NINKE baalunku danchaho yinankera hasiˈneemmo. Ikkollana, tenne heeˈnoommo alamera danchumma leellisha shota diˈˈikkitino. Batinyu manni “danchumma giwanno.” (2 Xim. 3:3) Insa danchanna busha uminke afiˈneemmo yee hedanno, yaano “busha danchaho; dancha bushaho” yee coyiˈranno. (Isa. 5:20) Konni albaanni heeshshonke giddo iillinonkeri woy guuntete xeˈne noonkere ikkanke danchumma leellisha qarra ikkitannonke gede assitanno. Konnira ninkerano Anee * yinanni rodoora macciishshaminoseri macciishshamankera dandaanno; ise Yihowara lowo diro soqqantinoha ikkirono, “Dancha ikka dandeemma yee heda qarrissinoe” yite coyidhino.

Ikkollana ninke baalunku danchummate akata lossiˈra dandiineemmo. Danchumma Maganu ayyaani laalooti; qoleno isi ayyaani danchumma leellinsheemmokki gede guficho ikkitannonke coyibba baala roortanno wolqa afiˈrino. Konninni aanchine danchummate daafira xiinxallineemmo; hattono konne akata albinni roore leellisha dandiineemmo gara ronseemmo.

Haranchunni, danchummate yaa dancha ikkate yaate. Kuni akati, bushanna sholino coye agurre xalala amanyootenna arshimma harunsa leellishannoho. Mannaho kaaˈlanno coye assine danchumma leellisha dandiineemmo.

Maatensaranna jaallansara dancha coye assa baxanno manna afoottoha ikkara dandaanno; ikkollana danchummate yaa hatto assa calla ikkitinoni? Qullaawu Maxaafi “mitte soˈrono assikkinni, woˈmanka woyite dancha looso calla loosannohu baattote aana mittuno dino” yaanno daafira, danchumma leellisha dandiineemmohu woˈmante yannara diˈˈikkino. (Ros. 7:20) Soqqamaasinchu Phaawuloosi “Ane giddo woy mannimmaˈya heeshsho giddo horonta danchu coyi nookkita egennoommo” yee maaxikkinni coyiˈrino. (Rom. 7:18) Konni daafira, danchummate akata lossiˈrate, konni akati Buicho ikkinohu Yihowa daafira rosa hasiissannonke.

Yihowa kuni bushaho kuni danchaho yee kulannonke. Qullaawu Maxaafi isi daafira kulanni togo yaanno: “Ati danchaho; loosikkino danchaho. Wogakki rosiisie.” (Far. 119:68, NW) Hanni konni qummeeshshira Yihowa danchumma leellishannoha lame coye laˈno.

Yihowa danchaho. Maganu akatta giddo mitte danchummate. Hanni Yihowa Musera “Danchummaˈya leellisheemmohe” yiisi yannara ikkinore hedi. Yihowa danchummanna gaamaarre albasiinni higge saˈu yannara Muse togo yitanno huuro macciishshino: “Ani Kaaliiqi maareemmohonna hanqoho muddameemmokkiho mararaancho Maganooti; ammanamaˈyanna bagamannokkihu baxilliˈya batiˈraho. Bagamannokkihu baxilliˈya kumunni kiirranni ilamara iillanno; sao, sarxonna cubbo agureemmo; ikkirono, sao assinoha horonta dikeereenseemmo.” (Ful. 33:19; 34:6, 7) Konni daafira, mittu mittunku Yihowa akati danchumma afiˈrino. Mannu ooso baalante giddo Yesuusi geeshsha danchu nookkiha ikkirono, isi “Mittu Magani kaˈa danchu dino” yiino.—Luq. 18:19.

