1-2. Soqqamaasinchu Phaawuloosi lawishshi xaa yannara songote cimeeyye kaaˈlannonsahu hiittoonniiti?

 SOQQAMAASINCHU PHAAWULOOSI ammanate roduuwasi lowo geeshsha baxanno. Isi insa towaatate diinaggaawe loosino. (Soq. 20:31) Ammanate roduuwisi Phaawuloosi lowo geeshsha baxxannohu iseraati. Mitte yannara, Efesooni songora heedhanno cimeeyye galagalte isinni xaaddannokkita affuti iso “cuˈmidhe wiˈlitino.” (Soq. 20:37) Diinaggaabbe loossanno cimeeyyeno ammanate roduuwansa lowo geeshsha baxxanno hattono insa kaaˈlate dandiiture baala assitanno. (Fil. 2:16, 17) Ikkirono mito woyite cimeeyyete qarra ikkanno coyi tuncu yaannonsa. Insa konne qarra dandiite saˈanno gede kaaˈlannonsari maati?

² Diinaggaabbe loossannori songonke cimeeyye Phaawuloosi lawishsha xiinxalla dandiitanno. (1 Qor. 11:1) Phaawuloosino ninke gedee manchootilla. Isino guuntete xeˈne noosi mancho ikkino daafira gara ikkinore assate mito woyite sharrama hasiissinosi. (Rom. 7:18-20) Isira addi addi qarri iillinosi. Kayinni Phaawuloosi hexxo dimudhino hattono hagiirrisi dibaino. Songote cimeeyye Yihowara soqqantanno woyite, Phaawuloosi lawishsha harunsite iillannonsa qarra dandiite saˈˈanna hagiirrinsa baˈˈannokki gede assiˈra dandiitanno. Hanni insa tenne assa dandiitannohu hiittoonniitiro laˈno.

3. Konni birxichira maa xiinxallineemmo? Wolere maa laˈneemmo?

³ Konni birxichira songote cimeeyyera qarra ikkannonsaha shoole coye xiinxallineemmo: (1) wole looso loossanni heedhenni sabbakate looso loosa, (2) ammanate roduuwansa towaatate yanna gaaˈma, (3) uminsa laanfe ledo sharramanna (4) wolootu laanfe dandiite saˈˈa. Phaawuloosi konne mitto mittonka qarra dandee saino garanna songote cimeeyye isi lawishsha harunsa dandiitanno garano laˈneemmo.

4. Songote cimeeyyera sabbakate looso albisa ikkite loosa qarra ikkitansara dandiitannohu mayiraati?

⁴ Tini qarra ikkitansara dandiitannohu mayiraati? Songote cimeeyyera, sabbakate looso albisa ikkite loosano agurranna wolu lowo loosi noonsa. Lawishshaho insa giddo batinyu Kiristaanu Heeshshonna Soqqansho gambooshshira liqambarticha ikkitanno hattono Songonnita Qullaawu Maxaafi Xiinxallo massagganno. Wole kifillano shiqishshannoha ikkara dandaanno. Insa songote soqqamaano qajeelsate lowore assitanno hattono agurtukkinni ammanate roduuwansa jawaachishshanno. (1 Phe. 5:2) Mite cimeeyye Gambooshshu Addaraashenna wole Magano magansiˈnanni minna minanna gatamarano kaaˈlitanno. Ikkirono songote giddo noori baalunku roduuwinte gede cimeeyyennihu qaru loosi Maganu Mangisteha dancha duduwo duduwate.—Mat. 28:19, 20.

