Lowo manni ayyaanaamittete gooꞌronsa fushshannorenna sheshifachishannonsare hoogino daafira ammaꞌnote bayicho haꞌra agurino. Ikkina, ati Yihowa Farciꞌraasine gambooshshe haꞌra hasiissannohehu mayiraati? Hakka dayittoro maa afiˈratto?

Mimmito baxannonna wolootaho hedanno manniwa aanatto daafira hagiidhatto. Umi xibbi diri Kiristaani addi addi songora magansiꞌranno; hakkiinni saeno, Magano magansiꞌrate, Qullaawa Borro xiinxallatenna mimmito jawaachishate gamba yaanno. (Ibiraawuyaani 10:24, 25) Insa gamba yitanno woyite, mereeronsa baxillu woꞌminotanna addu jaallanni yaano ayyaanaamittete roduuwinsanni dukkisantinota huwattanno daafira lowo geeshsha tashshi yaannonsa. (2 Teselonqe 1:3; 3 Yohaannisi 14) Ninkeno hakko Kiristaani lawishsha harunsineemmo; qoleno insa gede hagiidhineemmo.

Qullaawu Maxaafi seerinni heeꞌnanni gara rosatto. Biꞌree wari gede gambooshshinkera labballu, meentunna qaaqquullu mitteenni gamba yaanno. Rosiisate dandoo noonsa rosiisaano barru barrunku Qullaawu Maxaafi seeri garinni heeꞌneemmo gara rosiissannonke. (Marro 31:12; Nehimiya 8:8) Gambooshshu yannara baalunku hasaawaho hedonsa coyiꞌra dandiitanno, hattono faarso faarsitanno; tini qolte baalunku hexxonke faajjete xawinseemmo gede assitanno.—Ibiraawuyaani 10:23.

Ammanakki jawaattanno. Soqqamaasinchu Phaawuloosi yannasira noo songuwa giddo mittete togo yiino: “Ani kiꞌne ammananni, kiꞌne qoltine ane ammananni mimmitonke jawaachinsheemmo gede . . . kiꞌne ledo xaadate quqquxamoommo.” (Roomu Sokka 1:11, 12) Ganyine gambooshshinkewa ammanate roduuwinke ledo xaandeemmoha ikkiro, ammananke jawaattanno; hattono Qullaawu Maxaafi seeri garinni heeꞌrate albinni roore jawaante afiˈnanni haꞌneemmo.

Atino gambooshshenke dagge tenne baala illekkinni mayira dilaꞌꞌatto? Dayittoro lowo geeshsha tashshi yaannonke. Baalunku gambooshshira woxe dibaaxxatto; qoleno mutsuwaateho saffe didoyissinanni.

• Songote gambooshshenke massangannihu ayeoo lawishshi garinniiti?

• Yihowa Farciꞌraasine gambooshshe haꞌnummoro maa afiˈneemmo?