 Yihowa loosi danchaho. Yihowa loosinore laˈne isi danchumma huwata dandiineemmo. “Yihowa baalunkura danchaho; loosisi baalunku maarosi leellishanno.” (Far. 145:9, NW) Yihowa danchanna mallaadannokkiha ikkino daafira, mannu ooso baalate heeshshonna heeshshote hasiisannore uyinonsa. (Soq. 14:17) Isi gatona yaannonke woyiteno danchummasi leeltanno. Faarsaasinchu “Ati shaqqadohonna cubbono agurattoho” yee borreessino. (Far. 86:5) Qoleno Yihowa “danchumma assitannorira dancha coye dihoˈlannonsa.”—Far. 84:11.

Kalaqammoommohu Maganu daninni ikkino daafira, danchuulle ikkatenna dancha coye assate dandoo noonke. (Kal. 1:27) Ikkollana Maganu Qaali isi soqqamaasine “danchare assa rosse” yee amaalanno. (Isa. 1:17) Ikkina konne kaajja akata lossiˈra dandiineemmohu hiittoonniiti? Hanni togo assa dandiineemmota sase doogga laˈno.

Umihunni, addu danchumma leellinsheemmo gede kaaˈlannonkeha qullaawa ayyaana aannonke gede huuccatto assiˈra dandiineemmo. (Gal. 5:22) Addaho, qullaawu ayyaani danchare banxeemmo gedenna bushare gimbeemmo gede kaaˈlannonke. (Rom. 12:9) Qullaawu Maxaafi Yihowa ‘dancha coye baala assineemmonna coyiˈneemmo gede wodananke jawaachishannota’ kulanno.—2 Tes. 2:16, 17.

Layinkihunni, qullaawu ayyaaninni borreessaminoha Maganu Qaale nabbawa hasiissannonke. Hatto assineemmoha ikkiro Yihowa “gara ikkino coyi” maatiro rosiisannonke, hattono “dancha coye assate” qixxaambeemmo gede kaaˈlannonke. (Law. 2:9; 2 Xim. 3:17) Wodaninke tuutu uduunnicho wodhinanni saaxine gedeeti; Qullaawa Maxaafa nabbambeemmohanna nabbamboommore hiincineemmoha ikkiro, tenne “saaxine” giddo yannate gedensoonni kaaˈlannokeha muxxe coye mareekkiˈnanni heeˈnoommo.—Luq. 6:45; Efe. 5:9.

Sayikkihunni, “dancha ikkinnina busha labbooti.” (3 Yoh. 11) Qullaawu Maxaafi giddo dancha lawishsha ikkitannonkeri no. Baalunkunni roore lawishsha ikkitannonkeri Yihowanna Yesuusaati. Ikkollana wole danchumma leellishino mannano heda dandiineemmo. Insa giddo Xabitanna Barnabaasi yinanni rosaano qaangeemmoha ikkara dandaanno. (Soq. 9:36; 11:22-24) Insa woloota kaaˈlate yite assitinore xiinxallanke kaaˈlitannonke. Atino maatekki giddo woy songote giddo mitoota shiqqe kaaˈla dandaatto gara hedi. Xabitanna Barnabaasi danchumma leellishansanni afidhino suˈmi majjaha diˈˈikkino. Atino danchumma leellishittoro lowo horo afiˈratto.

Yannankerano danchumma leellishino manni lawishsha heda dandiineemmo. Lawishshaho, diinaggaabbe loossannotanna ‘dancha coye baxxannota’  songote cimeeyye heda dandaatto. Assootinsannino ikko coyiˈrannorinni “dancha coye rosiisannore” meya roduuwano heda dandaatto. (Tit. 1:8; 2:3) Rooziliyiini yinanni rodoo togo yitino: “Jaalaˈya songote giddo woloota kaaˈlatenna jawaachishate sharrantanno. Ise insa noo gara heddanno, hattono duucha woyite insara shiima aamamooshshe uyitanno woy wolere assite kaaˈlitanno. Danchaho yinannihu ise gedee manna lawannoe.”

Yihowa soqqamaanosi ‘dancha coye hassanno’ gede jawaachishinonsa. (Amo. 5:14) Hatto assanke, Yihowa seera banxeemmo gede calla ikkikkinni danchare assate murciˈneemmo gede jawaante ikkitannonke.

