1. Yesuusa banxeemmo gede assannonke coyi giddo mittu maati? Xawisi.

 YESUUSA banxeemmo gede assannonke coyi giddo mittu, isi guuntete xeꞌne noonsari mannu oosora tuncu yaannonsa qarra huwatannoha ikkasiiti. Isi uullate aana noo yannara, “hagiidhitannori ledo [hagiidhino]”; hattono “wiꞌlitannori ledo [wiꞌlino].” (Rom. 12:15) Lawishshaho, 70 rosaanosi sabbakate loosinsanni dancha guma afidhe hagiidhitanni higgu yannara, Yesuusi “Qullaawu Ayyaaninni [hagiidhino].” (Luq. 10:17-21) Wole widoonni qole, Aliaazaari reyi yannara shiiꞌrino ayiddi xissiisiꞌrino gara lae Yesuusi “lowo geeshsha marare cinca hooge” wiꞌlino.—Yoh. 11:33.

2. Yesuusi manna mararanno gede assinosiri maati?

² Kuni guutu manchi, cubbaataamma ikkitinota mannu ooso maarannonna mararanno gede assinosiri maati? Qaru korkaati, Yesuusi manna baxanno daafiraati. Sai birxichira ronsummonte gede, isi “mannu sirchinni [hagiidhino].” (Law. 8:31) Mannaho noosi baxilli wolootu hedo seekke huwatanno gede assinosi. Soqqamaasinchu Yohaannisi “Isi mannu wodanire baala egennino” yiino. (Yoh. 2:25) Yesuusi manna godowinta mararanno. Yesuusi sabbakinonsa manni isi baxannonsata huwatino daafira, kulinonsa sokka macciishshino. Mannaho noonke baxilli lexxanni haꞌri kiiro, sabbakate loosinkenni roore guma afiꞌneemmo.—2 Xim. 4:5.

3-4. (a) Manna mararreemmoha ikkiro, sabbakate loosinkera hiittoo lao heedhannonke? (b) Konni birxichira maa ronseemmo?

³ Soqqamaasinchu Phaawuloosi dancha duduwo duduwate giddeeti noosita afino; ninkeno hatto assa hasiissannonketa anfoommo. (1 Qor. 9:16) Ikkollana manna mararreemmoha ikkiro sabbankeemmohu togo assa hasiissannonke daafira calla ikkikkinni mannaho hendeemmonna insa kaaꞌla hasiꞌneemmo  daafiraati. ‘Adhannonkunni aannohu baꞌraaꞌrinoha [woy hagiirraamo]’ ikkinota anfoommo. (Soq. 20:35) Sabbankeemmohu manna kaaꞌla hasiꞌneemmo daafira ikkiro, soqqanshonkenni roore hagiirraamma ikkineemmo.

⁴ Konni birxichira, soqqammeemmo woyite manna marara dandiineemmo gara ronseemmo. Balanxe Yesuusi manna mararino doogonni maa ronseemmoro laꞌneemmo. Hakkiinni isi lawishsha harunsa dandiineemmota shoole doogga xiinxallineemmo.—1 Phe. 2:21.

5-6. (a) Yesuusi ayeoo mararino? (b) Isayaasi 61:1, 2te masaalloonni garinni, Yesuusi sabbakino manna mararinohu mayiraati?

⁵ Hanni Yesuusi manna mararannota leellishanno lawishsha laꞌno. Mitto barra Yesuusinna rosaanosi dancha duduwo fooliishshidhukkinni sabbakkanni hossino. Wole agurina insa “sagale ittanno gara” nafa hooggino. Konnira Yesuusi ‘fooliishshidhanno’ gede “mannu nookkiwa” haaꞌre haꞌrinonsa. Ikkollana Yesuusinna rosaanosi hadhannowa batinyu manni balaxe iillino. Yesuusi hakkira marita mayi macciishshaminosi? Isi “lowo manni allaalaanchu nookki geꞌreewi gede ikkinota lae marare, b lowo coye rosiisinsa.”—Maq. 6:30-34.

⁶ Yesuusi konne manna mararinohu mayiraati? Isi kuni manni “allaalaanchu nookki geꞌreewi gede ikkinota” coyiꞌrino. Yesuusi konni manni giddo mitu buxane ikkinotanna maatensara hasiisannore abbate lowo saate loosannota huwatinoha ikkara dandaanno. Qoleno wolootu shiidhe manchittinoha ikkara dandaanno. Hatto ikkiro, Yesuusira qarrinsa leellannosi. Sai birxichira ronsummonte gede, Yesuusi umisira konni giddo mitu qarri iillinosiha ikkara dandaanno. Isi mannaho hedanno daafira, insara sheshifachishshanno sokka kulate hedino.—Isayaasi 61:1, 2 nabbawi.

