Yihowa Farciꞌraasine mittu qooxeessira dano iillitanno woyite, gawajjantino roduuwansa kaaꞌlate rakke iillitanno. Tini mereeronke addu baxilli noota xawisse leellishshanno. (Yohaannisi 13:34, 35; 1 Yohaannisi 3:17, 18) Ninke roduuwanke kaaꞌlineemmohu hiittoonniiti?

Woxe fushshineemmo. Biꞌre Yihudaho mannu lowo geeshsha hudiꞌri waro, Antsookiyu Kiristaani ammanate roduuwansa kaaꞌlate woxe soyino. (Soqqamaanote Looso 11:27-30) Hakkawarinte gede, yannankerano mitte basera roduuwinke qarru giddo noota macciishshinummoro insa kaaꞌlate songonke widoonni qolle mitore sonkeemmonsa.—2 Qorontoosi 8:13-15.

Mitore assine kaaꞌlineemmo. Dano iillitino qooxeessira noo cimeeyye roduuwu gattinoro buuxatenna noo gara afate mitto mittonka hassanno. Irdaatu komite sagale, anganni waa, uddano, gallanni basenna xagga beehate looso qineessitanno. Ogimma noonsari lowo roduuwi uminsa woxinni hadhe, lowo looso kaaꞌlitanno woy diigantino minnanna Gambooshshu Addaraashe gatamartanno. Dirijjitenke giddo noo mittimmanna roduuwu ledo gamba yine loonse afiˈnoommo woꞌnaalshi, hasiisanno irdaatanna loosaasine mitiiꞌminummokki afiˈneemmo gede kaaꞌlannonke. “Ninke ledo ammanatenni fiixoontannore” roore kaaꞌlineemmoha ikkirono, dandaamannonke woyite wole ammaꞌno harunsanno mannano kaaꞌlineemmo.—Galaatiya 6:10.

Ayyaanaamittete kaaꞌlo uyineemmo; hattono sheshifachinsheemmo. Dano iillitinonsa manni roorenka shesho hasiꞌranno. “Shesho baalante Magani” Yihowa qarru yannara jawaante aannonke. (2 Qorontoosi 1:3, 4) Maganu Mangiste qarranna mitiimma abbitanno dano baalanta muli yanna giddo hooltannota dadillino mannira Qullaawu Maxaafinni kulle sheshifatanno gede kaaꞌlineemmo; togo assa hagiirsiissannonke.—Ajuuja 21:4.

• Yihowa Farciꞌraasine dano iillitanno yannara rakke kaaꞌla dandiitannohu mayiraati?

• Danotenni gatino manna ayyaanaamittetenni kaaꞌlineemmohu hiittoonniiti?