XAꞌMO 9
Suutu Soorro Ammana Hasiissannoe?
ATE IKKOOTTORO MA ASSATTO?
Hanni tenne ikkito hedi: Alamaayyora coyi gurchaawinosi. Isi Maganu nootanna kalaqama baala Isi kalaqinota ammananno. Techo kayinni bayolojete rosiisaanchi suutu soorro halaalenna sayinsetenni buunxoonnire ikkitinota seekke rosiisino. Alamaayyo gowwaho yinasira dihasiꞌrino. Konnira, ‘Sayinsete egennaammi suutu soorro halaaleho yituna, insa yitinota huluullamate geeshsha ane mayi iillishie?’ yee heda hanafino.
Ati Alamaayyo ikkoottoro, rosu mini maxaaffa suutu soorro halaaleho yitino daafira calla ammanatto?
WODANAAꞌMITE HEDI!
Mannu duucha wote, mittu coyi addaho yee ammanannohu mayiraatiro hedikkinni, mayyee ammanannoro coyiꞌrate muddamanno.
-
Mitu manni Kalaqaanchu no yee ammanannohu beetekiristaanete hatto yine rosiinsoonni daafira callaati.
-
Mitu manni qole suutu soorro ammanannohu rosu mine hatto yine rosiinsanninsa daafira callaati.
Heda Hasiissannota Lee Xaꞌmo
Qullaawu Maxaafi togo yaanno: “Baalunku mini [mininoha] afiꞌrino. Baalankare loosinohu kayinni Maganoho.” (Ibiraawoota 3:4) Hatto yee ammana garaho?
Heeshsho afiꞌrinore kalaqino Kalaqaanchi dino yaa, kuni mini mininohu nookkiha umisinni minaminoho yaate gedeeti
MANNU YAANNORE: Kalqete alame giddo noori baalu dayinohu mittu jawurichi dhooheennaati.
1. 1 Kuni jawurichi dhoohanno gede assinohu ayeti woy maati?
2. Roore gara labbannoti baalunkuri hedeweelcho dayinoho yee hedatenso, baalanka coye kalaqinohu no yee ammanate?
MANNU YAANNORE: Saada sunu sununni soorrante manna ikkitino.
3. Saada, lawishshaho galashshu sunu sununni soorrame manna ikkinoha ikkiro, mannunna galashshu hedanno gari togo iiminna uulla geeshsha babbaxxinohu mayiraatiyya?
4. “Shiimmaaddu” kalaqami nafa togo xurqa ikkinohu mayiraati?
MANNU YAANNORE: Suutu soorro taje nooreeti.
5. Hatto yee coyiꞌranno manchi togo yaannohu umisinni buuxeeti?
6. Egenno afiꞌrino manni baalu suutu soorro ammananno yinannita calla macciishshe, baalunkuri suutu soorronni dayino yee ammananno manni mageeshshiho?
“Lawishshaho dubbu giddo hadhanni heedhe mitto hoola yinoonni mine laittoro, ‘Hayi hoola! Haqqe mittu manchino karikkinni umisenni gamba yite mine ikkitino’ yite hedattoni? Horo dihedatto! Hatto yee heda busulle diꞌꞌikkitino. Ikkina, kalqete alame giddo noori baalunkuri umisinni dayinoho yine ammana hasiissannonkeni?”—Juuliya.
“Hanni mittu manchi togo yee kulinohehu gede assite hedi: ‘Mitte borro attammanni maashine dhookkeenna giddose noo qalame kaatte girgiddunna korniisete aana naqqu; hakkiinni hatti qalame umisenni gamba yite jawa dikshinere ikkitino.’ Tenne ammanatto?”—Giweni.
MAGANU NO YINE AMMANNEEMMOHU MAYIRAATI?
Qullaawu Maxaafi “wodancha” noonkere ikkineemmo gede jawaachishannonke. (Lawishsha 3:21) Hatto yaa, Maganu no yine ammanneemmohu aane noo korkaatinni calla ikka dihasiissannosi yaate:
-
MEESSI HEDO (Mulla hedeemmo wote manna roortino wolqa nooha lawannoe)
-
WOLU MANNI AMMANINO DAAFIRA (Heeꞌreemmohu Magano ammaꞌnino dagoomi giddooti)
-
MANNU XIXXIIWINOHEHURA (Anniꞌyanna amaꞌya Maganu no yee ammaneemmo gede asse lossinoe; tenne giweemmo gari dino)
Maganu no yite ammanatto gede assitannoheta gari taje afiꞌra hasiissannohe.
“Rosu mine rosiisaanchinke bisinke kifilla loossanno gara xawisanna macciishsheemma wote Maganu noota horo dihuluullameemma. Mitte mittenti bisu kifilla, wole agurina shiimmaadda bisu kifilla nafa uminsa looso afidhino; isinni duucha wote bisu kifillanke loossannohu ninke anfummokkinniiti. Mannu bisi addinta dhaggete!”—Tereesa.
“Seeda fooqe, jawa howolo, woy makeena laeemmo wote, ‘Kuri coyibba loosinohu ayeti?’ yee hedeemmo. Lawishshaho, makeena seekkinohu hedate dandoo noonsa mannaati; korkaatuno makeenu haꞌranno gede assate makeenunniti mitte mittenti kifile garunni loosa hasiissannose. Makeena seekkinohu heeꞌri geeshsha, ninkeno kalaqinonkehu no yaate.”—Richaardi.
“Sayinsete daafira albinni roore xiinxallummo kiiro, suutu soorro gara ikkitinokkiti leeltannoe. . . . Anera lawannoe gede ikkiro, ammanate roore qarrisanno coyi Kalaqaanchu no yee ammana ikkikkinni, baalunkuri dayinohu suutu soorronniiti yee hedate.”—Antooni.
HEDA HASIISSANNO COYE
Sayinsete egennaammi lowo diro xiinxallitanni keeshshitinoha ikkirono, suutu soorro daafira noonsa hedo mitte diꞌꞌikkitino. Lowore affino yine hendanniri sayinsete egennaammi nafa suutu soorro daafira noonsa hedo babbaxxitinota ikkituro, suutu soorro gara ikkase huluullamakki soꞌro afidhinoni?
