1. Umi Pheexiroosi 3:8te garinni, ninke daafira hedannonna mararannonke manni mereero heeꞌranke hagiirsiissannonkehu mayiraati?

 NINKE daafira hedannonna mararannonke manni mereero heeꞌranke hagiirsiissannonke. Insa ninke qarra uminsahu gede assite laꞌanno woy hedonke huwatate sharrantanno. Kuni manni mayi hasiisannonkero huwate kaaꞌlannonke; isinni mito woyite insa kaaꞌlitannonkehu kuꞌlinummokki nafa ikkara dandaanno. Ninke ‘qarra uminsahu gede asse laꞌꞌanno’ b manna lowo geeshsha galanteemmonsa.—1 Pheexiroosi 3:8 nabbawi.

2. Manna marara qarra ikkitankera dandiitannohu mayiraati?

² Kiristaana ikkinoommo daafira, manna marara woy wolootu qarra ninkehu gede assine laꞌꞌa hasiꞌneemmo. Ikkollana, hatto assa shota diꞌꞌikkitino. Mayira? Umihunni, ninke guuntete xeꞌne noonkereeti. (Rom. 3:23) Konni daafira, uminke daafira calla heda rakkannonke; tenne hedo qeelate sharrama hasiissannonke. Qoleno lossinoonninke gari woy konni albaanni heeshshonke giddo iillinonkeri manna marara qarra ikkitannonke gede assara dandaanno. Hattono alamete aana umonsa calla baxanno manni woꞌmino daafira, manna marara qarra ikkitankera dandiitanno. Tenne goofimarchu yannara batinyu manni woloota dimararanno. Hatteentenni insa ‘umonsa baxanno.’ (2 Xim. 3:1, 2) Ikkina manna marara qarra ikkitannonke gede assanno coye qeelate kaaꞌlannonkeri maati?

3. (a) Albinni roore manna mararreemmore ikka dandiineemmohu hiittoonniiti? (b) Konni birxichira maa ronseemmo?

³ Yihowanna Yesuusi lawishsha harunsineemmoha ikkiro, albinni roore manna mararreemmore ikka dandiineemmo. Yihowa  baxillaancho Maganooti; qoleno isi woloota mararate baalunkunni roore dancha lawishsha ikkannonke. (1 Yoh. 4:8) Yesuusi woꞌmunni woꞌma annisi lawishsha harunsino. (Yoh. 14:9) Isi uullate aana noo yannara, mannu ooso woloota marara dandiitanno gara leellishino. Konni birxichira, Yihowanna Yesuusi woloota marartino gara ronseemmo. Hattono, ninke insa lawishsha harunsa dandiineemmohu hiittoonniitiro laꞌneemmo.

4. Isayaasi 63:7-9 Yihowa soqqamaasinera hedannota leellishshannohu hiittoonniiti?

⁴ Qullaawu Maxaafi Yihowara soqqamaasinesi xisso leeltannosita rosiisannonke. Lawishshaho, hanni hunda Israeelete babbaxxino qarri tuncu yiinsa yannara Yihowara mayi macciishshaminosiro hedi. Maganu Qaali, “Qarrinsa yanna baalantera ledonsa qarramino” yaanno. (Isayaasi 63:7-9 nabbawi.) Yannate gedensaanni, Yihowa masaalaanchu Zakkaariyaasi widoonni mannasi kisannohu iso kisinohu gede asse laꞌꞌannota coyiꞌrino. Isi soqqamaasinesira “Kiꞌne kisannohu illeꞌya diikkicho kisanno” yiino. (Zak. 2:8) Kuni Yihowa mannasi towaatannota leellishannoho dancha lawishshaati!