7. Yesuusi lawishsha harunsa dandiineemmohu hiittoonniiti?

⁷ Yesuusi lawishshinni maa ronseemmo? Yesuusi gede ninkeno “allaalaanchu nookki  geꞌreewi gede ikkino” manni mereero heeꞌnoommo. Insara lowo qarri iillannonsa. Qoleno ninkera insara hasiisanno coyi noonke; hattino Maganu Mangiste sokkaati. (Aju. 14:6) Konnira, ‘buxanenna wolqiweeloota mararreemmo’ daafira, Mootichinke lawishsha harunsine dancha duduwu dudumbeemmo. (Far. 72:13) Hattono mannaho hendeemmo daafira, insa kaaꞌla hasiꞌneemmo.

8. Soqqammeemmo woyite manna marara dandiineemmo doogga giddo mitte maati? Lawishsha kuli.

⁸ Sabbankeemmo manna mararreemmo gede mayi kaaꞌlankera dandaanno? Sabbankeemmo woyite xaandeemmo mannira iillannonsa coyi ninkera iillanni noonkehu gede assine hedanna ninkera assinankera hasiꞌneemmore insarano assa hasiissannonke. c (Mat. 7:12) Hanni togo assa dandiineemmota shoole doogga laꞌno. Umihunni, mittu mittunkura mayi hasiisannoro hedi. Sabbakate loosi, akimootu loossanno loosi gedeeti. Danchu akimichi mittu mittunku dhiwamino manchira mayi hasiisannoro hedanno. Isi xaꞌmo xaꞌmanno, hattono dhiwamino manchi assinosita kuꞌlanno woyite seekke macciishshanno. Isi hedino xagicho sammi yee dihajajanno; hatteentenni boode yanna geeshsha dhiwamino mancho amadinosi dhibba huwatate woꞌnaalanno; hakkiinni hasiisannosi xagicho hajajanno. Hatteente gede, ninkeno soqqammeemmo woyite manna baala mittu garinni hasaawisa dihasiissannonke. Hatteentenni mittu mittunku manchi noo garanna ammananno coye huwatate woꞌnaala hasiissannonke.

9. Mayine heda dihasiissannonke? Xawisi.

⁹ Soqqantinanni heedhine mittu manchi ledo xaaddinanni woyite, hakku manchi noo gara, isi ammanannore, hattono hakko coye mayira ammanannoro guddine affinoonnihu gede assitine heddinoonte. (Law. 18:13) Hatteentenni hayyoteni xaꞌmo xaꞌmitine hedosi afate woꞌnaalle. (Law. 20:5) Qooxeessiꞌnera rosaminore ikkiro, loosisi daafira, maatesi daafira, heeshshosi giddo tuncu yiinosire, hattono ammanannore xaꞌma dandiitinanni. Mannu hedonsa kulannonke gede xaꞌmineemmo woyite, danchu duduwi hasiisannonsahu mayiraatiro kultannonke gede xaꞌminanni heeꞌnoommohu gedeeti. Tenne anfummo gedensaanni, Yesuusi gede insara hendeemmota leellishanna hasiissannonsa kaaꞌlo kaaꞌla dandiineemmo.—1 Qorontoosi 9:19-23te ledo heewisiisi.

10-11. Layinki Qorontoosi 4:7, 8te garinni, Manna marara dandiineemmoti layinki doogo hiittenneeti? Lawishsha kuli.

¹⁰ Layinkihunni, hiittoo heeshsho heedhannoro hedate woꞌnaali. Woꞌmunni woꞌma ikka hoogirono soqqammanni xaandeemmo manni hedo huwata dandiineemmo. Korkaatuno guuntete xeꞌne noonkere ikkinoommo daafira,  ninkerano wolu mannira iillannonsa qarri iillannonke. (1 Qor. 10:13) Heeꞌnoommo alame giddo heeshsho qarru woꞌminota ikkitinota anfoommo. Cincine heeꞌra dandiineemmohu Yihowa kaaꞌlonni callaati. (2 Qorontoosi 4:7, 8 nabbawi.) Ikkollana Yihowa ledo muli jaalooma kalaqirinokki mannira tenne alame giddo iillannonsa fonqolo dandee heeꞌra mageeshshi geeshsha qarra ikkitannonsaro hedi. Yesuusi gede, ninkeno mararreemmonsa, hattono insara “dancha duduwo” kula hasiꞌneemmo.—Isa. 52:7.

