1-2. (a) Yihowa mannu ooso hasaawisannohu hiittoonniiti? (b) Konni birxichira maa ronseemmo?

YIHOWA soqqamaasinesi hasaawisa baxanno. Isi hundi yannara, hedosi kulate masaalaano, sokkaasinenna Beettosi Yesuusi Kiristoosa horoonsiˈrino. (Amo. 3:7; Gal. 3:19; Aju. 1:1) Xaa yannara Qaalisi Qullaawu Maxaafi widoonni hasaawisannonke. Isi Qullaawa Maxaafa uyinonkehu hedosinna doogosi ronseemmo gedeeti.

² Yesuusi uullate aana noo yannara, Yihowa iima heeˈre sase hige coyiˈrino. Hanni Yihowa tenne yannara mayinoro, isi coyiˈrinorinni maa ronseemmoronna coyiˈrinori ninke kaaˈlannonkehu hiittoonniitiro laˈno.

3. Maarqoosi 1:9-11 kultanno garinni, Yesuusi cuuami yannara Yihowa mayyee coyiˈrino? Yihowa coyiˈrinori hiikkonne halaale huwanteemmo gede assannonke?

³ Maarqoosi 1:9-11 Yihowa iima heeˈre coyiˈrinote umi yannare kultanno. (Qummeeshsha nabbawi.) Isi, “Hagiirsiisattoehu baxeemmo Beettiˈya ateeti” yiino. Yesuusi Annisi baxannositanna ammanannosita kulisi woyite mageeshshi geeshsha hagiidhinoro heda dandaatto! Yihowa coyiˈrinori Yesuusi daafira sase halaale huwanteemmo gede assannonke. Umihunni, Yesuusi Maganu Beettooti. Layinkihunni, Yihowa Beettosi baxanno. Sayikkihunni, Yihowa Beettisi hagiirsiisannosita coyiˈrino. Hanni xa konne sasenka coye seekkine xiinxallino.

4. Yesuusi cuuami yannara Maganu ledo hiikkonne haaro jaalooma kalaqiˈrino?

⁴ “Beettiˈya ateeti.” Yihowa togo yee coyiˈrasi, muxxe Beettisi Yesuusi Isi ledo haaro jaalooma kalaqiˈrinota leellishshanno.  Yesuusi iima noo yannara, Maganunniho ayyaanaamo beettooti. Cuuami yannara kayinni qullaawu ayyaaninni buuramino. Hatte yannara Yihowa, Yesuusi galagale iimira haˈre Maganu Mangiste Mootenna Kakkalaanote Biilo ikkate hexxo noosita buuxisino. (Luq. 1:31-33; Ibi. 1:8, 9; 2:17) Konni daafira, Yesuusi cuuami yannara Annisi, “Beettiˈya ateeti” yaasi garankolla.—Luq. 3:22.

5. Mannaho baxille leellishatenna jawaachishate Yihowa lawishsha harunsa dandiineemmohu hiittoonniiti?

⁵ “Baxeemmo beettiˈya.” Yihowa Beettosi baxannotanna isi hagiirsiisinosita coyiˈrasi, ninkeno woloota jawaachinsheemmo faro hasiˈneemmo gede assitannonke. (Yoh. 5:20) Mittu ayirrinseemmo manchi baxille leellishannonkenna assinoommohu danchu coyiˈra galatannonke woyite tashshi yaannonke. Hatteente gede, songote noo roduuwinkera baxille leellishanna insa jawaachisha hasiissannonke. Woloota galatanke, ammanansa kaajjitannonna Yihowara ammanante soqqantanno gede kaaˈlitannonsa. Roorenkanni annuwunna amuuwu oosonsa jawaachisha hasiissannonsa. Annuwunna amuuwu oosonsa godowinta galatansanna baxille leellishansa oosonsa lattanno gede assitanno.

