Xiinxallote Birxicho 41
Bayiru qarri yannara ammanantine heedhe
“Keeraano baala Kaaliiqa baxxesi; Kaaliiqi halaalaasine agarannonsa.”—FAR. 31:23.
FAARSO 129 Kaajjine Uurrineemmo
GUULCHO *
1-2. (a) Muli barri giddo buusantino daga mayite lallabbanno? (b) Hiikkuri xaˈmuwara dawaro afiˈra hasiissannonke?
HANNI buusantino daga Qullaawu Maxaafi giddo kulloonni garinni “salaamenna teense heeˈnanni yanna daggino!” yite xaalla lallabbe kaˈinohu gede assine hendo. Insa alame teense heeˈnannita ikkitino yite naaxxitara dandiitanno. Mangistubba alamete qarra baala tira dandiitino yine hendeemmo gede assate woˈnaaltanno. Ikkollana insa hakkiinni aane ikkannore horonta hoola didandiitanno! Mayira? Qullaawu Maxaafi masaalo garinni “bao hedeweelcho daggannonsa; gatteno diaffanno.”—1 Tes. 5:3.
2 Hatto ikkiro, dawaro afiˈra hasiissannonke xaˈmuwa no: Bayiru qarri yannara mayi ikkanno? Yihowa hattee yannara maa assinammora hasiˈranno? Bayiru qarri yannara ammanamme heeˈrate xaanni qixxaawa dandiineemmohu hiittoonniiti?—Mat. 24:21.
BAYIRU QARRI YANNARA MAYI IKKANNO?
3. Yohaannisi Ajuuja 17:5, 15-18 kultanno garinni Maganu Bayira Baabiloone hunannohu hiittoonniiti?
3 Yohaannisi Ajuuja 17: 5, 15- 18 nabbawi. Bayira Baabiloone baˈanno! Aleenni laˈnummonte gede buusantino mangistubba hattee yannara ikkannore hoolte diaffanno. Mayira? Korkaatuno ‘Maganu hedosi wodaninsa giddo woranno.’ Tini hedo maati? Suˈmu Kiristinnano ikko alame woˈmate noota kaphu ammaˈno baala hunate. * Maganu tenne hedosi ‘duumu moyichihu tonnu buudi’ wodanira woranno. Tonnu buudi, ‘duumo moyicho’ yaano Buusantino Mangistubba kaaˈlannoha poletiku gashshoote baala riqiwanno. (Aju. 17:3, 11-13; 18:8) Kuni poletiku gashshooti kaphu ammaˈno hunanno woyite, bayiru qarri hanafino yaate. Tini alame woˈmate aana heeˈranno mannira iillitannote masissanno ikkitooti.
4. (a) Buusantino daga kaphu ammaˈno hunate kaˈanno gede assannonsa korkaati maa ikkara dandaanno? (b) Alba kaphu ammaˈno miilla ikkino manni maa assara dandaanno?
4 Buusantino daga Bayira Baabiloone hunate kaˈanno gede assannonsa korkaati maatiro dianfoommo. Insa alamete noo ammaˈno poletiku hajora ganyite anga wortanni salaame afiˈnannikki gede guficho ikkitino yitara dandiitanno. Woy insa ammaˈnote dirijjitta lowo woxenna jiro duuˈnitino yitara dandiitanno. (Aju. 18:3, 7) Kaphu ammaˈno dirijjitta baˈanno woyite miillase baala baˈanno yaa diˈˈikkino. Hatteentenni buusantino daga huntannohu ammaˈnote dirijjitta ikkara dandaanno. Ammaˈnote dirijjitta baˈuhu gedensaanni alba ise miila ikkino manni ammaˈnote massagaano dogginonsata huwatanno; hakko daafira hattee ammaˈnowiinni xeertiˈrate woˈnaaltannoha ikkara dandaanno.
5. Yihowa bayiru qarri daafira mayi qaale eino? Mayira?
5 Qullaawu Maxaafi Bayira Baabiloone baˈannohu mageeshshi yanna giddootiro dikulanno; ikkirono harancho yanna giddo baˈannota anfoommo. (Aju. 18:10, 21) Yihowa ‘doodhinorinna’ addu ammaˈno harunsitannori gattanno gede bayiru qarri barra haranseemmo yee qaale eino. (Maq. 13:19, 20) Ikkina Yihowa bayiru qarrinna Armagedooni oli mereero noo yanna giddo ninke maa assinammora hasiˈranno?