¹¹ Hanni Serge yinanni rodii lawishsha laꞌno. Serge halaale rosara albaanni manna ille qase laꞌꞌa waajjannohonna sammiimaho. Isira hedosi mannaho xawisa qarra ikkitannosi. Gedensoonni isi Qullaawa Maxaafa xiinxalla hanafino. Serge togo yiino: “Qullaawa Maxaafa xiinxallummoti, Kiristaanu ammanansa wolootaho kula hasiissannonsata rosummo. Ani kayinni hatto assa horo didandeemmo yee hedummo.” Ikkirono isi halaale rosinokki manna hedino, hattono kuni manni Yihowa daafira afinokkihura heeshshonsa mageeshshi geeshsha qarraataame ikkitannoro hedino. Isi togo yiino: “Rosanni noommohu haaru rosi lowo hagiirrenna giddiidi harshammo afiꞌreemmo gede assinoe. Wolootuno konne halaale rosa hasiissannonsata huwatoommo.” Serge manna albinni roore marara hanafiti, sabbakate roore worbimma afiꞌranni haꞌrino. Isi togo yiino: “Wolootaho Qullaawa Maxaafa rosiisaꞌya waajjeemmokki gede kaaꞌlitinoe. Qoleno hatto assaꞌya ammanaꞌya kaajjitanno gede assitinoe.” d

12-13. Soqqammeemmo yannara cincineemmore ikka hasiissannonkehu mayiraati? Lawishsha kuli.

¹² Sayikkihunni, manna rosiisatto woyite cinca ikki. Soqqamatto woyite xaadatto manni giddo mitu, ninke seekkine anfoommoha mito Qullaawu Maxaafi halaale insa horo afinokkiha ikkara dandaanno. Qoleno batinyu mannira uminsahu ammananno coyi noonsa. Hattono ammanansa maatensa, budinsanna dagoominsa ledo noonsa aante kaajjishshannohu gede asse hedanno. Ikkina insa kaaꞌla dandiineemmohu hiittoonniiti?

 ¹³ Hanni konne coye hedi: Mittu buusi akkalino daafira wole kara hasiꞌniro maa assinanni? Duucha woyite mannu albi buusa horoonsiꞌranni heeꞌreenna, wole haaro buusa karranni. Haaro buusa karre gundi gedensaanni, akkala hoola dandiinanni. Hatteente gede, mannu “akkala” rosonsa aguranno gede kullammora albaanni, balanxe xa rosanni nooha “haaro” roso yaano konni albaanni afinokkiha Qullaawu Maxaafi halaale seekke huwatanno gede assa hasiissanno. Konni albaanni noonsa lao biddi assiꞌra dandiitannohu, hatto assinummoro callaati. Mannu konni garinni hedonsa biddi assiꞌranno gede kaaꞌlate yanna hasiissanno.—Rom. 12:2.

14-15. Gannate ikkitino uullara hegerera heeꞌrate hexxo daafira afinokki manna kaaꞌla dandiineemmohu hiittoonniiti? Lawishsha kuli.

¹⁴ Sabbankeemmo woyite manna cincineemmoha ikkiro, Qullaawu Maxaafi halaale macciishshitanni heedhenni adhitanno yine dihendeemmo. Hatteentenni, manna mararreemmoha ikkiro Qullaawu Maxaafi roso sunu sununni huwatanno gede kaaꞌlineemmo. Lawishshaho, hanni uullate aana Gannatete heeꞌrate hexxonke daafira mannaho xawisa dandiineemmo gara hedi. Batinyu manni konni rosi daafira garire diafino; mitootu isinni tenne hexxo daafira affinori dino. Insa reyo baalunku coyira gumulote yite heddannoha ikkara dandaanno. Woy danchu manni baalu iimira haꞌranno yite ammantannoha ikkara dandaanno. Togoo manna kaaꞌla dandiineemmohu hiittoonniiti?

