1. Addaaminna Heewani maa huꞌnitino? Tini mayi guma abbitino?

 KUNI danchaho kuni bushaho yee kulate qoosso noosihu aye lawannohe? Addaaminna Heewani danchanna busha badde leellishshanno haqqicho guma ittu woyite, Yihowanna biddishshasi addaxxitannokkita leellishshino. Insa uminsara danchanna busha bade kulanno biddishsha fushshiꞌra doodhitino. (Kal. 3:22) Ikkollana insa hatto assansanni mageeshshire huꞌnitinoro heda dandaatto. Insa Yihowa ledo noonsa jaalooma huꞌnitino. Hattono hegerera heeꞌrate qoossonsa hooggino; qoleno oosonsara cubbonna reyo ragisiissino. (Rom. 5:12) Addaaminna Heewani doodhitino doorshi lowo qarra abbino.

2-3. (a) Itiyophiyu manchi Filiphoosi farciꞌrisi woyite maa assino? (b) Cuuammummoro mayi atoote afiꞌneemmo? Konninni aanchine hiikkuri xaꞌmuwa xiinxallineemmo?

² Mittu Itophiyu manchi, Filiphoosi farciꞌrisi woyite Addaaminna Heewani assitinorinni baxxinore assino. Kuni manchi Yihowanna Yesuusi assitinosire lowo geeshsha naadino daafira, hakkawoyintenni cuuamino. (Soq. 8:34-38) Ninkeno heeshshonke Maganoho sayinse uyineemmonna hakko manchi gede cuuammeemmo woyite, Yihowanna Yesuusi assitinonkere naandeemmota leellinsheemmo. Hattono Yihowa addaxxineemmotanna bushanna dancha bade kulate qoosso noosihu iso ikkinota huwantoommota leellinsheemmo.

³ Hanni Yihowara soqqammeemmoha ikkiro afiꞌneemmo atoote hedi. Umihunni, Addaaminna Heewani huꞌnitinore baala afiꞌrate hexxo noonke; kuri giddo mitte hegerera heeꞌrate hexxooti. Yesuusi Kiristoosa ammanneemmoha ikkiro, Yihowa  cubbonke gatona yaannonke; hattono xuru nookki tiia aannonke. (Mat. 20:28; Soq. 10:43) Qoleno Yihowa hagiirsiissanno soqqamaano wido ikkineemmo daafira, albillitte dancha heeshsho heeꞌneemmo. (Yoh. 10:14-16; Rom. 8:20, 21) Ikkollana mitootu Yihowa daafira rossinoha ikkirono, Itiyophiyu manchi lawishsha harunsite cuuamatenni badhera higganno. Insa cuuantannokki gede assinonsari maa ikkara dandaanno? Hattono insa fonqolo ikkannonsaha konne coye qeela dandiitannohu hiittoonniiti?

4-5. Aveerinna Haanna yinanni wedellootira mayi tuncu yiinonsa?

⁴ Dandoo dinoe yee waajja. Aveeri anninna ama Yihowa Farciꞌraasineeti. Annisi maatesi danchu garinni towaatannohonna worba songote cimeessaati. Ikkirono Aveeri cuuamatenni badhera higino. Mayira? Isi, “Ani anniꞌya gede ikka dandeemmoha dilawinoe” yiino. Hattono Aveeri albillitte uyinannisi qeecha duqqa dandaannokkiha lawinosi. Isi togo yiino: “Mannu albaanni huuccatto asseemmo gede, lallawo shiqisheemmo woy qanchu soqqansho gambooshshe massageemmo gede xaꞌminannie yee waajjoommo.”

⁵ Haanna yinanniti 18 diro ikkannose beetto mito coye assate worbimma dinoe yite heddanni keeshshitino. Annisenna amase Yihowa Farciꞌraasineeti. Ikkirono ise Yihowa biddishshi garinni heeꞌra didandeemma yite waajjitino. Mayira? Korkaatuno Haanna umose mannu woriidita assite laꞌanno. Mito woyite ise baasa dadillitanno daafira, affanni heedhe umose gawajjitanno; tini qolte coyi roore bushanno gede assa agurranna tirtannori dino. Ise togo yitino: “Assoommare mittohono, wole agurina anniꞌyaranna amaꞌyara nafa dikuloomma; hattono aneneeto gawajjanni noomma daafira, Yihowa soqqamaanchosi ikkammara dihasiꞌranno yee hedoomma.”