5. Yihowa soqqamaasinesi qarrantu yannara kaaꞌlinonsa gara leellishanno lawishsha kuli.

⁵ Yihowa soqqamaasinera qarru iillannonsa woyite marare calla diaguranno. Hatteentenni insa kaaꞌlannonsa. Lawishshaho, Israeelete daga Gibitsete borojje ikkite qarrante noo yannara, Yihowara xissonsa leeltinosi daafira, insa furgaasate hedino. Yihowa Musera togo yiino: “Manniꞌya Gibitsete gobbara qarrame noo gara laoommo; . . . raartino raare macciishshoommo; iillinonsa qarrano afe, Gibitsootu anganni gatisammonsara dirroommo.” (Ful. 3:7, 8) Yihowa dagasi mararino daafira, Gibitsete borojjimmanni fushshinonsa. Lowo diri gedensaanni, Hexxote Gobbara Israeele diinnansa uggitinonsa. Hatte yannara Yihowa maa assiyya? Isi “horritannoriwiinni gatissannonsa albisoota” kayisino. Tenne yannarano Yihowa mannasi mararinonsa. Konni daafira, Israeelete daga diinnansa anganni gatisate ejjeetto woy daanyoota soyino.—Eje. 2:16, 18.

6. Yihowa gara ikkitinokki hedo noonsa mannira nafa hedannota leellishanno lawishsha kuli.

 ⁶ Yihowa soqqamaanosi sodhino woyiti nooha ikkirono mararinonsa. Hanni Yoonaasi lawishsha laꞌno. Yihowa kuni masaalaanchi Nennewete mannira yoote sokka duduwanno gede soyino. Nennewete manni maaro eita Maganu insa gatisate hedino. Yoonaasira kayinni tashshi diyiinosi. Isi Nennewe baꞌanno yee masaalino masaalo woꞌmitinokki daafira, ‘lowo geeshsha giiramino.’ Ikkollana Yihowa Yoonaasi cincino; hattono hedosi biddi assiꞌranno gede kaaꞌlinosi. (Yon. 3:10–4:11) Yannate gedensaanni Yoonaasi Yihowa rosiisinosire huwatino; wole agurina Yihowa ninkera kaaꞌlitannonke gede tenne dhagge iso horoonsiꞌre borreessiisino.—Rom. 15:4. c

7. Yihowa soqqamaasinesira assinori maa addaxxineemmo gede kaaꞌlannonke?

⁷ Yihowa mannisira assinori, isi soqqamaasinesi mararannota addaxxineemmo gede assannonke. Isira ninke mittu mittunku xissonna qarri leellannosi. Yihowa “mannu wodanira noo hedo” afino. (2 Dud. 6:30) Isi wodaninkera noore, giddonke noo hedo baalanna dhukanke afino. Qoleno ‘wolqankera aleenni ikkitino jifama iillitankera wore dilaꞌꞌanno.’ (1 Qor. 10:13) Tini hexxo lowo geeshsha sheshifachishshannonke!

8-10. Yesuusi woloota mararanno gede assinosiri maati?

⁸ Yesuusi uullate aana noo yannara, woloota mararino. Yesuusi manna mararanno gede assinosihu ajayi ajeenna sasu korkaati no. Umihunni, aleenni ronsummonte gede Yesuusi woꞌmunni woꞌma annisi akatta leellishino. Annisinte gede, Yesuusi manna baxanno. Yesuusi, Yihowa ledo wolere kalaqi woyite hagiidhinoha ikkirono, roorenkanni ‘mannu sirchinni hagiidhino.’ (Law. 8:31) Yesuusi manna baxanno daafira, insara hedanno.

⁹ Layinkihunni, Yihowante gede Yesuusi mannu wodanira noore afa dandaanno. Isi mannu hasattonna hedo huwata dandaanno. (Mat. 9:4; Yoh. 13:10, 11) Yesuusi mannu baasa dadillinota huwati yannara, mararinonsa daafira sheshifachishinonsa.—Isa. 61:1, 2; Luq. 4:17-21.

