1. Heeꞌnoommohu ‘goofimarchu barri’ jeefora ikkinota huluullammeemmokkihu mayiraati?

 ATI ilamoottohu 1914 kawaati? Hatto ikkiro, heeshshokki diro woꞌma heeꞌroottohu alamete “goofimarchi barri” giddooti. (2 Xim. 3:1) Ninke baalunku Yesuusi heeꞌnoommo yanna daafira masaalinori woꞌmanna macciishshinoommo. Kuri giddo gamu olaho, hudete, baattote huxanooti, dhibbu batiꞌrate, bunshe batiꞌratenna Yihowa mannira dartu iillate. (Mat. 24:3, 7-9, 12; Luq. 21:10-12) Qoleno, mannu akati soqqamaasinchu Phaawuloosi masaalotenni kulinohu gedeeha ikkinota laꞌnoommo. (“ Xaa Yannara Mannu Hiittooho?” yitanno saaxine lai.) Yihowa magansiꞌneemmore ikkinoommo daafira heeꞌnoommohu ‘goofimarchu barri’ jeefora ikkinota dihuluullammeemmo.—Mik. 4:1.

2. Dawaro afiꞌra hasiissannonke xaꞌmuwa hiikkuriiti?

² Goofimarchu barri 1914 hanafinkunni lowo diri saino daafira heeꞌnoommohu goofimarchu barri jeeforaati. Alamete goofimarchi lowo geeshsha gambisino daafira aante noo xaꞌmuwara dawaro afiꞌra hasiissannonke: ‘Goofimarchu barri’ jeefora mayi ikkanno? Yihowa hakka geeshsha ninke maa assinammora hasiꞌranno?

3. Umi Teselonqe 5: 1-3 masaalloonni garinni buusantino daga mayite lallabbanno?

³ Umi Teselonqe 5:1-3 nabbawi. Kowiicho Phaawuloosi Yihowa barri daafira xawisino. Konni qummeeshshi giddo kulloonnihu Yihowa barri alame woꞌmate noota kaphu ammaꞌno  riqibbannote “Bayira Baabiloone” baonni kayise Armagedooni oli jeefo geeshsha noo yanna kulannoho. (Aju. 16:14, 16; 17:5) Kuni barri hanafara albaanni buusantino daga “salaamenna teense heeꞌnanni yanna daggino!” yite lallabbanno. Alamete gashshaano mito woyite gobbuwate mereero noo xaadooshshi woyyaawinota xawisateno togoo yaatto horoonsidhanno. b Kayinni Qullaawu Maxaafi kulannohu “salaamenna teense heeꞌnanni yanna daggino” yine lallambanni lallawi konninni baxxinoho. Mayira? Korkaatuno konne lallawo lallambanni woyite mannu alamete gashshaano alame keeru woꞌminotanna teense heeꞌnannita assitino yee hedara dandaanno. Adda coyiꞌniro kayinni hakka woyintenni bayiru qarri hanafanno daafira “bao hedeweelcho” daggannonsa.—Mat. 24:21.

4. (a) “Salaamenna teense heeꞌnanni yanna daggino!” yine lallambanni lallawi daafira anfoommori maati? (b) Konni lallawi daafira anfoommokkiri maati?

⁴ “Salaamenna teense heeꞌnanni yanna daggino” yine lallambanni lallawi daafira anfoommorinna anfoommokkiri no. Konne lallawo lallambanni gede assannori maatironna hiittoonni lallambanniro dianfoommo. Qoleno, duucha hinge ikko mitte hinge calla lallambe agurannirono dianfoommo. Ikkihano ikkiro, alamete gashshaano alamete addu salaame abbitino yine hende dogama dihasiissannonke. Isinni baqqi yine agadhine keeshshinoommohu konne lallawooti. Kuni lallawi Yihowa barri hanafara kae noota leellishanno malaateeti!

5. Umi Teselonqe 5:4-6 noo amaale Yihowa barrira qixxaawate kaaꞌlitannonkehu hiittoonniiti?

⁵ Umi Teselonqe 5:4-6 nabbawi. Phaawuloosi amaalino amaale Yihowa barrira qixxaawate maa assa hasiissannonkero kultannonke. Konnira “wolootu gede goxa agurre” “baqqi yine” heeꞌra hasiissannonke. Lawishshaho, tenne alamehu poletiku hajora anga wodhineemmokki gede qoropha hasiissannonke. Poletiku hajora anga wodhineemmoha ikkiro tenne alame wido ikkineemmo. (Yoh. 15:19) Alamete salaame abbitannoti Maganu Mangiste calla ikkitinota anfoommo.