6. Vaneesa cuuantannokki gede fonqolo ikkinoseri maati?

⁶ Jaallate fonqolo. Vaneesa yinanniti 22 diro ikkannose beetto togo yitino: “Mitu tonnu diri albaanni egennamoommati mitte baxeemma jaala nooe.” Ikkollana Vaneesa jaala ise cuuantanno gede dijawaachishshinose. Tini ise dadillissinose; Vaneesa togo yitino: “Mannu ledo jaalooma kalaqiꞌra qarra ikkitinoe, hattono ise ledo nooe jaalooma agurummaro wole ise gedee jaala horonta diafiꞌreemma yee waajjoomma.”

7. Makeela yinanni beetto maa waajjitino? Mayira?

⁷ Cubbo loonseemmo yine waajja. Makeela rodii songotenni bohaminohu ise ontu diriti heedheennaati. Ise anjesenni kayisse rodiise assooti annasenna amase dadillisino gara  laꞌino. Makeela togo yitino: “Cubbo loosenna songotenni bohame annaꞌyanna amaꞌya dadilliseemma yee yaadoomma daafira cuuama waajjoomma.”

8. Miilzi yinanni wedellichi maa waajjino?

⁸ Darte waajja. Miilzi anninna lossu amasi Yihowa Farciꞌraasineeti; iltinosi ama kayinni Yihowa Farciꞌraasincho diꞌꞌikkitino. Isi togo yiino: “Iltinoe amaꞌya ledo 18 diro heeꞌroommo; konnira cuuama hasiꞌroommota isera kula waajjoommo. Korkaatuno alba anniꞌya Yihowa Farciꞌraasincho ikki woyite mayi macciishshaminosero afoommo. Konnira aneno qarrissannoe yee waajjoommo.”

9. Yihowa cincino garanna baxillisi daafira rosakki maaho kaaꞌlitannohe?

⁹ Addaaminna Heewani Yihowara noonsa baxilli lexxanno gede assidhinokki daafira, Isira soqqama hoogate doodhitino. Ikkollana Yihowa insa seeda diro heedhe ooso iltanno gedenna oosonsa hasidhino garinni lossidhanno gede fajjinonsa. Addaaminna Heewani Yihowawiinni fafe heeꞌrate doodhitino doorshi abbino gumi, insa gowwuulle ikkinota leellishanno. Bayiru beettinsa beebbaataamo rodoosi shiino; hattono batinye mannu ooso galte hosse finqilanna umonsa calla baxxannore ikkitino. (Kal. 4:8; 6:11-13) Ikkollana Yihowa Addaaminna Heewani sirchi giddonni isira soqqama hasidhannori gato afidhanno faro qixxeessino. (Yoh. 6:38-40, 57, 58) Yihowa cincino garanna baxillisi daafira roore rossanni haꞌratto woyite, isira noohe baxilli lexxanni haꞌrara dandaanno. Addaaminna Heewani lawishsha harunsa agurte heeshshokki Yihowara sayisse aa hasiꞌrattoti egennantinote.

10. Faarso 19:7te noo hedo hiincakki Yihowara soqqamate kaaꞌlitahera dandiitanno yineemmohu mayiraati?

¹⁰ Yihowa daafira rosa agurtooti. Yihowa daafira rossanni haꞌratto woyite, soqqanshokkinni hagiirraamo ikka dandaattota albinni roore addaxxatto. Aleenni qummi assinihu Aveeri togo yiino: “Faarso 19:7te aana Yihowa eino qaale nabbawaꞌyanna hiincaꞌya worba ikkeemmo gede assitinoe.” (Qummeeshsha  nabbawi.) Aveeri Yihowa einoha konne qaale wonshino gara lai woyite, Maganoho noosi baxilli lexxanni haꞌrino. Baxillu worbuulle ikkineemmo gede calla ikkikkinni Yihowanna Isi fajjo aana illachinsheemmo gede kaaꞌlannonke. Aleenni qummi assiniti Haanna togo yitino: “Qullaawa Maxaafa nabbawaꞌyanna hojju xiinxallo assiraꞌya, aneneeto gawajjeemma woyite Yihowano gawajjanni noommata wodancheemma gede assitinoe.” (1 Phe. 5:7) Haanna Maganu “Qaale guuttinannire ikke” yitanno amaale harunsitino. (Yai. 1:22) Tenne assase maaho kaaꞌlitinose? Ise togo yitino: “Yihowara hajajama kaaꞌlitinoe gara laꞌꞌaꞌya isira nooe baxilli lexxanno gede assitino. Xa, Yihowa kaaꞌlo hasiissannoe yanna baalantera kaaꞌlannoeta dihuluullameemma.” Haanna iseneeto gawajjitanno gede xixxiibbannose hedo qeela dandiitino. Ise heeshshose Yihowara sayisse uyite cuuantino.