¹⁵ Mittu rodii gannate ikkitino uulla aana hegerera heeꞌrate daafira mannaho xawisanno gara coyiꞌrino. Isi balaxe Kalaqama 1:28 nabbawanno. Hakkiinni hasaawisanni noo mancho Maganu mannu ooso hiikko heedharanna hiittoo heeshsho heedhara hasiꞌrannoro xaꞌmanno. Batinyu manni “Uullate aana hagiirru noo heeshsho heedhara hasiꞌranno” yee qolanno. Hakkiinni kuni rodii Isayaasi 55:11 nabbawi gedensaanni “Maganu hedinori xa soorraminoni?” yee xaꞌmanno. Duucha woyite mannu “Disoorramino” yee qolanno. Jeefote isi Faarso 37:10, 11 nabbawi gedensaanni mannu ooso albillitte ma ikkitannoro xaꞌmanno. Isi kuri qummeeshshuwa horoonsiꞌre, Maganu xaano danchu manni Gannate ikkitino uullara hegerera heeꞌrara hasiꞌrannota huwatanno gede batinye manna kaaꞌlino.

16-17. Lawishsha 3:27 kultanno garinni, manna mararreemmota leellisha dandiineemmoti mite doogga hiikkuriiti? Lawishsha kuli.

¹⁶ Shoolkihunni, Danchumma leellisha dandaatto gara hedi. Lawishshaho, mannu minira maroottohu insara injiitannokki yannara ikkara dandaanno. Togoo yannara, maaro xaꞌmidhe wole woyite daattota kulte haꞌra dandaatto. Woy farciꞌrattora marootto manchira kaaꞌlinanni loosi noohalla ikki? Woy mittu mininni fule afannokki manchi soqqannoha hasiꞌrannohalla ikki? Togoo manninni xaandeemmo woyite kaaꞌlinammonsara dandiineemmo.—Lawishsha 3:27 nabbawi.

 ¹⁷ Mitte rodoo danchumma leellishshe dancha guma afidhino. Ise mitte qaaqqo shiidhino maate marartino daafira, sokka borreessitinonsa. Ise sokkate giddo mite sheshifachishshannota Qullaawa Borro hedo borreessitino. Ikkina hatte maatera mayi macciishshaminonsayya? Qaaqqu ama togo yitino: “Beꞌro barru tunse hosinoe. Soottanke sokka baasa kaaꞌlitinonke. Sheshifachishshanno sokka soottanke daafira, lowo geeshsha galaxxeemmahe. Tenne sokka ajayi ajeenna 20 hige nabbawummakki digatoomma. Tini sokka danchummanna shaqqillu woꞌminote, jawaachishshannotenna sheshifachishshannote. Godowinta galaxxineemmohe.” Wolu manni qarra uminkehu gede assine laꞌneemmohanna insa kaaꞌlineemmoha ikkiro, dancha guma afiꞌneemmoti egennantinote.

18. Umi Qorontoosi 3:6, 7te garinni, soqqanshonke daafira maa qaaga hasiissannonke?

¹⁸ Soqqammeemmo woyite, ninke qeechi maatiro dea dihasiissannonke. Wolootu Maganu daafira rossanno gede kaaꞌla dandiineemmoha ikkirono, qaru loosi kayinni ninkeha diꞌꞌikkino. (1 Qorontoosi 3:6, 7 nabbawi.) Manna minisira abbannohu Yihowaati. (Yoh. 6:44) Mittu mittunku manchi wodanisi garinni dancha duduwo macciishshe adhara woy hoogara dandaanno. (Mat. 13:4-8) Uullate aana heeꞌrino manni baalunkunni roore Rosiisaancho ikkirono, batinyu manni Yesuusi sokka macciishshinokkita qaagi. Konni daafira, batinyu manni dancha duduwo macciishsha giwiro hexxo mudha dihasiissannonke.

19. Soqqammeemmo yannara manna mararanke kaaꞌlitannonkehu hiittoonniiti?

¹⁹ Soqqammeemmo woyite manna mararreemmoha ikkiro, dancha guma afiꞌneemmo. Hatto assinummoro, sabbakate loosi albinni roore baxisannonke. Qoleno mannaho uyine afiꞌnanni hagiirre afiꞌneemmo. Hattono “hegere heeshsho afiꞌrate gara ikkitinoti wodanu dooꞌꞌo noonsari” dancha duduwo macciishshite adhitanno gede kaaꞌlineemmo. (Soq. 13:48, NW) Konnira, “Coyi injiinkero, manna baalaho . . . dancha coye assino.” (Gal. 6:10) Hatto assinummoro, iimi Anninke ayirranno daafira tashshi yaannonke.—Mat. 5:16.