Hanni tenne ikkito hedi: Addunyi rosu mine jaallasi ledo kaase godoꞌlanni heeꞌreenna kaase rosu mini hincilaallo gante hiiqqitu.

Ati Addunya ikkoottoro ma assatto?

SASU DOORSHI NOOHE:

1. Xooqe baꞌꞌa.

2. Wole rosaanora wora.

3. Rosu mini murrichira kulte woxe kaffala.

A Doorshi hunda kulloonnire assate hedattoha ikkara dandaanno. Kayinni aleenni qummi assini soꞌro woy wole soꞌro loosittorono, soꞌrokki ammanatto gede assannohehu gari korkaati no.

1. Soꞌro ammana gara ikkino coyeeti.

   Qullaawu Maxaafi togo yaanno: “Woꞌmante yannara dancha coye assate [halchineemmo].”—Ibiraawoota 13:18.

2. Mannu roore wote, loosino soꞌro maaxannokki mannira gatona yaanno.

   Qullaawu Maxaafi togo yaanno: “Cubbosi maaxannohu dilatanno; aagintaawannohunna [woy, kulannohunna] agurannohu kayinni maaro afiꞌranno.”—Lawishsha 28:13.

3. Baalunku coyinni roore, soꞌro ammana Magano hagiirsiissanno.

   Qullaawu Maxaafi togo yaanno: “Kaaliiqi busha assitannore giwanno. Suwashshu wodanirira kayinni wodanisire kulanno.”—Lawishsha 3:32.

Kariina yinanniti 20 diri beetto, makeena quwa sayisse kaddeenna tiraafiike woxe mursiisse woraqata uyitinose; ise tenne annise afannokki gede assate woꞌnaaltino. Kayinni kuni coyi maaxame digatino. Kariina togo yitino: “Mittu diri gedensaanni, anniꞌya tiraafiike woxe mursiissinoeha aanaho ane suꞌmi noo woraqata afi. Tini lowo qarri giddora eessitinoe!”

Kariina tennenni ma rossuyya? Ise togo yitino: “Loonsoonni soꞌro maaxa coye roore huntanno ikkinnina kaaꞌlitannori dino. Galte hosse loonsoonni soꞌro amaddanno!”

Qullaawu Maxaafi togo yaanno: “Ninke baalunku woꞌmanka woyite soꞌneemmo.” (Yaiqoobi 3:2) Aleenni laꞌnummonte gede loosootto soꞌro hakka wontenni ammananna kula, umokki heeshshi assattoha ikkoottotanna gikki yoottota leellishshanno.

Hakkiinni aanchite, loosootto soꞌronni roso afiꞌra dandaatto. Veera yinanni beetto togo yitino: “Looseemmata mitte mittenta soꞌro roso afiꞌrate kaaꞌlannoeri gede asse laeemma; tini roore dancha ikkate kaaꞌlitannoe; qoleno wole yannara hattoo soꞌro loosa hoogate woꞌnaaleemma.” Hanni atino hatto assa dandaatto gara laꞌno.

Annikki saate haadhe wodhite heedheenna maasaru taino yine hendo. Tennera ma assatto?

• Anniꞌya ayi assinoro diafannona yite cuqqi curuqqi yiittokkinni agura.

• Annikkira saatesi ati tayisoottota kula.

• Ikkinore kulte kaꞌe woleho wora.

Xiinxallittokki gatootto daafira rosu mine fonqoloho uwootto yine hendo. Tennera ma assatto?

• Fonqolu kabbaadete yaa.

• Uwoottohu xiinxalloottokkihura ikkinota ammana.

• Fonqoloho uwoottohu rosiisaanchu ate baxannohekkihura ikkinohu gede assite kula.

 Hanni aleenni qummi assini ikkituwa galagalte hedi; hakkiinni ateneeto (1) annikkinna (2) rosiisaanchikki bayicho worte hedi. Loosootto soꞌro hakka wontenni kulittoro annikkinna rosiisaanchikki ate daafira mayite heddanno? Loosootto soꞌro maaxittoro insa ate daafira mayite heddanno?

Hanni saihu mittu diri giddo loosoottota mitte soꞌro hedi; hakkiinni aante noo xaꞌmuwara dawaro qolate woꞌnaali.

Loosootto soꞌro maati? Hatte yannara ma assitto?

• Maaxe aguroommo.

• Wolu mannira woroommo.

• Hakka wontenni kuloommo.

Soꞌrokki maaxxe aguroottoha ikkiro, hakkuyi gedensaanni mayi macciishshamihe?

• Soꞌroꞌya anfikki saoommo daafira hagiidhoommo!

• Mayi kulella aguro yee gaabboommo.

Hakku coyi tuncu yiihe yannara ma assoottoro woyyannohu baino?

Loosootto soꞌronni ma rositto?

Mitu manni loosino soꞌro maaxannohu mayiraati?

Soꞌro loositto kiiro maaxate woꞌnaalattoha ikkiro mannu ate hiittooho yee hedanno? Loosootto soꞌro kulattoha ikkiro kayinni mannu ate daafira mayyee hedanno?—Luqaasi 16:10.