YIHOWATA HALAALU MAGANSIˈRA CUˈMIDHINE HEEDHE
6. Kaphu ammaˈno giddonni fula calla diˈˈikkitanno yineemmohu mayiraati?
6 Sai birxichira ronsummonte gede, Yihowa addu Kiristaani Bayira Baabiloonewiinni xeertiˈre heeˈrara hasiˈranno. Hatto assate kayinni kaphu ammaˈno giddonni fula calla diˈˈikkitanno. Yihowata halaalu magansiˈra cuˈmiˈne heeˈrate murciˈra hasiissannonke. Hanni hatto assa dandiineemmota lame doogga laˈno.
Qarru yannara nafa mitteenni gamba yaanke diagurreemmo (Gufo 7 lai) *
7. (a) Yihowaha keeraancho amanyootu biddishsha cuˈmiˈne heeˈra dandiineemmohu hiittoonniiti? (b) Ibiraawoota 10:24, 25 kultanno garinni roorenkanni xaa yannara Yihowa magansiˈrate gamba yaa hasiissannonkehu mayiraati?
7 Umihunni, Yihowaha keeraancho amanyootu biddishsha cuˈmiˈne heeˈra hasiissannonke. Alamenniha maaeela amanyoote diharunsineemmo. Lawishshaho, labbaahu labbaahu ledo woy meyati meyate ledo adhama woy wolu gari foorre garaho yine diadhineemmo. (Mat. 19:4, 5; Rom. 1:26, 27) Layinkihunni ammanate roduuwinke ledo Yihowa magansiˈra diagurreemmo. Togo assineemmohu Gambooshshu Addaraashera, injaa hooginkero kayinni roduuwu mine woy wole dahaawino bayicho ikkara dandaanno. Aye coyino iillinkero Magano magansiˈrate gamba yaa diagurreemmo. Roorenkanni Yihowa barri gamba yaanno woyite, ‘mimmitinke ledo albinni roorsine gamba’ yaa hasiissannonke.—Ibiraawoota 10:24, 25 nabbawi.
8. Albillitte sabbankeemmo sokka soorrantara dandiitannohu hiittoonniiti?
8 Bayiru qarri yannara dudumbeemmo sokka soorrantara dandiitanno. Xaa yannara Maganu Mangisteha dancha duduwo dudumbanninna manna rosaano assate woˈnaallanni heeˈnoommo. Hattee yannara dudumbeemmo sokka kayinni jajjabba kaade gede kaajjado ikkitara dandiitanno. (Aju. 16:21) Hatte yannara Sheexaanu alame baˈannota dudumbeemmoha ikkara dandaanno. Sabbankeemmo sokka maatironna ma garinni sabbankeemmoro hatte yannara anfeemmo. Lowo diro soqqammanni keeshshinoommo garinni soqqammeemmonso wolu garinni soqqammeemmo? Hattee marrayi anfeemmo. Ikkihano ikkiro, worbimmatenni Yihowata yoote sokka duduwate qoosso afiˈneemmoha ikkara dandaanno!—Hiz. 2:3-5.
9. Sabbankeemmo sokka buusantino daga massitansara dandiitanno? Ikkirono maa dihuluullammeemmo?
9 Sabbankeemmo sokka buusantino daga hanqissannonsa daafira, horo sabbaka agurreemmo gede assate woˈnaaltara dandiitanno. Ikkirono, xaa yannara soqqanshonkera Yihowa addaxxineemmonte gede hattee yannarano kaaˈlankera iso addaxxa dandiineemmo. Yihowa fajjosi wonshineemmo gede wolqa aannonketa dihuluullammeemmo.—Mik. 3:8.