Wolootaho danchumma leellishate yaa, hoola yinoonni aamamooshshe aate woy lowore assate yine heda dihasiissannonke. Hanni konne lawishsha hedi: Muˈro lophitannohu waa mitte hinge calla faa assine dunne agurreenna ikkikkinni shiima shiima waa duucha hinge hayikkinsirooti. Hatteente gede, danchummanke babbaxxitino doogganni leellisha dandiineemmo.

Qullaawu Maxaafi danchare assate ‘qixxaambeemmo’ gede jawaachishannonke. (2 Xim. 2:21; Tit. 3:1) Wolootu noo gara illachinsheemmoha ikkiro, manna “dhaawate danchanna hagiirsiisannonsa coye” assineemmo faro hasiˈneemmo. (Rom. 15:2) Togo assa dandiineemmo doogga giddo mitte noonkere insara aate. (Law. 3:27) Manna sagale koyisa woy ledonke jawaachishanno hasaawa hasaawanno gede koyisa dandiineemmo. Dhiwaminohu noota anfummoro, sokka borreessine soya, maˈre laˈˈa, woy silke bilbila dandiineemmo. Konnira “wole manna hasiisinonsa garinni dhaawatenna macciishshitannorira qiniite ikkanno gede dancha coye” coyiˈneemmo faro hasiˈno.—Efe. 4:29.

Yihowa gede, baalunku mannira danchare assa hasiˈneemmo. Konnira manna dimallaandeemmo. Manna mallaandeemmokkita leellisha dandiineemmoti kaajja doogo, Maganu Mangisteha dancha duduwo baalunkura duduwate. Yesuusi hajajinonke garinni, giwannonke mannirano nafa danchare assa hasiˈneemmo. (Luq. 6:27) Mannaho shaqqille leellishanna danchare assa horo soˈro diˈˈikkitino; korkaatuno “togoore giwanno seeri dino.” (Gal. 5:22, 23) Mannu giwannanke woy qarru iillanni heeˈreennanke danchare assineemmoha ikkiro, wolootu halaalu minira dagganno gede kaaˈlinammoranna Maganu ayirranno gede assinammora dandiineemmo.—1 Phe. 3:16, 17.

“Danchu [manchi] loosiˈrinore adhanno.” (Law. 14:14) Danchare assa mayi horo afidhino? Wolootaho danchare assineemmoha ikkiro, insano ninkera hatto assitankera dandiitanno. (Law. 14:22) Wolootu danchare assa hooggunkerono nafa, agurrummokki danchumma leellishanke wodaninsa shaqqannonna hedonsa biddi assidhanno gede kaaˈlitansara dandiitanno.—Rom. 12:20.

Batinyu manni danchare assansanna bushu coyiwiinni xeertiˈransa kaaˈlitinonsata huwatino. Hanni Naansii yinanni rodoo lawishsha laˈno. Ise togo yitino: “Ani anjeˈyanni kayise xelleqqisate, amanyoote bainore asseemmatenna manna diayirriseemmate. Maganu rosiisannori danchare ikkinota huwatanna konne roso harunsa hanafummati kayinni roore hagiirraame ikkoommo. Xa aneneetira dancha lao nooe.”

Danchumma leellinsheemmo gede assannonkehu baalunkunni roorino korkaati hatto assanke Yihowa hagiirsiissanno daafiraati. Assineemmore mannu laˈˈa hoogirono nafa, Yihowa laˈˈanno. Isi assineemmoha mitto mittonka dancha coyeno ikko hedonke afino. (Efe. 6:7, 8) Tini mayi guma abbitanno? “Keeraano [woy danchuulle] Kaaliiqi baxanno.” (Law. 12:2) Konni daafira, danchare assanke agurroonke. Yihowa “Dancha looso loossannore baala galantanninsa; ayirrinyenna keereno uyinanninsa” yee qaale eino.—Rom. 2:10.