Hanni tenne ikkito hedi: Barru Roowete hawarrooti. Zaruuni yinannihu 17 diri beetti mine assi yinoonnisire xaalla asse gude ofolle no; xa isi shiima geeshsha fooliishshiꞌra hasiꞌrino. Konnira televizhiine faꞌne mittu baxanno soofira ofolli.

Hakko balla annisi minira eanno; isi alba xiphi yee Zaruuni togo yii:

Ati Zaruuni ikkoottoro, togoori kalaqamannokki gede ma assatto?

Annikkinna amakki ledo hasaawa makeena kadate gedeeti. Mittu manchi makeenunni haꞌranna doogo cufantuha ikkiro, wole widoonni hige saꞌꞌa dandaanno.

 Lawishsha:

Liya yinanni beetto togo yitino: “Anniꞌya ledo hasaawa qarra ikkitannoe. Mito wote isira lowore coyiꞌrummahu gedensaanni haaro ikke ‘Mayyiitta?’ yaannoe.”

LIYARA AJAYI AJEENNA SASU DOORSHI NOOSE.

1. Annisera hanqite coyiꞌra.

   Liya “Ani dihaarimanniwe noomma!” yite hanqitara dandiitanno.

2. Annase coyishshiisha agura.

   Liya tuncu yiinose qarra annise ledo hasaawa agurtara dandiitanno.

3. Injiitanno yanna agarte tuncu yiinosere hasaawa.

   Liya gedensaanni higge annase shiqqe hasaawisa woy tuncu yiinose qarra borreessite annisera aa dandiitanno.

Liya kuri giddo hiikkonne doodhituro woyyannoha lawannohe?

TENNE HEDI: Liya anni hedosi bebbeehantino daafira qarrisinoseri noota dihuwatino. Konni daafira Doorsha A hunda kullinte gede, Liya hanqite coyidhuro, mayira hanqitanni nooro leella hoogasira dandaanno. Liya togo assituro tini annise ise yitannore macciishshanno gede diassitanno; qoleno tini ikkitose annase ayirrissannota dileellishshanno. (Efesooni Sokka 6:2) Konni daafira, kuni doorshi kaaꞌlannori dino.

Doorsha B hunda kulliri assate shota ikkara dandaanno; kayinni hatto assa hayyo diꞌꞌikkitino. Mayira? Korkaatuno Liya qarrisenni fula hasidhuro annisera hasaapha hasiissannose; anniseno ise kaaꞌlate tuncu yiinosere afa hasiissannosi. Sammi yee agura tennera dikaaꞌlitanno.

Doorsha C hunda kulliri kayinni Liya annise ledo hasaawate guficho ikkinosere hooꞌlate kaaꞌlannose. Ise hasaawate heddino hajo wole wote kayisse hasaawa dandiitanno. Qoleno, Liya qarrase kuꞌlate annisera sokka borreessituro bayichonko giddose harshammi yitara dandiitanno.

Qoleno, Liya mitiinsinosere borreessase yitara hasidhinore dancha gede assite xawisate kaaꞌlitannose. Annise ise borreessitino sokka nabbawanno wote, ise kultasira hasidhino coyinna tuncu yiinose qarri maatiro afa dandaanno. Konni daafira C Doorshi hunda noo hedo Liyano annaseno kaaꞌlitannote. Ise annase xaaddote hasaawissuro woy hedose borreessite kulturo, mannu ledo “keere heeꞌnanni” gede kultannote Qullaawu Maxaafi amaale ledo sumuu yaannore assitanni no.—Roomu Sokka 14:19.

Liya wolere ma assa dandiitannoha lawannohe?

Liya assa dandiitanno yite hedattoha mitto coye woroonni noohu fanu bayichira borreessi. Hakkiinnino tenne assase abbitara dandiitanno guma borreessi.

Ati hedde coyiꞌroottorinna annikkinna amakki hedannori babbaxxara dandaannota deꞌooti.

LAWISHSHA:

Annikki woy amakki, ‘Alba mayira kolossi yootto?’ yee xaꞌminohe yino. Ati kayinni “Agurreꞌꞌe ballo” yiitto.

Annikkiranna amakkira kayinni togo yoottoha lawansara dandaanno: “Kiꞌnera hasaapha dihasiꞌreemmo. Qarraꞌya kiꞌnera ikkikkinni jaallaꞌyara kuꞌleemmo.”

Hanni mittu qarri tuncu yeennahe annikkinna amakki kaaꞌlahera hasiꞌrino yine hendo. Ati kayinni togo yiitto: “Hakkeeshsha qarrisinore diꞌꞌikkino. Ani umiꞌya biddi assemmoreetilla.”

• Annikkiranna amakkira mayyoottoha lawansara dandaanno?

• Ma garinni qolittoro woyyannoyya?