MAGANU MANNA SIˈNANNI WOYITIRA QIXXAABBE
10. Luqaasi 21:25-28 masaalloonni garinni rooru manni bayiru qarri yannara ikkannore lae ma ikkara dandaanno?
10 Luqaasi 21:25-28 nabbawi. Bayiru qarri yannara mannu mittoreno diˈˈikkanno yee hedinori alamete aana noori baalu baˈˈanna laˈˈanno woyite lowo geeshsha masanno. Tenne mannu ooso xagge baalante giddo roore tunsichu yannara, insa heeshshonke hoongeemmo yite waajjite huxidhanno. (Sof. 1:14, 15) Hattee yannara Yihowa mannira nafa heeshsho qarraataame ikkitara dandiitanno. Hatte yannarano alamete wido ikkinummokkinni heeˈneemmo daafira qarrammammora dandiineemmo. Heeshshote hasiisannonkere nafa hoongeemmoha ikkara dandaanno.
11. (a) Kaphu ammaˈno baˈuhu gedensaanni alamete massagaanonna wolu manni ninke aana illachishannohu mayiraati? (b) Bayira qarra waajja hasiissannonkekkihu mayiraati?
11 Ammaˈnonsa baˈino manni Yihowa Farciˈraasine magansidhanna laˈˈanno woyite lowo geeshsha hanqara dandaanno. Insa dagoomittete webisayite horoonsidhe hanqonsa wolootu affanno gede assitara dandiitanno. Buusantino daganna gashshaanchinsa Sheexaanu, baˈukkinni gattinoti ninke ammaˈno calla ikkitino daafira gibbannonke. Insara uullate aaninni baalanta ammaˈno hunate mixidhino mixo diwoˈmitannonsa. Hakko daafira insa ninke aana illachishshanno. Hattee yannara buusantino daga Maagoogi Googi ikkitanno. * Insa Yihowa manna siate mitteenni gamba yitanno. (Hiz. 38:2, 14-16) Hattee yannara ikkannoha mitto mittonka coye gudinse anfoommokki daafira yaandammora dandiineemmo. Ikkirono, bayira qarra waajja dihasiissannonke. Yihowa heeshsho gatisanno biddishsha aannonke. (Far. 34:19) ‘Gatonke barri iillinota’ anfoommo daafira ‘iima hinge laˈneemmo.’ *
12. “Ammanaminohunna wodanaamu borojjichi” albillitte daannorira qixxeesssanni noonkehu hiittoonniiti?
12 “Ammanaminohunna wodanaamu borojjichi” albillitte daannorira qixxeessanni keeshshinonke. (Mat. 24:45, NW) Lawishshaho, hanni 2016-2018 assiˈnoommohu qoqqowu gambooshshiwa ronsoommore hendo. Konni gambooshshiwa shiqqino pirogiraame daara gambise noohu Yihowa barrira kaaˈlitannonke akatta lossiˈneemmo gede jawaachishshinonke. Hanni tenne akatta haranchunni lende laˈno.
ALBINNI ROORE AMMANANTINOONNIRE, CINCITINANNIRENNA WORBUULLE IKKE
Bayira qarra gate saˈˈate xaanni qixxaabbe (Gufo 13-16 lai) *
13. Yihowara ammaname heeˈra dandiineemmohu hiittoonniiti? Xaa yannara hatto assa hasiissannonkehu mayiraati?
13 Ammanama: Lamu kuminna tonaa lewunniti qoqqowu gambooshshi cuˈmo “Yihowara Ammanantine Heedhe!” yitannote. Konni gambooshshiwa Yihowa ledo dancha jaalooma kalaqiˈnummoro, isira ammanammoommore ikkineemmota ronsoommo. Qoleno, Yihowa giddonkenni huucciˈnenna Qaalesi diinaggaambe nabbambe isiwa shiqa dandiineemmota ronsoommo. Hatto assinummoro, buutote qarra nafa qeele saˈˈate jawaante afiˈneemmo. Sheexaanu alame bao gambissanno woyite albinni roore Yihowaranna Mangistesira ammanamme heeˈra qarra ikkitannonke gede assannonkeri tuncu yaankera dandaanno. Mannu arrassanni qarrissankera dandaanno. (2 Phe. 3:3, 4) Hatto assannonkehu roorenkanni Sheexaanu alame aye doogonnino irkinseemmokki daafira ikkara dandaanno. Xaa yannara ammanamate akata loossiˈneemmoha ikkiro, bayiru qarri yannarano ammanamme heeˈra dandiineemmo.
