GAFA MITE
“Baꞌinore Haseemmo”
Geꞌrechote ragu bainose. Qanchoho hayisso xinqidhanni wolu geꞌreewiwiinni baxxite baꞌu. Xa hoshshano allaalaanchuno dileellannose. Qoleno gobba tunsitanni no. Tini geꞌrecho noohu moyichu fule haꞌramanno baseraati; hakko daafira itantannota hoolannosehu dino. Gedensaanni tini geꞌrecho allaalaanchise huuro macciishshitu; isi dodanni daye hanqafe uddanosi diwe haare haꞌrise.
YIHOWA duucha hige isonooto hattoo allaalaanchi ledo lawisiisino. Isi Qaalisi giddo togo yiinonke: “Ani umiꞌya geeꞌreewoꞌya hasiꞌreemmo, qoleno towaateemmonsa.”—Hiziqeeli 34:11, 12.
“Towaaxxeemmo Geꞌreewo”
Yihowa geꞌreewi ayeooti? Yihowa geꞌreewi iso baxannonna magansiꞌranno mannaati. Qullaawu Maxaafi togo yaanno: “Amme magansiꞌnona, hattono isira kumbuullo; Kalaqaanchinke Yihowa albaanni guluphino. Korkaatuno isi Maganonkeeti; ninke kayinni qanchisi giddo heeꞌnoommo mannaati, hattono isi towaatannonke geꞌreewooti.” (Faarso 95:6, 7) Geꞌreewu allaalaanchinsara hajajamannonte gede, Yihowa magansidhannorino Allaalaanchinsara hajajama baxxanno. Insa disodhannoreeti? Deeꞌni. Maganu soqqamaano “billaallino geꞌreewi gede,” “baino geꞌreewi” gedenna “ballehino geꞌreewi” gede ikkitino woti no. (Hiziqeeli 34:12; Maatewoosi 15:24; 1 Pheexiroosi 2:25) Ikkollana, mittu manchi halaaluwiinni xeertiꞌre bairo nafa, Yihowa kuni manchi horo dihiganno yee facci asse diaguranno.
Yihowa xaano atera allaalaanchokki ikkinohu gede assite hedatto? Yannankera Yihowa Allaalaancho ikkinota leellishannohu hiittoonniiti? Hanni sase doogga laꞌno:
Ayyaanaamittete sagale itisannonke. Yihowa togo yiino: “Danchu qanchira allaaleemmonsa. Insa danchu qanchira gadhanno, hattono doorantino kalo giddo bobbakkanno.” (Hiziqeeli 34:14) Yihowa kiꞌannota ayyaanaamittete sagale hasiissanno yannara shiqishinkekki saino yanna dino. Kaaꞌlo hasidhe huucciꞌrootto huuccattora borro nabbabbe, lallawo macciishshite, woy viidiyo laꞌe dawaro afiꞌrootto yanna qulli yitannohe? Tini Yihowa ate daafira hedannota buuxatto gede diassitinohe?
Isi agarannonke hattono irkisannonke. Yihowa togo yee qaale eino: “Ballehinoha wirro abbeemmo, gawajjaminoha hoccunni usureemmo, hattono daafurinoha jawaachisheemmo.” (Hiziqeeli 34:16) Yihowa daafurtinorenna yaaddo amaddinonsare jawaachishanno. Isi geꞌreewisi ammanate roduuwinsa assitinorinni gawajjantinoha ikkiro nafa sisse dhaawannonsa. Qoleno, isi ballekke baꞌinore qolanno; hattono uminsa laanfe ledo sharrantannore jawaachishanno.
Isi ninke towaata hasiissannoe yee hedanno. Yihowa togo yiino: “Billaallite hadhino base baalantenni gamba asseemmo. Bainoha haseemmo.” (Hiziqeeli 34:12, 16) Yihowa baino geꞌreewi bae gatanno yee dihedanno. Isi hoshshate giddonni mitte geꞌrecho xeꞌanno wote afanno, hakkunni gedensaanni hasanno hattono hase afiꞌriro lowo geeshsha hagiidhanno. (Maatewoosi 18:12-14) Hakkiinni saeno isi halaalunni magansidhannosire “geꞌreewoꞌya, ani towaateemmo geꞌreewo” yaannonsa. (Hiziqeeli 34:31) Konni geꞌreewi giddo mittu ateeti.
Yihowa baꞌino geꞌrechosi baꞌe gatanno yee dihedanno. Isi hattee geꞌrecho hase afiꞌranno wote baasa hagiidhanno
“Dironke Albihu Gedeeha Assite Haaroonsinke”
Yihowa ate hasanni noohehunna higatto gede koyisinohehu mayiraati? Hagiirraamo ikkattora hasiꞌranno daafiraati. Isi geꞌreewisira ‘atoote xeenimma dirrisannota’ coyiꞌrino. (Hiziqeeli 34:26) Tini haafa hexxo diꞌꞌikkitino. Tini adda ikkitinota umikki heeshshonni laootto.
Hanni Yihowa daafira rositto yanna qaagi. Lawishshaho, Maganu suꞌmirenna mannaho noosi alaamire kulannoha maalaꞌlinanni halaale rositto wote mayi macciishshaminohe? Ammanate roduuwikki ledo jajjabbu gambooshshiwa gamba yaa mageeshshi geeshsha hagiirsiissannoro qulli yaannohe? Mittu manchira dancha duduwo kulteenna dancha gede macciishsheenna hagiidhitanni qaera higootto yanna dino?
Hattoo hagiirre xaano afiꞌra dandaatto. Hunditi Maganu soqqamaano togo yite huuccidhino: “Yihowa, atewa qolinke ballo; ninkeno atewa ranke hingeemmo. Dironke albihu gedeeha assite haaroonsinke.” (Ermiyaasi Qurto 5:21) Yihowa mannisi galagale hige isira hagiirrunni soqqamanno gede asse huuccattonsara dawaro qolino. (Nehimiya 8:17) Yihowa aterano hatto assannohe.
Hige Yihowawa higa coyiꞌni gede shota diꞌꞌikkitino. Hanni wirro higa shota ikkitannokki gede assannoha mito coyenna konne coye qeela dandaatto gara laꞌno.