6. Wolootu ma assitanno gede kaaꞌla hasiissannonke? Mayira?

⁶ Ninke baqqi yine heeꞌneemmoti egennantinote; qoleno wolootuno baqqi yite heedhanno gedenna Qullaawu Maxaafi tenne alame aana ikkanno yee kulinore huwattanno gede kaaꞌla hasiissannonke. Bayiru qarri hanafihu gedensaanni mannu Yihowawa higanno gede faꞌnaminonsa waalchi cufamannota qaaga hasiissannonke. Sabbakate looso wiinamme loosa hasiissannonkehu iseraati! c

7. Yihowa xaa yannara ma assinammora hasiꞌranno?

⁷ Yihowa ‘barrisi’ hanafara gatte noote tenne shiima yanna giddo diinaggaambe sabbankammora hasiꞌranno. Konni daafira, ‘Mootichu  loosi’ batiꞌrinonkere ikkate sharrama hasiissannonke. (1 Qor. 15:58) Yesuusi ma assa hasiissannonkero balaxe kulinonke. Isi goofimarchu yannara ikkannoha qara qara coye kuli yannara togo yiino: “Gosa baalate naqaashshe ikkanno gede kuni Maganu Gashshootihu Danchu Duduwi gobba baalate kulamanno.” (Maq. 13:4, 8, 10; Mat. 24:14) Soqqansho fulleemmo kiiro tini Qullaawu Maxaafi masaalo woꞌmitanno gede kaaꞌlinanni heeꞌnoommo.

8. Maganu Mangistehu sabbakate loosi halaꞌlanni noota mayinni anfeemmo?

⁸ Maganu Mangistehu sabbakate loosi mageeshshi geeshsha halaꞌlino? Diru kiiro lowo manni Maganu Mangisteha dancha duduwo macciishshanni no. Hanni goofimarchu barri giddo alamete doyichora Maganu Mangiste halashshaano kiiro lexxitino gara laꞌno. Alba 1914nni 43 gobbuwara halashshaanote kiiro 5,155 ikkitanno. Xaa yannara kayinni 240 gobbuwara 8.5 miliyoone saꞌanno halashshaano no. Ikkirono xaano sabbakate loosinke dikaino. Mannu ooso qarra tirtannoti Maganu Mangiste calla ikkitinota woꞌmanka woyite duduwa hasiissannonke.—Far. 145:11-13.

9. Maganu Mangisteha dancha duduwo woꞌmanka woyite sabbaka hasiissannonkehu mayiraati?

⁹ Yihowa ikkinona agurre yaa geeshsha sabbakate loosonke diagurreemmo. Ikkina mannu Maganu Yihowanna Yesuusi Kiristoosi daafira rosannoti mageeshshi yanna gattino? (Yoh. 17:3) Dianfoommo. Bayiru qarri hanafa geeshsha “hegere heeshsho afiꞌrate gara ikkitinoti wodanu dooꞌꞌo noonsari” baalu dancha duduwo macciishshite Yihowara soqqantara dandiitannota anfoommo. (Soq. 13:48, NW) Barre baikki konne manna kaaꞌla dandiineemmohu hiittoonniiti?

10. Yihowa mannaho halaale rosiisate kaaꞌlannonkere maa uyinonke?

¹⁰ Yihowa dirijjitesi widoonni mannaho halaale rosiisate kaaꞌlannonkere baala aannonke. Lawishshaho, lamalate kiiro Kiristaanu Heeshshonna Soqqansho Gambooshshiwa qajeelsha afiꞌneemmo. Konni gambooshshiwa manna umo marre hasaawinseemmo woyitenna galagalle marre hasaawinseemmo woyite mayineemmoro ronseemmo. Qoleno Qullaawa Maxaafa xiinxallinseemmo gara ronseemmo. Yihowa dirijjite Rosiisate Horoonsiꞌneemmo Borro qixxeessitinonke. Tini borro aane noore assate kaaꞌlitannonke.

•    hasaawa hanafate

•   mannu hasatto kakkayisate

•   mannu lede rosa hasiꞌranno gede kaaꞌlate

•   Qullaawu Maxaafi halaale rosiisatenna

•   hasatto noonsa manni webisayitenke laꞌꞌanno gedenna Gambooshshu Addaraashenke daanno gede koyisate.

 Rosiisate horoonsiꞌneemmo borro afiꞌranke calla diꞌꞌikkitanno. Seekke horooonsiꞌra hasiissannonke. d Lawishshaho hasatto noosi manchi ledo dancha gede hasaawitto gedensaanni tiraakte woy metseete uyite harittosiro, wole woyite xaaddinanni woyitira nabbawe agarannohe. Aganu kiiro Maganu Mangisteha dancha duduwo diinaggaambe sabbaka mitti mittinke qeechaati.