5. Phaawuloosi sabbakate dancha lawishsha ikkinohu hiittoonniiti?

⁵ Phaawuloosi lawishsha. Phaawuloosira qinaannosi gede kaaˈlitinositi qara hedo Filiphisiyusi Sokka 1:10 noote; isi hakkiicho “woyyanno coye baddine affinoonnire” ikke yee jawaachishinonke. Phaawuloosi umisi tenne amaale harunsino. Iso soqqamaancho assine shoommoonnisi; isi lowo diro tenne soqqanshosi baalunku coyinni roorse laino. Phaawuloosi ‘gudumaalehonna minunni mine’ haˈre sabbakino. (Soq. 20:20) Isi sabbakinohu barru giddo boode saate woy lamalate giddo mitto barra calla diˈˈikkino. Phaawuloosi afiˈri faro baalate sabbakino! Lawishshaho isi Ateenaho jaallasi agarinowa heeˈre maccaha ikkino mannira dancha duduwo kule dancha guma afiˈrino. (Soq. 17:16, 17, 34) Phaawuloosi usurame noo yannara nafa qooxeessisira noo mannira sabbakino.—Fil. 1:13, 14; Soq. 28:16-24.

6. Phaawuloosi wolootu ma assitanno gede qajeelsino?

⁶ Phaawuloosi yannasi danchu garinni horoonsiˈrino. Isi duucha woyite wolootu ledosi soqqantanno gede koyisino. Lawishshaho isi umo misiyoone ikke haˈri woyite Maarqoosi yinanniha Yohaannisi ledosi adhe haˈrino; layinkimeeshsho haˈri woyite qole Ximootewoosi adhe haˈrino. (Soq. 12:25; 16:1-4) Phaawuloosi kuri labballi songo qineessitanno gara, roduuwa towaattanno garanna worba rosiisaano ikkitanno gara diinaggaawe qajeelsinonsati dihuluullissannote.—1 Qor. 4:17.

7. Songote cimeeyye Efesooni Sokka 6:14, 15 noota Phaawuloosi amaale harunsa dandiitannohu hiittoonniiti?

⁷ Ninke maa ronseemmo? Songote cimeeyye minunni mine hadhe calla ikkikkinni afidhu faro baalate sabbakate qixxaabbinore ikkite Phaawuloosi lawishsha harunsa dandiitanno. (Efesooni Sokka 6:14, 15 nabbawi.) Lawishshaho dikkotenni mitore hidhitanno woyite  woy loosu basewa farciˈra dandiitanno. Woy Magano magansiˈnanni minna mina kaaˈlitanno woyite qooxeessu mannira farciˈra hattono mine minnanni uduunne hirtanno woyite hiranno mannira farciˈra dandiitanno. Cimeeyye soqqantanno woyite Phaawuloosi gede songote soqqamaanonna woloota qajeelsa dandiitanno.

8. Mito woyite mittu cimeessira mayyaa hasiissannosiha ikkara dandaanno?

⁸ Cimeeyye, songote loosi woy woradinsa giddo loossanno loosi sabbakate loosira yanna hoogganno gede assansara wodha dihasiissannonsa. Insa loosoho quwa saˈannokkire ikkate, uyinanninsa looso mito woyite didandeemmo yaa hasiissannonsaha ikkara dandaanno. Insa huuccatto assidhe hedduhu gedensaanni, uyinanninsa looso maahoyye yite adhituro roore hasiisanno coyira yanna hooggannota huwattara dandiitanno. Roore hasiisanno coyi giddo mitu lamalate kiiro maatete magansiˈra massagate, diinaggaawe sabbakate woy oosonsa soqqanshote qajeelsate. Mitootaho uyinanninsa looso adha giwa qarra ikkitansara dandiitanno; kayinni Yihowa, insa loosoho quwa saˈˈa hasiissannonsakkita afinota addaxxa dandiitanno.

9. Loosu batiˈrannonsa cimeeyyera qarra ikkansara dandaannori maati?

⁹ Tini qarra ikkitansara dandiitannohu mayiraati? Yihowa mannira lowo fonqoli iillannonsa. Tenne goofimarchu yannara ninke baalunkura jawaante, kaaˈlonna shesho hasiissannonke. Mito woyite mitootaho busha gade agurate kaaˈlo hasiissannonsa. (1 Tes. 5:14) Cimeeyye Yihowa mannira iillannonsa fonqolo baala hoola dandiitannokkiti egennantinote. Ikkirono Yihowa, cimeeyye geˈreewosi jawaachishatenna agarate dandiiture baala assitara hasiˈranno. Ikkina loosu batiˈrinonsa cimeeyye kaaˈlo hasiissannonsare kaaˈlate yanna afiˈra dandiitannohu ma garinniiti?