11. Vaneesa dancha jaalla kalaqiꞌrate maa assitino? Ninke ise lawishshinni maa ronseemmo?

¹¹ Jaalla qorophite doodhi. Aleenni qummi assiniti Vaneesa, jaalase ise Yihowara soqqamatenni badhera higganno gede assitinoseta galte hosse huwattino. Konnira ise hatte beetto ledo noose jaalooma agurtino. Ikkollana ise wolereno assitino. Vaneesa songote giddo haaro jaalla afiꞌrate sharrantino. Ise Nohinna maatesi lawishshi kaaꞌlinoseta coyidhino. Ise togo yitino: “Insa Yihowa baxannokki manni mereero heeꞌrinoha ikkirono, mimmitu ledo dancha aante noonsa.” Vaneesa cuuantu gedensaanni suwisaancho ikkitino. Xa ise togo yitino: “Tini ani noomma songo giddo calla ikkikkinni wole songo giddono jaalla kalaqiꞌreemma gede kaaꞌlitinoe.” Atino Yihowa uyinonke looso dandaamihe deerrinni diinaggaabbe loosse dancha jaalla kalaqiꞌra dandaatto.—Mat. 24:14.

12. Addaamiranna Heewanira hiitti waajja dinonsa? Yannate gedensaanni mayi iillinonsa?

¹² Gara ikkitinokki waajja waajjitooti. Waajja kaaꞌlitannonke woyiti no. Lawishshaho, Yihowa dadillinseemmokki gede waajja hasiissannonke. (Far. 111:10) Addaaminna Heewanira hattoo waajja heedhoommensaro, Yihowara difinqilanno. Insa Yihowara finqilihu gedensaanni, illensa faꞌnanteenna  cubbaataamma ikkansa woꞌmunni woꞌma huwatino. Insa sirchinsara cubbonna reyo ragisiisa agurranna assa dandiinori dino. Insa hakka woyite Maganu seera diigginota huwattino daafira mulloota ikkansanni saaltino; konnira teedansa diphitino.—Kal. 3:7, 21.

13-14. (a) Umi Pheexiroosi 3:21te kulloonni garinni, reyo quwa saꞌne waajja hasiissannonkekkihu mayiraati? (b) Yihowa banxeemmo gede assannonkeri maati?

¹³ Yihowa dadillinseemmokki gede waajja hasiissannonkeha ikkirono, reyo quwa saꞌne waajja dihasiissannonke. Yihowa hegere heeshsho afiꞌneemmo faro faninonke. Cubbo loonsummorono addinta maaro eꞌneemmoha ikkiro Yihowa gatona yaannonke. Isi Beettisita wodote kakkalo ammanneemmoha ikkiro, gatona yaannonke. Ammananke leellisha dandiineemmoti qara doogo heeshshonke Yihowara sayise aatenna cuuamate.—1 Pheexiroosi 3:21 nabbawi.

¹⁴ Yihowa banxeemmo gede assannonkehu batinyu korkaati no. Barru baala afiꞌneemmoha dancha coye aannonkehu isooti; qoleno Yihowa isinna hedosi daafira kulanno halaale rosiisannonke. (Yoh. 8:31, 32) Isi Kiristaanu songo widoonni massagannonke, hattono irkisannonke. Xaa yannara isi duhanke duqqanno; hattono albillitte guuta alamera hegerera heeꞌrate hexxo uyinonke. (Far. 68:19; Aju. 21:3, 4) Yihowa ninkera noosi baxille leellishate assinonkere hiincanke, iso banxeemmo gede kakkayissannonke. Qoleno iso banxeemmoha ikkiro, iso dadillinseemmokki gede waajjineemmo.