14. (a) Xaa yannara Yihowa dirijjitera albisoota ikkite soqqantanni noo roduuwira albillitte mayi soorro heedhanno? (b) Hattee yannara ammanammoommore ikka hasiissannonkehu mayiraati?
14 Bayiru qarri yannara uullate aana Yihowa dirijjitera albisoota ikkite soqqantanno roduuwi soorrantanno. Bayiru qarri yannara uullate aana gatte noori buurantino Kiristaani Armagedooni olira kaaˈlante olantara iimira hadhanno. (Mat. 24:31 Aju. 2: 26, 27) Hatto yaa, hattee yannara Aliidi Bisi ninke ledo uullate aana diheeˈranno yaate. Lowo daga kayinni dirijjite ikkite heedhanno. Wolu geˈreewi wido ikkitinori giddonni ikkadda ikkitinori albisoota ikkite soqqantanno. Insa kaaˈlinenna Maganu insa widoonni qole aannonke biddishsha harunsine ammanammoommore ikkinoommota leellisha hasiissannonke. Ganteemmohu hatto assinummoro callaati!
15. Cincate akata lossiˈra dandiineemmohu hiittoonniiti? Xaa yannara hatto assiˈra hasiissannonkehu mayiraati?
15 Cinca: Lamu kuminna tonaa lamalunniti qoqqowu gambooshshi pirogiraame cuˈmo “Hexxo Mudhitooti!” yitannote. Kuni gambooshshi iillannonke fonqolo cince saˈˈate dandoonke kaajjishiˈneemmo gede kaaˈlinonke. Qoleno cincineemmohu heeshshonke gari injiino daafira calla ikkinokkita ronsoommo. Cincate dandoonke kaajjishiˈra dandiineemmohu Yihowa addaxxinummoro callaati. (Rom. 12:12) Yesuusi ‘Goofimarchu geeshsha cince kaajjannohu gatanno’ yee eino qaale horo hamboonke. (Mat. 24:13) Isi eino qaali aye qarri iillinkerono ammanamme heeˈra hasiissannonketa leellishanno. Xaa yannara iillannonkeha mitto mittonka qarra dandiine saˈnummoro, bayiru qarri hanafara albaanni ammananke kaajjado ikkitanno.
16. Worbuulle ikkate maa assa hasiissannonke? Xaa yannara albinni roore worbuulle ikka dandiineemmohu hiittoonniiti?
16 Worbimma: Lamu kuminna tonaa settunnihu qoqqowu gambooshshi pirogiraame cuˈmo “Worbuulle Ikke!” yitannote. Konni gambooshshiwa worbuulle ikkineemmohu uminke dandoonni ikkinokkita ronsoommo. Cincineemmore ikkate Yihowa addaxxineemmonte gede worbuulle ikkateno iso addaxxa hasiissannonke. Albinni roore Yihowa addaxxa dandiineemmohu hiittoonniiti? Qaalesi barru baala nabbambenna hundi waro mannasi gatisinohu hiittoonniitiro hiincineeti. (Far. 68:20; 2 Phe. 2:9) Bayiru qarri yannara buusantino daga siˈannonke woyite worbuulle ikkanna albinni roore Yihowa addaxxa hasiissannonke. (Far. 112: 7, 8; Ibi. 13:6) Xaa yannara Yihowa addaxxinummoro Googi siannonke woyitira hasiissannonke worbimma afiˈneemmo. *
GATOˈNE QUQQUXANTINE AGADHE
Muli yannara Yesuusinna iimi olantosi Armagedooni olinni Maganu diinna hunate dagganno! (gufo 17 lai)
17. Armagedooni ola horo waajja hasiissannonkekkihu mayiraati? (Aaniidi qoolira noo misile lai.)
17 Sai birxichira ronsummonte gede ninke giddo rooru heeshshonke diro woˈma heeˈnoommohu goofimarchu barri giddooti. Qoleno, bayira qarra gate saˈˈate hexxo noonke. Tini alame Armagedooni olinni woˈmunni woˈma baˈanno. Ikkirono horo waajja dihasiissannonke. Mayira? Korkaatuno kuni Maganu olaati. (Law. 1:33; Hiz. 38:18-20; Zak. 14:3) Yihowa hajajonni Yesuusi Kiristoosi olanto massaganno. Reyotenni kaˈinori buurantino Kiristaaninna kiirre gundannikki sokkaasine isi ledo kaaˈlante olantanno. Insa Sheexaanunna agaanintesi hattono uullate aani olantonsa ledo olantanno.—Dan. 12:1; Aju. 6:2; 17:14.