10. Umi Teselonqe 2:7 kultanno garinni Phaawuloosi Yihowa manna towaatinohu ma garinniiti?

¹⁰ Phaawuloosi lawishsha. Phaawuloosi afiˈri faro baalate ammanate roduuwasi galatanna jawaachisha hasiˈranno. Songote cimeeyyeno Yihowa manna shaqqillunninna baxillunni towaatte Phaawuloosi lawishsha harunsate sharrantanno. (1 Teselonqe 2:7 nabbawi.) Phaawuloosi ammanate roduuwasi baxannonsatanna Yihowano baxannonsata buuxisinonsa. (2 Qor. 2:4; Efe. 2:4, 5) Isi songote giddo noo roduuwa jaallasi gede asse laino hattono insa ledo yanna sayisino. Phaawuloosi insara waajjishinosirenna laanfesi faajjete kule insa ammanannonsata leellishino. (2 Qor. 7:5; 1 Xim. 1:15) Ikkirono Phaawuloosi umisi qarra diˈˈillachishino. Hatteentenni ammanate roduuwasi kaaˈla hasiˈrino.

11. Phaawuloosi ammanate roduuwasi amaalinohu mayiraati?

¹¹ Phaawuloosi mito woyite ammanate roduuwasi amaala hasiissinosi. Kayinni isi hatto  assinohu insara hanqino daafira diˈˈikkino. Isi amaalinonsahu insara hedanno daafiraatinna addi addi qarrinni gatisansara hasiˈrino daafiraati. Phaawuloosi xawe leellanno garinni amaalate woˈnaalino hattono amaalesi macciishshitara hasiˈrino. Lawishshaho Qorontoosi Kiristaanira borreessino sokkara insa kaajjishe amaalino. Isi hatte sokka borreessihu gedensaanni Tiito insawa soyino. Phaawuloosi soyinonsa sokka daafira insa mayitannoro afate quqquxamino. Isi soyinonsa sokka macciishshite adhitinota afiti lowo geeshsha hagiidhino!—2 Qor. 7:6, 7.

12. Cimeeyye ammanate roduuwansa jawaachisha dandiitannohu hiittoonniiti?

¹² Ninke maa ronseemmo? Cimeeyye ammanate roduuwinsa ledo yanna sayisse Phaawuloosi lawishsha harunsa dandiitanno. Togo assa dandiitannoti mitte doogo ammanate roduuwinsa ledo dancha gede hasaawate gambooshshe yannantenni haˈrate. Jawaante hasiissannonsa roduuwa jawaachishate duucha woyite hasiisannohu shiima daqiiqaatilla. (Rom. 1:12; Efe. 5:16) Phaawuloosi lawishsha harunsanno cimeessi roduuwisi ammana kaajjishate Maganu Qaale horoonsiˈre jawaachishannonsa; hattono Maganu baxannonsata buuxisannonsa. Hakkiino sae isino baxannonsata affanno gede assanno. Isi duucha woyite insa ledo xaadate woˈnaalanno hattono afiˈri faro baalate galatannonsa. Mittu cimeessi roduuwa amaala hasiissannosi woyite amaalesi Maganu Qaali aana xintantinota ikka hasiissannose. Isi roduuwu amaalesi macciishshitara hasiˈranno daafira xawise kayinni shaqqillunni amaalannonsa.—Gal. 6:1.