¹⁰ Sayikkihunni, Yesuusi umisira mannu oosora iillanno qarri giddo mitu iillinosi. Lawishshaho Yesuusi lophinohu anga ajjino maate giddo ikkara dandaanno. Isi lossinosi annisi Yooseefi ledo loosi yannara, wolqate loosi mageeshshi geeshsha daafursannoro afino. (Mat. 13:55; Maq. 6:3) Yooseefi reyinohu Yesuusi soqqanshosi gumulara albaanni ikkikki digatino. Konni daafira, shiiro mageeshshi geeshsha xissiissannoro afino. Qoleno babbaxxitino ammaꞌno noonsa maate giddo heeꞌra fonqolo ikkitanno gara afino. (Yoh. 7:5) Kurinna wole coyibba, Yesuusi mannu qarranna hedo huwatanno gede kaaꞌlitinosi.

11. Yesuusi manna mararannoha ikkinota leellishinohu roorenkanni hiitte yannaraati? Xawisi. (Aaniidi qoolira noo misile lai.)

¹¹ Yesuusi roorenkanni maalale loosi yannara manna mararannoha ikkinota leellishino. Isi maalale loosinohu hatto assa hasiissannoe yee hedino daafira calla diꞌꞌikkino. Hatteentenni isi maalale loosinohu qarramino manna ‘mararino’ daafiraati. (Mat. 20:29-34; Maq. 1:40-42) Lawishshaho, hanni Yesuusi macciweelo mancho mannuwiinni haaꞌre haꞌre hursisi woyite woy mitte gunnitte manchora noosehu tole beetti reyi yannara iso reyotenni  kayisita mayi macciishshaminosiro hedi. (Maq. 7:32-35; Luq. 7:12-15) Yesuusi konne manna mararino daafira kaaꞌlinonsa.

12. Yohaannisi 11:32-35 Yesuusi Maartanna Maariyaami mararinota leellishshannohu hiittoonniiti?

¹² Yesuusi Maartanna Maariyaami mararino. Insa rodiinsa Aliaazaari reyonni xissiisiꞌrino gara lae, ‘Yesuusi wiꞌlino.’ (Yohaannisi 11:32-35 nabbawi.) Isi wiꞌlinohu muli jaalasi hoogino daafira calla diꞌꞌikkino. Qoleno isi Aliaazaari reyotenni kayisannota afino. Hatteentenni Yesuusi wiꞌlinohu muxxe jaallasi Maartanna Maariyaami xissiisiꞌrino gara huwatinonna isi umisi dadillino daafiraati.

13. Yesuusi mararannoha ikkinota afanke jawaachishshannonkehu hiittoonniiti?

¹³ Yesuusi mararannoha ikkinota afanke lowo geeshsha kaaꞌlitannonke. Ninke isi gede guuta ikka hoongummorono, isi manna mararasi banxeemmosi gede assitannonke. (1 Phe. 1:8) Isi xa Maganu Mangiste Moote ikke gashshe noota afanke jawaachishshannonke. Yesuusi muli yanna giddo qarra baala hunanno. Isi mancho ikke uullate aana heeꞌrino daafira, Sheexaanu gashshooti abbino qarranna shetto baala hune mannu ooso kaaꞌla dandaanno. Addaho, “wolqanke anjera [kaaꞌlannonke]” Gashshaanchi noonke daafira maassammoommoreeti.—Ibi. 2:17, 18; 4:15, 16.

14. Efesooni Sokka 5:1, 2te garinni, maa assa hasiissannonke?

¹⁴ Yihowanna Yesuusi lawishsha hendeemmo woyite, ninkeno manna lowo geeshsha mararreemmore ikkineemmo. (Efesooni Sokka 5:1, 2 nabbawi.) Ninke mannu wodanira noore afa didandiineemmo. Ikkirono wolootu hedo huwatate woꞌnaala dandiineemmo. (2 Qor. 11:29) Heeꞌnoommohu umonsa calla baxanno manni woꞌmino alamera ikkirono ‘woleho woyyannore hendo ikkinnina, uminkera woyyannore calla laꞌnoonke.’—Fil. 2:4.

15. Roorenkanni marartannore ikka hasiissannonsari ayeooti?

¹⁵ Roorenkanni songote cimeeyye marartannore ikka hasiissannonsa. Yihowa towaattanno gede uyinonsa geꞌreewo garunni towaata hoogguro xaꞌmannonsata affino. (Ibi. 13:17) Songote cimeeyye ammanate roduuwansa kaaꞌlate, marartannore ikka hasiissannonsa. Cimeeyye woloota marartannota leellisha dandiitannohu hiittoonniiti?

