna laꞌꞌara, kaaꞌlara woy gawajjara dandaanno yee ammanannonte gede galchimi Afriki mannirano togoo ammaꞌna noonsa. Togoo ammaꞌna halaaleho? Addinta reyitinori heeshshote no? Ikka hoogiro reyitinore labbe shiqqannori ayeeooti? Kuriuu xaꞌmo dawaro afa lowo geeshsha hasiissannota ikkasera aleenni, reyotenna heeshshote hajooti.