13. Mitto cimeessa laanfesi mayyee hedanno gede assitasira dandiitanno?

¹³ Tini qarra ikkitansara dandiitannohu mayiraati? Cimeeyyeno guuntete xeˈne noonsareeti. Wolu manninte gede insano sodhanno. (Rom. 3:23) Insara mito woyite laanfensa daafira gara ikkitino lao heedhannonsa gede assiˈra qarra ikkitannonsa. Mitootu quwa saˈe laanfensa illachishshe hexxo mudhitara dandiitanno. Wolootu qolte laanfensa mulluri gede assite laˈaranna biddi assiˈra hasiissannonsa coyi nookkihu gede assite heddara dandiitanno.

14. Layinki Qorontoosi 4:7 kultanno garinni Phaawuloosi umosi heeshshi assasi laanfesi qeeˈlanno gede kaaˈlitinosihu hiittoonniiti?

¹⁴ Phaawuloosi lawishsha. Phaawuloosi umosi heeshshi assannoha ikkino daafira, laanfesi umisi wolqanni qeela dandaannokkita huwatino. Isira Maganu aanno jawaante hasiissinosi. Phaawuloosi alba, Kiristaanu daramanno gede assannoho kakkacha manchooti. Kayinni isi gedensoonni, soˈrosi ammane adhino hattono laosinna akattasi biddi assiˈrate maahoyye yiino. (1 Xim. 1:12-16) Yihowa kaaˈlonni Phaawuloosi baxillaancho, shaqqadonna umosi heeshshi  assanno cimeessa ikkino. Isi lowo soˈro loosinota afino; ikkirono soˈrosi calla diˈˈillachishino; hatteentenni Yihowa gatona yaannosita addaxxino. (Rom. 7:21-25) Isi guuta ikka hasiissannoe yee dihedino. Hatteentenni isi akattasi biddi assiˈrate jawaate sharramino hattono uyinoonnisi looso umo fushshate isonooto heeshshi asse Yihowa kaaˈlannosita addaxxino.—1 Qor. 9:27; 2 Qorontoosi 4:7 nabbawi.

15. Cimeeyye guuntete xeˈnensa daafira hiittoo lao heedhannonsa gede assiˈra hasiissannonsa?

¹⁵ Ninke maa ronseemmo? Cimeeyye shoommoonnihu insa guuta ikkitino daafira diˈˈikkino. Ikkirono Yihowa insa soˈronsa ammante adhitaranna akatansa biddi assidhara hasiˈranno. (Efe. 4:23, 24) Mittu cimeessi Maganu Qaale horoonsiˈre isonooto layiˈranna biddi assiˈra hasiissannosi coye biddi assiˈra hasiissannosi. Hatto ikkiro Yihowa isi hagiirraamonna worba cimeessa ikkanno gede kaaˈlannosi.—Yai. 1:25.

16. Mittu cimeessi wolootu laanfe illachishannoha ikkiro mayi kalaqamara dandaanno?

¹⁶ Tini qarra ikkitansara dandiitannohu mayiraati? Songote cimeeyye songote giddo noo roduuwi ledo lowo yanna sayissanno daafira laanfensa huwattara dandiitanno. Cimeeyye qoropha hoogguro kayinni insara hanqitara, kaajjishshe coyidhara woy garimale togooreeti yitara dandiitanno. Phaawuloosi, Sheexaanu hatto assinara hasiˈrannota kule Kiristaana qorowisiisino.—2 Qor. 2:10, 11.

17. Phaawuloosi ammanate roduuwisi daafira maa hedanno?

¹⁷ Phaawuloosi lawishsha. Isi ammanate roduuwisi daafira woˈmanka woyite danchare hedanno. Insa loossino soˈro mito woyite isono xissiissinosi daafira Phaawuloosi laanfensa seekke afino. Ikkirono Phaawuloosi mittu manchi soˈro loosi yaa hakku manchi bushaho yaa ikkinokkita afino. Isi ammanate roduuwasi baxanno hattono dancha akattansa illachishanno. Phaawuloosi ammanate roduuwisira gara ikkinore assa qarra ikkitannonsa woyite, insa gara ikkinore assa hasidhannotanna kaaˈlo hasiissannonsata hedanno.