16. Manna marartanno cimeeyye maa assitanno? Togo assa hasiissannohu mayiraati?

¹⁶ Manna mararanno cimeessi ammanate roduuwisi ledo yanna sayisanno. Isi xaꞌmo xaꞌmanno, hattono cince macciishshanno. Roorenkanni giddonsata fushshite hasaapha hasidhe heedhenni coyidhe kuꞌla hogginore seekke macciishsha hasiissanno. (Law. 20:5) Mittu cimeessi roduuwu ledo yanna sayisannoha ikkiro, insa ammantannosi, insa ledo dancha aante heedhannosi, hattono baxxannosi.—Soq. 20:37.

17. Batinyu roduuwi cimeeyyete noonsa akatta giddo roore baxxannohu hiikkonne akata ikkinota coyidhino? Lawishsha kuli.

¹⁷ Batinyu roduuwi songote cimeeyyera noonsa akatta baalantenni roore baxxannoti manna mararate akata ikkinota coyidhanno. Mayira? Adilaadi yinanni rodoo togo yitino: “Insa hedonke huwattanno daafira, insara hasaapha shota ikkitannonke.” Ise ledde togo yitino: “Insa, hasaaphineemmo woyite macciishshitannonke gari, marartannore ikkitinota leellishanno.” Mittu rodii togo yee coyiꞌrino: “Mittu cimeessira anera tuncu yiinoere kulummosi yannara, hindiiddo dagginosi. Tenne horo dihaweemmo.”—Rom. 12:15.

18. Wolootaho hendeemmota leellisha dandiineemmohu hiittoonniiti?

 ¹⁸ Ikkollana woloota marara hasiissannonsari cimeeyye callate yaa diꞌꞌikkino. Ninke baalunku konne akata lossiꞌra hasiissannonke. Hiittoonni? Maatekki miillara woy ammanate roduuwikkira iillanni noonsare huwatate woꞌnaali. Songokkira noo wedellira, dhiwantinorira, geerraho, hattono shiidhinorira hedattota leellishi. Insa noo gara xaꞌmi. Giddonsata hasaaphitanno woyite seekkite macciishshi. Illanni noonsa fonqolo huwatoottota affanno gede assi. Hattono dandiitto doogonni kaaꞌlinsa. Hatto assineemmoha ikkiro, addu baxille leellinshanni heeꞌnoommo.—1 Yoh. 3:18.

19. Woloota kaaꞌlate woꞌnaalleemmo woyite hayyoota ikka hasiissannonkehu mayiraati?

¹⁹ Woloota kaaꞌlineemmo woyite, hayyoota ikka hasiissannonke. Mayira? Korkaatu mannu qarru iillannonsa woyite, hakko qarra laꞌꞌanno gari babbaxxinoho. Mitootu mannaho hasaapha hasidhanno; wolootu kayinni qarransa woleho kuꞌla hasiꞌra hooggara dandiitanno. Insa kaaꞌla hasiꞌneemmoha ikkirono, salsiissansara dandiitanno xaꞌmo xaꞌma dihasiissannonke. (1 Tes. 4:11) Wolootu giddonsata kuꞌlitanno woyite, coyidhinore baala sumuu yineemmo yaa diꞌꞌikkino. Ikkirono, hatti insa hedo ikkitinota qaaga hasiissannonke. Macciishshate rankoommore, coyiꞌrate muddammeemmokkire ikka hasiissannonke.—Mat. 7:1; Yai. 1:19.

20. Aananno birxichira maa ronseemmo?

²⁰ Songote giddo woloota mararreemmo; qoleno soqqammeemmo yannarano konne muxxe akata leellisha hasiissannonke. Manna rosaano assineemmo woyite manna marara dandiineemmohu hiittoonniiti? Aanano birxichira tenne daafira ronseemmo.