6. Yesuusi Kiristoosa addaxxa dandiineemmohu mayiraati?

⁶ “Hagiirsiisattoe.” Yihowa hatto yaasi, Yesuusi ammaname Annisi fajjo wonshannota ammanannota leellishshanno. Yihowa Beettosi ammanino; ninkeno Yesuusi Yihowa eino qaale woˈmunni woˈma ammaname wonshannota addaxxa dandiineemmo. (2 Qor. 1:20) Yesuusi lawishsha hendeemmo woyite, albinni roore isiwiinni rosatenna faalesi haˈrate murciˈneemmo. Yihowa Yesuusa  ammanannonte gede, soqqamaasinesino gaamote deerrinni Beettisiwiinni rosa agurtannokkita ammananno.—1 Phe. 2:21.

7. Maatewoosi 17:1-5 kultanno garinni, Yihowa iima heeˈre coyiˈrinohu hiitte yannaraati? Hatte yannara isi mayyiino?

⁷ Maatewoosi 17:1-5 nabbawi. Yihowa iima heeˈre layinkimeeshsho coyiˈrinohu, Yesuusira “danisi wole ikki” yannaraati. Yesuusi, Pheexiroosi, Yaiqoobinna Yohaannisi ledo mitto jawa ilaala haˈrino. Hakkiicho, insa mitte dhagge ikkitanno ajuuja laˈino. Yesuusi albi arrishshote gede ikke xawino, hattono uddanosi waajjo qoffe ikkite caabbichimma xabbino. Musenna Eeliyaasi riqiwannohu lamu manni, Yesuusi reyannotanna reyotenni kaˈˈannota coyiˈra hanaffino. Hakka woyite, sasenti soqqamaasine goxxe nooha ikkirono, goxichunni baqqi yitu yannara tenne dhagge ikkitanno ajuuja laˈino. (Luq. 9:29-32) Hakkiinni waraˈa yee xawanno gomichi golinonsa, hattono gomichu giddonni Maganu huuro macciishshitino! Yihowa Yesuusi cuuami yannara assinonte gede, xaano Beettosi baxannotanna isi hagiirsiisinosita xawisino; Yihowa “Hagiirsiisannoehu baxeemmo Beettiˈya konneeti” yiino. Tenne yannara kayinni Yihowa “Isi [Yesuusi] yaannota macciishshe” yiino.

8. Ajuuja Yesuusanna rosaanosi kaaˈlitinonsahu hiittoonniiti?

⁸ Tini ajuuja Yesuusi Maganu Mangiste Moote ikkanno woyite afiˈranno ayirrinyenna wolqa leellishshannote. Tini, Yesuusi qarranna shetto adhanno woyitira jawaantenna wolqa ikkitinositi dihuluullissannote. Qoleno tini ajuuja, Yesuusi rosaanora ammanansa kaajjishshino; hattono ammanamansa fonqolannoriranna albillitte loossannohu lowo loosira jawaante ikkitinonsa. Mitu 30 diri gedensaanni, soqqamaasinchu Pheexiroosi Yesuusi dani soorramino yannare coyiˈrino; tini isi hatte ajuuja hawinokkita leellishshanno.—2 Phe. 1:16-18.

9. Yesuusi harunsaanosira hiittenne kaajja amaale uyino?

⁹ “Isi yaannota macciishshe.” Yihowa Beettisi rosiisinore macciishshinammoranna isira hajajammammora hasiˈrannota xawisino. Yesuusi uullate aana noo yannara maa rosiisino? Yesuusi ninke harunsa hasiissannonkeha lowo roso rosiisino! Lawishshaho, isi rosaanosira dancha duduwo dudubbanno gara rosiisinonsa; hattono baqqi yite agadhitanno gede duucha hige qaagiissinonsa. (Mat. 24:42; 28:19, 20) Qoleno hegere heeshsho afiˈrate sharrantannonna hexxo mudhitannokki gede jawaachishinonsa. (Luq. 13:24) Yesuusi, harunsaanosi insa insanaawa baxantanno gede, mittimmansa agadhite heedhanno gedenna hajajosi harunsitanno gede luphi asse kulinonsa. (Yoh. 15:10, 12, 13) Addanko, Yesuusi uyino amaale kaajjate! Tini amaale hunda heeˈrino mannano ikko xaa yannara noo manna kaaˈlitannote.

10-11. Yesuusi rosiisinore macciishshinanni heeˈnoommota leellisha dandiineemmohu hiittoonniiti?

