Hundi yannanni kayise Yihowa mitte mittenti maate mitteenni gamba yite ayyaanaamittensanna mereeronsa noo baxille lossidhara hasiꞌranno. (Marro 6:6, 7) Yihowa Farciꞌraasine lamalate kiiro maatensa ledo mitteenni magansiꞌrate yanna gaaꞌmitannohu iseraati; togoo woyite maatensara roore kaaꞌlitannota Qullaawa Borro hedo hisanyootunni hasaabbanno. Callikki heeꞌrattoha ikkiro nafa, Qullaawa Maxaafa xiinxallate umikki pirogiraame fushshidhe togoo yanna Maganunniwa shiqate horoonsiꞌra dandaatto.

Maatete magansiꞌra Yihowawa shiqate kaaꞌlitanno. “Maganunniwa shiqqe, isino kiꞌnewa shiqannona.” (Yaaqoobi 4:8) Yihowa akattarenna assinore hixamanyine Qullaawu Maxaafinni ronsanni haꞌnummoro, iso albinni roore egenninanni haꞌneemmo. Maatete magansiꞌra mite yine hanafate Qullaawa Maxaafa qoonqo gotti assine bado bado nabbawa dandiinanni; lawishshaho, lamalannita Kiristaanu Heeshshonna Soqqansho Gambooshshi pirogiraame harunsine nabbawa dandiinanni. Nabbawate gaammoonni fooliishshuwa maatete giddo noorira mittu mittunkura beenkeenna nabbabbu gedensaanni, baalunku Qullaawa Borronni afiˈrino hedo mitteenni hasaawa dandiinanni.

Maatete magansiꞌra maate mimmitu ledo lubbora baxantanno gede assitanno. Minaanninna minaama, hattono annuwu, amuuwunna ooso Qullaawa Maxaafa mitteenni xiinxallitannoha ikkiro, mereeronsa noo baxilli lexxanni haꞌranno. Tenne yanna hagiidhinannita, salaame woꞌmitinotanna quqquxamme agadhinannita assiꞌra hasiissanno. Annuwunna amuuwu oosonsa diri garinni, maatensara roore kaaꞌlitanno hedo dooriro danchaho; lawishshaho, Agarooshshu Shaenna Baqqi Yiiyye! yinanni borro giddonni woy jw.org/sid yinanni webisayitenke aaninni mito birxicho doora dandiinanni. Rosu mine oosoꞌne qarrisannorenna hakkoye qarra qeela dandiitanno gara hasaawa dandiitinanni. JW Biroodikaaste (tv.pr418.com) yinannihu televizhiinete xaawira fultanno pirogiraame mitteenni laꞌine hasaabbe. Songote gambooshshiwa faarsinanni faarso mitteenni rosiisiꞌranna maatete magansiꞌra gedensaanni mitore sagaꞌlanna hagiirsiisannore assa dandiitinanni.

Maate mitteenni gamba yite lamalate kiiro konni garinni Yihowa magansiꞌransa, baalunku Maganu Qaale xiinxallatenni hagiidhanno gede assitanno; Yihowano maassiꞌrannonsa.—Faarso 1:1-3.

• Maatete magansiꞌrara yanna gaaꞌma hasiissinohu mayiraati?

• Annuwunna amuuwu togoo yannara baalunku hagiidhanno gede assa dandaannohu hiittoonniiti?