Ayyaanaame kalaqama nooreeti! Ayyaanaame alame giddo danchanna busha ayyaanna no. Kayinnilla kuriuu ayyaanaame kalaqama uullate aana heedhu gedensaanni reyitinoreeti?

Deeꞌni. Batinynyu manni hedanno gede mittu manchi, meyaata ikko labbaahu reyiro wole heeshshora disoorramanno. Konne hiitto afa dandiineemmo? Korkaatuno Qullaawu Maxaafi xawisanno. Qullaawu Maxaafi halaalaanchu Magani suꞌmisi Yihowa ikkinohuwiinni dayinoha ikkinohura halaalu maxaafaati. Manna kalaqinohu Yihowa ikkinohura, reyineemmo wote makkineemmoro afinohu isooti.—Faarso 83:18; 2 Ximootewosi 3:16.

Qullaawu Maxaafi, Maganu umi mancho Addaami “bushshunni” kalaqino yaanno. (Kalaqo 2:7) Maganu Addaami Gannatete giddo kaashshu basera Edeni worinosi. Addaami Yihowa seerira hajajamoommero reyikki techcho geeshsha heeꞌra dandaanno. Ikkollana Addaami afanni heeꞌre Maganu seera sai, konnira Maganu: “Ati bushshahona, bushshunni dayottonte gede bushsha higatto” yiisi.—Kalaqo 3:19.

Togo yaa mayyaate? Yihowa Addaami bushshunni kalaqasira albaanni mamaati noohu? Mittowano dino. Ilamikki iima heeꞌranno ayyaana diꞌꞌikkino. Heeshsho noosikkiho. Konni daafiˈra Yihowa Addaami “bushsha higatto” yaasi reyatto yaasiiti. Addaami ayyaanaame alame diharino. Reyi  yannara, heeshsho noosikkiha ikkino. Reyote yaa heeshshote heeꞌra hoogate.

Wolootu reyitinorina? Insano heeshsho noonsakkire ikkitanno? Qullaawu Maxaafi dawaro:

• “Baalunku [mannunna saada] mitte base hadhanno. Baalunku bushshunni kalaqantino, baalunku bushsha higganno” yitanno.—Mekibibi 3:20.

• “Reyitinori . . . kayinni mittoreno diaffanno.”—Mekibibi 9:5.

• “Baxillinsa, giwansanna qarummansa baꞌino.”—Mekibibi 9:6.

• “Ati haꞌrattowa Sioolete [waammate], loosunna hedo eggennonna ogimma dino.”—Mekibibi 9:10.

• “[Manchu] bushshisiwa higanno hakko barranni mixosi baala baꞌanno.”—Faarso 146:4.

 Kuni qummeeshshi ammanate mitiinsannohe? Mitiinsannoheha ikkiro, konne coye wodanchi: Batinynye maatera hasiisannore shiqishannohu minaannaati, kuni manchi reyanno wote maatesi qarru aana ubbanno. Mito wote galtesinna oososi sagale hidhitanno woxe nafa hoogganno. Diinnasi maatesi gawajjitara dandiitanno. Hanni umokki togo yite xaꞌmi: ‘Kuni manchi ayyaanaame alamera heeꞌrannoha ikkiro, maatesira hasiisannore assa mayira disufanno? Maatesi bushuullu manni gawajjonni mayira diagarannno?ˈ Korkaatuno qummeeshshu yinoti halaale ikkitinohuraati. Kuni manchi heeshsho noosikkiho mittoreno diafannoho.—Faarso 115:17.

Togo yaa reyitinori galagalte heeshshote diheedhanno yaate? Deeꞌni. Kaonnire gedensaanni hasaambeemmo. Xa kayinni reyitino manni ati assitanni noottore diaffanno yaate. Laꞌahera, macciishshitahera woy coyishishshahera didandiitanno. Kaaꞌlitahera ikko gawajjitahera dandiitannnokkihura insa waajja dihasiissannohe.—Mekibibi 9:4; Isayyaasi 26:14.