Hanni tenne ikkito hedi: Yuuliya iseneeto hincilaallotenni laꞌanno wote duꞌmite baꞌinoha lawannose. Maatesenna jaallase ise “quxumu gede shaalootta” yituserono ise kayinni, “Shaalado ikka hasiissannoe” yite heddanno.

Muli barri kawa Yuuliya, “Ikkummata ikke lame kiilonokka shaaleemma” yite heda hanaffino. Ise tenne assate maꞌlitino mali boodu barri geeshsha hude calla hooꞌlitanni heeꞌrate . . .

Ati Yuuliya ikkoottaro ma assatta? a

Danikki daafira hedakki soꞌro diꞌꞌikkitino. Qullaawu Maxaafino xuma manna naade kulanno; insa giddo gamu Saara, Raaheeli, Abigiya, Yooseefinna Daawitiiti. Qullaawu Maxaafi Abishaagi yinanni beetto “lowo geeshsha xuma” ikkitinota kulanno.—1 Mootoolla 1:4.

Ikkollana, batinyu wedelli xummete woy danu daafira quwa sae yaadanno. Tini lowo geeshsha gawajjitansara dandiitanno. Hanni aane noore hedi:

• Mitte xiinxallo leellishshino garinni xibbunni 58 anga ikkanno seenni quwa sae duꞌminota coyiꞌrino; noore coyiꞌniro kayinni insa giddo quwa sae duꞌminori xibbunni 17 anga calla ikkanno.

• Wole xiinxallo qolte, xibbunni 45 anga ikkannohu shaaladdu meenti, quwa sae duꞌminohu gede asse hedannota leellishshino!

• Mitu wedelli duꞌmille shaashshiꞌrate yee anoreksiya yinanni dhibbinni amadamino; kuni dhibbi sagale hoole reyote geeshsha massara dandaannoho.

 Konni garinni sagale giwisannoheha ikkiro woy wolu togoo qarri nooheha ikkiro manna amaaꞌli. Togoo qarri nooheta annikkiranna amakkira woy wolu ammaꞌnattahu anja egemmino mannira kuꞌli. Qullaawu Maxaafi togo yaanno: “Jaalu woꞌmanka woyite jaalaholla; roduuno qarru barra iillanno.” —Lawishsha 17:17.

Noore coyiꞌniro, mitte beetto xumate woy dixumate yinanni gede assitannoti giddoyidi ayimmaseeti. Hanni Moote Daawiti beetti Abeseloomi lawishsha hedi. Qullaawu Maxaafi isire kulanni togo yaanno:

“Israeelete manni baalunku giddo Abeseloomi xummete egennaminoho; . . . mittore kullannire diafiꞌrino.”—2 Saamueeli 14:25.

Ikkollana, kuni aju beetti naaxxaleessaho, roorreenya hasiꞌrannohonna kaadaasinchoho. Hakko daafira Qullaawu Maxaafi Abeseloomi suꞌma danchatenni dikayisanno; Qullaawu Maxaafi isi horo ammanaminokkihanna kaajjado ikkinota kulanno.

Qullaawu Maxaafi togo yee amaalannonkehu mulla diꞌꞌikkino:

“Haaro mannimma uddidhe.”—Qolasiyaasi Sokka 3:10.

“Kiꞌne biinfilli . . . gobbayidi seesiha ikkoonke. Biinfilliꞌne . . . wodanu giddo nooha giddoyidi manninate ikkona.”—1 Pheexiroosi 3:3, 4.

Seesa soꞌro ikka hooggurono, danu xummenni roore hasiisanno coyi dancha akataati. Gale hosanni danchu akatikki, gujjo afiꞌrino woy leqexu seenninni roore mannu baxannoheta ikkatta gede assannohe! Filiisiya yinanni beetto togo yitino: “Danu xumme mannu bayichonko ille ninkewa qolanno gede assitara dandiitanno. Ikkollana mannu roore qaagannoti giddoyidi ayimmankeetinna dancha akattankeeti.”

Danakki laꞌꞌatta wote giwisannohe?

Xuma ikkate yite hinkote kuula qasiꞌrate woy sagale ita qorophate hedde egennootta?

Dandaattaha ikkoommero, aane noori giddo soorrite biddi assiꞌra hasiꞌrattari maati? (Biddi assiꞌra hasiꞌrattare malaatisi.)

• HOJJA

• DUꞌMILLE

• DANANCHO

• SANO

• ALBA

• DANA

Uminna layinki xaꞌmora ‘Ee’ yite dawaroottahanna sayikki xaꞌmora sase woy hakkiinni saino coye malaatisoottaha ikkiro, tenne hedi: Wolu manni ate, ati mishshe laꞌꞌatta garinni laꞌꞌa hoogara dandaanno. Soodote kiiro danikki daafira calla hedattaha ikkiro kayinni, quwa saꞌe yaadakki digattanno.—1 Saamueeli 16:7.