18. Phaawuloosi Ewoodiyanna Siinxiki kaaˈlino gara kultanno xaggenni maa rosootto? (Filiphisiyusi Sokka 4:1-3)

¹⁸ Hanni lawishshaho Phaawuloosi Filiphisiyusi songora heeˈrannore lame meya roduuwa kaaˈlino gara laˈno. (Filiphisiyusi Sokka 4:1-3 nabbawi.) Ewoodiyanna Siinxikira coyi kawa kaˈaanni higeennansa jaaloominsa bainoha ikkara dandaanno. Phaawuloosi insara kaajjishe dicoyiˈrino woy garimale insa togooreeti diyiino; isi dancha akattansa illachishino. Kuri roduuwi ammanaminoreetinna danchu suˈmi noonsareeti. Phaawuloosi Yihowa insa baxannonsata afino. Phaawuloosi insata dancha akatta illachishino daafira kawa kaˈaanni higinonsa coye tidhanno gede jawaachishinonsa. Qoleno Phaawuloosi insaha dancha akata illachishasi hagiirrisi baˈˈannokki gedenna hatte songora heedhanno roduuwi ledo noosi jaaloomi kaajjanno gede kaaˈlitinosi.

19. (a) Cimeeyye ammanate roduuwinsaha dancha akata illachisha dandiitannohu hiittoonniiti? (b) Cimeessu Gambooshshu Addaraashe feyanni noota leellishshanno misilenni maa rosootto?

 ¹⁹ Ninke maa ronseemmo? Cimeeyye ammanate roduuwikkira noonsata dancha akatta illachishate sharrantanno. Baalunku ammanate roduuwinke guuntete xeˈne noonsareeti; kayinni mittu mittunkura naandeemmonsa gede assitanno akatta noonsa. (Fil. 2:3) Songote cimeeyye mito woyite ammanate roduuwansa amaala hasiissannonsa. Ikkirono cimeeyye Phaawuloosi gede, roduuwu coyidhinohanna assitinoha hanqisanno coye illachishshannokki gede sharrama hasiissannonsa. Hatteentenni insa mittu mittunku rodii Yihowa baxanno gara, Maganoho cince soqqamanni noo garanna assannoha dancha coye illachishshanno. Ammanate roduuwinsaha dancha akata illachishshanno cimeeyye songote giddo hagiirrunna baxillu woˈmanno gede assitanno.

20. Phaawuloosi lawishshi cimeeyye kaaˈlansara dandaannohu hiittoonniiti?

²⁰ Cimeeyye, Phaawuloosi lawishsha xiinxallaˈne kaaˈlitannoˈne. Borronke giddonni lowoha Phaawuloosi lawishsha afiˈra dandiitinanni. Lawishshaho, Maganu Mangistere Seekke Farciˈra, yaanno maxaafa (Amaaru Afoo) fooliishsho 12 gufo 17-20 nabbawa dandiitinanni. Phaawuloosi daafira roore rossini kiiro kiˈneneeto togo yitine xaˈme: ‘Cimeessa ikkoommo daafira uyinoonnie looso looseemmo woyite Phaawuloosi lawishshi hagiirriˈya baˈˈannokki gede kaaˈlannoehu hiittoonniiti?’

21. Cimeeyye maa addaxxa dandiitanno?

²¹ Cimeeyye, Yihowa guuta ikka hasiissannoˈne yiinokkita qaagge; isi ammanantinoonnire ikkitinara hasiˈranno. (1 Qor. 4:2) Phaawuloosi jawaate loosino daafiranna ammanaminoha ikkino daafira Yihowa hagiidhino. Kiˈneno Maganoho soqqamate assitinanniri iso hagiirsiisannota addaxxa dandiitinanni. Yihowa “loosoˈnenna albano ikko xaano qullaawa manna kaaˈlatenni leellishshinoonnisi baxille dihawanno.”—Ibi. 6:10.