Shiimu agani gedensaanni, Hitooshi looso hoogino daafira lowo geeshsha dadilli. Mitte hige loosoho eessinasira qaalu xaˈmo xaˈminanni heeˈneennasi, hanaaqu loosira anga wodhannokkita kulino. Hakkiinni xaˈmo xaˈmanni noosi manchi, “Heddanni noottohu rosaminokki coyeeti!” yiisi. Hitooshi minisi manninna jaallasi ammanamasi agurannokki gede jawaachishshinosi; ikkirono, isi huluullama hanafi. Isi togo yiino: “Ammanaˈyara yee kapha giwaˈya gara ikkase huluullama hanafummo.”

Hitooshira tuncu yiinosihu dadillisanno coyi, ammanama danchate yee hedannohu baalanka manna ikkinokkita leellishanno. Mitu manni isinni, hakko iso daddalaano ammanama lophote guficho ikkitanno yite heddanno. Wodiidi Afirikira qaxarante loossannoti mitte mancho togo yitino: “Looseemma basera noohu batinyu manni ammanaminoha diˈˈikkino; qoleno mito wote insa assannore asseemma gede uurra ofolla hoˈlannoe.”

Xaa yannara, mittu ammanama hunanno coyi kaphoho; kaphu yannankera baasa halaˈlino. Shiimu diri albaanni, Masaachustiisi Emiheristi Yuniversitera mannu surre daafira xiinxallannohu Rooberti Feldimani xibbunni 60 anga ikkannohu jajjabbu manni, hasaawanno wote tonnu daqiiqi giddo ajayi ajeenna mitte hige kaphannota coyiˈrino. Isi togo yiino: “Kuni lowo geeshsha dhagge ikkannoreeti. Kaphu heeshshonke giddo togo rosamino coye ikkinota dihendoommo.” Rooru manni wolu manni dogansara hasiˈrannokkiha ikke heeˈreenna kaphu togo rosamino coye ikkasi dhaggete!

Ikkina xaa yannara ammanama hooga lawishshaho kaphunna mooru togo batiˈrinohu mayiraati? Ammanama hooga dagooma baala gawajjitannohu ma garinniiti? Roorenkanni kayinni, hanaaqu giddora eessannonke coye qoropha dandiineemmohu hiittoonniiti?