15. Makeela cubbo looseemma yite waajjate hedose qeeltinohu hiittoonniiti?

¹⁵ Aleenni qummi assiniti Makeela, Yihowa maaro lowota ikkitinota huwatase cubbo looseemma yite waajjate hedose qeeltanno gede kaaꞌlitinose. Ise togo yitino: “Ninke baalunkura guuntete xeꞌne noonketanna soꞌnammora dandiineemmota huwatoomma. Ikkollana Yihowa baxannonketanna wodote kakkalo widoonni maarannonketano wodanchoomma.” Ise Yihowa baxxanno daafira heeshshose isira sayisse uyitino; hattono cuuantino.

16. Miilzi fonqolo ikkannore qeelanno gede kaaꞌlinosiri maati?

¹⁶ Amaꞌya gibbannoe yee cuuama waajjinohu Miilzi, woradu aliidi laꞌꞌaancho amaale xaꞌmiꞌrino. Isi togo yiino: “Isino babbaxxitino ammaꞌno harunsitanno maate giddo lophino. Isi ani cuuamate kaoommohu anniꞌya xixxiiweennae ikkikkinni, umiꞌya doorshinni ikkinota amaꞌya huwattanno gede mayyaa dandeemmoro kulinoe.” Miilzi ama isi tenne assasinni dihagiidhitino. Yannate gedensaanni isi minisenni fulinoha ikkirono, cuuamate fushshirino mixo diagurino. Isi togo yiino: “Yihowa assinoeha dancha coye afaꞌya wodanaꞌya kakkayissino. Yesuusite wodote kakkalo daafira hiincaꞌya, Yihowa mageeshshi geeshsha baxannoero huwateemmo gede assitinoe. Tenne hedaꞌya heeshshoꞌya Yihowara sayise oye cuuameemmo gede kakkayissinoe.”

17. Ninkera mayi tunceenyi noonke?

¹⁷ Heewani Edenete noo haqqicho guma ittu woyite, Annisera finqiltino. Addaamino ise ledo halame Yihowa assinosiha dancha coye baala naadannokkita leellishino. Ninke baalunku Addaaminna Heewani doodhitino doorshira sumuu yineemmokkita leellisha dandiineemmo. Danchanna busha ikkinore bade kulate silxaane noosihu Yihowaati; cuuamanke tenne ammanneemmota leellishshanno. Hatto assineemmoha ikkiro, Annanke Yihowa banxeemmotanna addaxxineemmota leellinsheemmo.

18. Yihowara soqqamatto soqqanshonni hagiirraamo ikka dandaattohu hiittoonniiti?

¹⁸ Cuuammummo gedensaanni barru baala ninke hasiꞌnoommo garinni ikkikkinni Yihowa hasiꞌranno garinni heeꞌra hasiissannonke. Lowo miliyoone ikkanno manni konni garinni heeꞌranno. Atino Maganu Qaale seekkite huwatittoro, roduuwikki ledo ganyite gamba yiittoronna baxillaanchu Annikki Yihowa daafira rosoottore wolootaho diinaggaabbe kulittoro Yihowa hasiꞌranno garinni heeꞌra dandaatto. (Ibi. 10:24, 25) Mitto doorsha doodhattora albaanni, Yihowa Qaalisinna dirijjitesi widoonni aannohe amaale macciishshi. (Isa. 30:21) Hatto ikkiro assattori baalu qinaannohe.—Law. 16:3, 20.

19. Woꞌmante yannara maa qaaga hasiissannohe? Mayira?

¹⁹ Yihowa biddishshi kaaꞌlannohe gara huwattanni haꞌratto woyite, Yihowaranna isi fushshino biddishshira noohe baxilli lexxanno. Hatto ikkiro, Sheexaanu shiqishannohu ayi geeshshi fonqolino Yihowara soqqamattota hoolahera didandaanno. Hanni kumu diri gedensaanni mayi macciishshamannohero hedi. Hatte yannara heeshshokki giddo assootto coyi baalunkunni roorinohu cuuamate doodhootto doorsha ikkinota huwatatto.