¹⁰ Yesuusi togo yiino: “Halaalu widoonni uurrinohu qaaleˈya macciishshanno.” (Yoh. 18:37) “Kiˈne kiˈneneewa koffi yitinoonni coye baala cincatenni agurre” yitanno amaale harunsineemmoha ikkiro, Yesuusi huuro macciishshinanni heeˈnoommo. (Qol. 3:13; Luq. 17:3, 4) Qoleno ‘injiinkerono injaa hooginkerono’ dancha duduwo diinaggaambe dudumbeemmoha ikkiro, Yesuusi yaannore macciishshinanni heeˈnoommo.—2 Xim. 4:2.

¹¹ Yesuusi, “Geˈreewiˈya huuroˈya macciishshanno” yiino. (Yoh. 10:27) Yesuusi harunsaano isi huuro macciishshitannohu isi rosiisinore wodanaho wodhite calla ikkikkinni  isi rosiisinore harunsiteeti. Isi harunsaano ‘tenne alame heeshshora yaaddanni’ hedonsa billaallitanno gede diassidhanno. (Luq. 21:34) Hatteentenni, insa qarru iillannonsa yannara nafa, heeshshonsa giddo Yesuusi hajajo balaxisiissanno. Batinyu roduuwinkera buutote qarri iillanni noonsa; insa giddo mitoota gibbannonkeri xiibbannonsa, angate anje amaddinonsa, hattono kalaqamu dano iillitannonsa. Iillannonsa fonqoli ikki geeshshiha ikkirono, insa Yihowara ammanantino. Yesuusi insa togo yee sheshifachishino: “Hajajoˈya adhannohunna wonshannohu baxannoeho; ane baxannoha Anniˈyano baxannosi.”—Yoh. 14:21.

12. Yesuusa macciishshinanni heeˈnoommota leellisha dandiineemmoti wole doogo hiittenneeti?

¹² Yesuusa macciishsha dandiineemmoti wole doogo, Maganu manni mereero albisa ikkite soqqantanno gede shoommoonni roduuwi ledo buusame loosate. (Ibi. 13:7, 17) Maganu dirijjite muli diri kawa lowo coye woyyeessitino; lawishshaho, soqqanshote horoonsiˈneemmo hayyonna uduunnicho, lamalate gambooshshe, Gambooshshu Addaraashuwa minnanninna gatamarranni gara woyyeessinoonni. Yihowa dirijjite baxillunninna seekkite hedde uyitannonke biddishsha lowo geeshsha naandeemmo! Yihowa dirijjitesi uyitannonke biddishsha harunsate sharrammeemmo sharro maassiˈrannota dihuluullammeemmo.

13. Yesuusa macciishsha kaaˈlitannonkehu hiittoonniiti?

¹³ Yesuusi rosiisinore baalare macciishshanke kaaˈlitannonke. Yesuusi harunsaanosira, rosiisanno rosi jawaachishannoha ikkinota buuxisinonsa. Isi togo yiino: “Lubboˈnera fooliishsho afidhinanni. Qambariˈya diayirranno; duhiˈyano shotaho.” (Mat. 11:28-30) Yesuusi heeshshonna soqqanshore kultannoti shoole Wongeeluwano ikko woˈmu Maganu Qaali sheshifachishannonke, ayyaanaamittenke jawaachishanno, hattono hayyoota ikkineemmo gede assannonke. (Far. 19:7; 23:3) Yesuusi, “Maassantinori Maganu qaale macciishshite hajajantannoreeti” yiino.—Luq. 11:28.

14-15. (a) Yohaannisi 12:27, 28 kultanno garinni, Yihowa iima heeˈre sayikkimeeshsho coyiˈrinohu hiitte yannaraati? (b) Yihowa coyiˈrinori Yesuusira jawaantenna wolqa ikkinosi yineemmohu mayiraati?

¹⁴ Yohaannisi 12:27, 28 nabbawi. Yohaannisi Wongeeli Yihowa sayikkimeeshsho iima  heeˈre coyiˈrino yannare kulanno. Yesuusi reyara boodu barri albaanni Faasika ayirrisate Yerusaalame haˈrino. Isi, “Lubboˈya shettino” yiino. Hakkiinni isi “Annaˈya, suˈmakki ayirrisi!” yee huucciˈrino. Annisi iima heeˈre, “Suˈmaˈya ayirrisoommo; ledeno ayirriseemmo” yee qolino.