18. (a) Yihowa maa assara qaale eino? (b) Yohaannisi Ajuuja 7:9, 13-17 kultanno garinni bayira qarra gante saˈneemmota ammanneemmohu mayiraati?
18 Yihowa “ate shinara seekkinanni bagadi shuffano” yee qaale eino. (Isa. 54:17) Ammanante Yihowa magansidhannoti lowo daga bayira qarra gatte saˈanno! Hakkiinni isira soqqantanni heedhanno. (Yohaannisi Ajuuja 7:9, 13-17 nabbawi.) Qullaawu Maxaafi albillitte bayira qarra gante saˈneemmota ammanneemmo gede assannonkeha lowo korkaata kulannonke! Yihowa “halaalaasine agarannota” anfoommo. (Far. 31:23) Yihowa baxannohunna iso guwisiˈrannohu baalu isi qullaawa suˈmasi ayirranno gede assanna lae hagiidhanno.—Hiz. 38:23.
19. Albillittete hiitti kaajja hexxo noonke?
19 Layinki Ximootewoosi 3: 2-5, Sheexaanu nookkitera haaro alamera heeˈranno manni daafira kultannoha ikkoommero, insa akati daafira mayine borreessinanniro hedi. (“ Hattee Yannara Mannu Akati Hiittooha Ikkanno?” yitanno saaxine lai.) Aliidi Bisi miila ikke soqqaminohu Roduu Joorji Gaangasi * togo yee coyiˈrino: “Baalunku manni Yihowa magansiˈrannoha ikkiro alame lowo geeshsha baxissannota ikkitanno. Muli yannara haaro alame giddo heeˈrate qoosso afidhinanni. Yihowa gede hegerera heedhinanni.” Tini kaajja hexxooti!
FAARSO 122 Kaajjitine Uurre, Shashshafantinoonte!
^ GUFO 5 Muli yanna giddo mannu ooso baalate bayiru qarri daannota anfoommo. Hattee yannara Yihowa soqqamaasinera mayi iillannonsa? Yihowa ninke hattee yannara maa assinammora hasiˈranno? Bayiru qarri yannara ammaname heeˈrate xaa yannara hiittee akatta lossiˈra hasiissannonke? Konni birxichira kuri xaˈmuwara dawaro afiˈneemmo.
^ GUFO 3 HARANCHO XAWISHSHA: Ninke Kiristaanaho yitanni heedhe, harunsaanonsa Magano Isi hasiˈranno garinni magansidhanno gede rosiissannokki ammaˈno baala suˈmu Kiristinna yinanni.
^ GUFO 11 HARANCHO XAWISHSHA: Maagoogi Googi (haransine Googino yinanni) yaanno qaali bayiru qarri yannara Yihowa magansidhannore siate buusante kaˈanno daga riqiwanno.
^ GUFO 11 LEKKAALLIIDI QAAGIISHSHA: Armagedooni oli hanafara albaanni mayi ikkannoro ledde afate Maganu Mangiste Gashshite No! (Amaaru Afoo) yaanno maxaafira fooliishsho 21 lai. Armagedooni oli yannara Maagoogi Googi Maganu manna sianno garanna Yihowa mannisira gaaramannohu hiittoonniitiro ledde afate Maaja 1, 2015nnita Agarooshshu Shae qoola 16-21 nna Halaalu Magansiˈra Wirro Xintantu! (Amaaru Afoo) yaanno maxaafa fooliishsho 17 nna 18 lai.
^ GUFO 16 Lamu kuminna tonaa honsunnihu qoqqowu gambooshshi pirogiraame cuˈmo “Baxillu Geedonniho” yitannote; konni gambooshshiwa ronsoommo rosi Yihowahu baxillu agarooshshi giddo heeˈnoommota ammanneemmo gede assinonke.—1 Qor. 13:8.
^ GUFO 19 Sadaasa 1, 1994 Agarooshshu Shaera (Amaaru Afoo) nooha “Loosisi Harunsinosi” yaanno birxicho lai.
