Hanni tenne ikkito hedi: Taammiru ledosi rossannori lame ooso isiwa higge dagganna laiti dibaxisiꞌrino. Insa tenne lamala giddo calla lame higge sijaara aganno gede assate woꞌnaaltino. Xa sayikkimeeshsho agi yitasiraati.

Lamunku giddo mittu iso togo yii:

Hakkiinni kiisete giddonni mitore fushshe Taammirura hiiꞌꞌi yii.

Taammiru laꞌꞌanno wote kuni beetti sijaara amade no. Tenne laita Taammirura yaannori baisi.

Ati Taammiru ikkoottoro ma assatto?

Taammiru jaalla konne coye assitanni noohu affeeti? Insa sijaara aga hanaffinohu uminsanni kaꞌeeti? Hatto ikka hoogara dandaanno. Insa tenne assate kaꞌinohu wolu manni xixxiiweennansa ikkara dandaanno. Insa darawonsa baxxannonsa gede assiꞌrate yite darawonsa assituta assate kaꞌino.

Togoo coyi atera tuncu yiihero, darawokki yitannohere agurte gara ikkinore assa dandaattohu hiittoonniiti?

1. BALAXXE HEDI

   Qullaawu Maxaafi togo yaanno: “Egennaamu manchi bushare afiro maaxamanno; hawanyu [woy, gowwu] eꞌꞌe qarramanno.”—Lawishsha 22:3.

   Tuncu yaannohe coye roore wote balaxxe heda dandaatto. Lawishshaho rosu mine ledokki rossanno ooso sijaara agganni atewa higge dagganna laitto yino. Qarrissahera dandiitannota balaxxe hedakki, tuncu yaannohe fonqolira qixxaawatto gede kaaꞌlitannohe.

2. XEERTISSE HEDI

   Qullaawu Maxaafi togo yaanno: “Danchu tiiꞌꞌi heeꞌroꞌne.”—1 Pheexiroosi 3:16.

   Ateneeto togo yite xaꞌmi: ‘Darawoꞌya hoode haꞌre insa assitannore assummoro albillitte gaabbo amaddaekka?’ Darawokki ikkituta ikka yannate geeshsha insa baxxannohe gede assitara dandiitanno. Kayinni tini albillitte gaabbote uwatto gede assitahe ikka? Ledokki rossanno ooso hagiirsiisate yite ayimmakki huꞌna hasiꞌrattoni?—Fulo 23:2.

3. MAA ASSATTORO DOODHI

   Qullaawu Maxaafi togo yaanno: “Egennaamu manchi bunshe seekke qorophanno.”—Lawishsha 14:16.

   Barrunni mitto barra, ninke baalunku uminke doorsha doodhankenna doodhinoommo doorshi abbanno guma mixxanke digattanno. Qullaawu Maxaafi lowo manni, lawishshaho Yooseefi, Iyyoobinna Yesuusi dancha doorsha doodhitinota kulannonke. Qoleno Qaayeeli, Eesawunna Yihuda gara ikkinokkire assitinota kulanno. Atina maa doodhatto?

Qullaawu Maxaafi, “Dancha coye assi” yaanno. (Faarso 37:3) Doodhatto coyi abbanno guma balaxxe hedde wodanakki mitto assiꞌrakki, hedokki darawokkira kula shota ikkitannohe gede assitanno; qoleno tenne assakki kiissannohe.

Darawoꞌyara lowore coyiꞌra hasiissannoe yite yaaddooti. DIHASIꞌREEMMO yite kaajjishshe coyiꞌra calla ikkitara dandiitanno. Woy hedokki soorrattokkita leellishate togo yaa dandaatto:

• “Beebba daafurtooti!”

• “Ani togoore dikisiꞌreemmowe!”

• “Togoore asseemmokkita affanni heedhenni!”

Qaru coyi hobbi ruxxi yinikki ranke qolate. Hatto assittoro, darawokki bayichonko saalfatte agurtanno gari ateranni dhagge ikkahera dandaanno!

Miteekkite darawokki mishshuhella? Lawishshaho, “Agittoro ma ikkatto? Ada ati mulla waajjaleessaatilla?” yituhero ma assatto? Hatto yaansa ate gara ikkinokkire assatto gede xixxiiwate murcidhe kaꞌinota leellishshanno. Ati tennera ma assa dandaatto? Ajayi ajeenna lamu doorshi noohe.

• Insa balalsite saꞌꞌa dandaatto. (Lawishshaho, “Ee waajjoommo!” yite sijaara aga waajjatto korkaata haransite kuli.)

• Insa uminsa sodhinota leellisha. Sijaara agattokkihu mayiraatiro kulte kaꞌe, insa heddanno gede assannore coyiꞌri. (Lawishshaho, “Ani ageemmota agurina kiꞌne agaꞌne umise dhagge ikkitinoe!”)

Darawokki ate qacifata woy misha agura gibburo, insawiinni agurte haꞌri! Insa ledo keeshshitto kiiro, gara ikkinokkire assatto gede roore xixxiibbannoheta deꞌooti. Insawiinni agurte haꞌrakki, darawokki ayimmakki soorritara hasiꞌrattokkita leellishshanno.

Noore coyiꞌniro, darawokki bunshete widira xixxiibbannoheta maaxante gata didandaatto. Kayinni assa hasiꞌrattore doodha, hedokki kaajjishshe kulanna gargadha dandaatto. Insa aye geeshshano xixxiibbuhero assattore doodhattohu ateeti!—Iyyaasu 24:15.