¹⁵ Yesuusi Yihowara ammaname heeˈra hasiissannosita wodanchino daafira, lowo geeshsha yaadino. Yesuusi gannannisitanna qarrinse shinannisita afino. (Mat. 26:38) Baalunkunni roore, Yesuusi Annisi suˈmi ayirranno gede assa hasiˈrino. Yesuusi Magano xonino yine kassansoonnisi daafira, reyosi Yihowa suˈmi mishamanno gede assitanno yee yaadino. Konni daafira, Yihowa coyiˈrinori Yesuusa sheshifatanno gede assinositi egennantinote! Isi Yihowa suˈmi ayirrannota huwatino. Yihowa coyiˈrinori, Yesuusa jawaachishinosi, hattono iillannosi qarra qeele saˈˈanno gede wolqa ikkinosi. Hatte yannara Yihowa coyiˈrinore huwatinohu Yesuusa calla ikkara dandaanno; ikkollana, Yihowa tini hedo ninkerano kaaˈlitannonketa afino daafira, Qullaawu Maxaafi giddo borreessinanni gede assino.—Yoh. 12:29, 30.

16. Mite yannara Maganu suˈmi mishamanno yine yaandammora dandiineemmohu mayiraati?

¹⁶ Ninkeno Yesuusinte gede, Yihowa suˈmi mishamara dandaanno yine yaandeemmoha ikkara dandaanno. Yesuusi gede ninkerano taashsho xeˈinori iillanni noonkeha ikkara  dandaanno. Woy gibbannonkeri ninke daafira kapho coyidhanno woyite, lowo geeshsha dadillinammora dandiineemmo. Insa coyidhanno kaphi, Yihowanna dirijjitesi mishantanno gede assanno yine hendeemmoha ikkara dandaanno. Tenne yannara, Yihowa Yesuusira coyiˈrinori lowo geeshsha sheshifachishannonke. Konnira quwa saˈne yaada dihasiissannonke. “Mannu hedora aleenni ikkinohu Maganu keeri, Kiristoosi Yesuusinni wodanaˈnenna hedoˈne” agarannota huluullantinoonte. (Fil. 4:6, 7) Yihowa suˈmisi ayirranno gede assanno. Isi Mangistesi widoonni Sheexaanunna alamesi Maganu soqqamaasinera iillishshanno qarra baala hunanno.—Far. 94:22, 23; Isa. 65:17.

17. Isayaasi 30:21 kultanno garinni, Yihowa xaa yannara hasaawisannonkehu hiittoonniiti?

¹⁷ Yannankerano Yihowa hasaawisanni noonke. (Isayaasi 30:21 nabbawi.) Yihowa iima heeˈre coyishiishannonke yine dihendeemmo. Ikkollana isi Qaalisi Qullaawu Maxaafi widoonni biddishsha aannonke. Qoleno Yihowa ayyaani “ammanamino soqqamaanchi” Maganu mannira sagale qixxeessanno gede kakkayisannosi. (Luq. 12:42) Yihowa dirijjite attammoonnita, viidiyotenninna huurotenni qaddaˈnoonnita hattono webisayitete widoonni falakkinota ayyaanaamittete sagale shiqishshannonke.

18. Yihowa coyiˈrinori, ammanakki kaajjisharanna worba ikkatto gede kaaˈlahera dandaannohu hiittoonniiti?

¹⁸ Yihowa Beettisi uullate aana heeˈreenna coyiˈrinore qaango! Qullaawu Maxaafi giddo borreessinoonniti Yihowa coyiˈrino qaalla, isi wolqara aleenni ikkinori nookkitanna Sheexaanunna busha alamesi abbitino qarra baala feye hunannota addaxxineemmo gede assitannonke. Qoleno woˈmante yannara Yihowa huuro macciishshate murciˈno! Hatto assinummoro, xaano ikko albillitte iillannonkeha aye geeshshi fonqolo qeela dandiineemmo. Qullaawu Maxaafi togo yee jawaachishannonke: “Maganu hedinore wonshitine aaˈnera hexxo uyinoˈne coye afiˈrate, cincitine agadha hasiissannoˈne.”—Ibi. 10:36.