11. Interneetete Widoonni Qullaawa Maxaafa Xiinxalla yaanno gafa qixxeessinoonnihu mayiraati?

¹¹ Yihowa mannu halaale rosara kaaꞌlannoti wole doogo jw.org aana nooha Interneetete Widoonni Qullaawa Maxaafa Xiinxalla yaanno gafa horoonsiꞌreeti. (QULLAAWU MAXAAFI ROSO > INTERNEETETE WIDOONNI QULLAAWA MAXAAFA XIINXALLA yaannohu hunda lai.) Konne roso qixxeessinoonnihu mayiraati? Aganu kiiro alamete doyichora lowo kume ikkanno manni Qullaawu Maxaafi halaale rosate Interneete laꞌꞌanno. Farcidhinanni manni giddo mitu Qullaawa Maxaafa xiinxallara koyissinanni woyite adha giwara dandaanno. Hatto ikkiro, webisayitenke aana nooha konne gafa leellishshinara woy linke sokkinansara dandiitinanni. e

12. Interneetete Widoonni Qullaawa Maxaafa Xiinxalla yaanno gafa xiinxallanno manchi maa rosanno?

¹² Interneetete Widoonni Qullaawa Maxaafa Xiinxalla yaanno gafira aane noo rosi no: “Qullaawa Maxaafanna Qullaawu Maxaafi Anna” “Qullaawu Maxaafi Giddo Kulloonnire” “Qullaawu Maxaafi Kulanno Hexxo.” Konni gafi widoonni Qullaawa Maxaafa xiinxallanno manchi aane noore rosanno:

•   Qullaawu Maxaafi kaaꞌlannonke gara

•   Yihowa, Yesuusinna sokkaasinete daafira

•   Maganu manna kalaqinohu mayiraatiro

•   Qarrunna bunshe heedhinohu mayiraatiro

 Qoleno konni gafira Yihowa. . .

•   qarranna reyo hunannota

•   reyitinore kayisannotanna

•   mannu ooso qarra tira hooginoha uullate gashshoote hune umisi Mangiste xintannota xawinsoonni.

13. Interneetete Widoonni Qullaawa Maxaafa Xiinxalla yaanno gafi mannaho ninke Qullaawa Maxaafa xiinxallinseemmo qixxaawo riqiwanno? Xawisi.

¹³ Interneetete Widoonni Qullaawa Maxaafa Xiinxalla yaanno gafi mannaho ninke Qullaawa Maxaafa xiinxallinseemmo qixxaawo riqiwannoha diꞌꞌikkino. Yesuusi manna rosaano assate qoosso uyinonke. Interneetete Widoonni Qullaawa Maxaafa Xiinxalla yaanno gafi aana noo rosi, xiinxallanno manni rosinore naadanno gedenna lede rosa hasiꞌranno gede assannonsa yine hendeemmo. Hatto ikkiro, insa Qullaawa Maxaafa xiinxallate sumuu yitara dandiitanno. Konni gafihu mittu mittunku rosi jeefora nabbawanno manchi Qullaawa Maxaafa xiinxallinsasira xaꞌmiꞌranno gede koyinsoonni. Alamete doyichora barru baala mereerimunni 230 saꞌꞌanno manni webisayitenke widoonni Qullaawa Maxaafa xiinxallinsanninsa gede xaꞌmiꞌranno. Xaano mannaho Qullaawa Maxaafa ninke xiinxallisa hasiissannonke.

14. Yesuusi Maatewoosi 28:19, 20 hajajino garinni maa assate sharrama hasiissannonke? Mayira?

¹⁴ Maatewoosi 28:19, 20 nabbawi. Manna Qullaawa Maxaafa xiinxallinseemmo woyite insa ‘Yesuusi hajajinore baala agadhitanno  gedenna rosaanosi’ ikkitanno gede kaaꞌlate dandiinummore baala assineemmo. Yihowara soqqamanna Mangistesi kaaꞌla mageeshshi geeshsha hasiissannota ikkitinoro mannu huwatanno gede kaaꞌla hasiꞌneemmo. Hatto assate mannu rosinore loosunni leellishe, heeshshonsa Yihowara sayise oyenna cuuame halaale seekke cuꞌmiꞌranno gede kaaꞌlate sharrammeemmo. Mannu Yihowa barra gate saꞌꞌa dandaannohu hatto assiꞌro callaati.—1 Phe. 3:21.

15. Maa assinanni yanna guda dihasiissannonke? Mayira?

¹⁵ Aleenni kulloonninte gede tenne alame goofimarchi daate gattino yanna lowo geeshsha shiimate. Hakko daafira Kiristoosi rosaancho ikka hasiꞌrannokki manchira Qullaawa Maxaafa xiinxallinsanni yanna digundeemmo. (1 Qor. 9:26) Sabbakate loosinke wiinamme loonsanniho! Yanna goofukkinni Maganu Mangisteha dancha duduwo macciishshe adha hasiꞌrannohu lowo manni no.

16. Yohaannisi Ajuuja 18:2, 4, 5, 8 kultanno garinni baalunku maa assa hasiissannonke? (Lekkaalliidi qaagiishshano lai.)

¹⁶ Yohaannisi Ajuuja 18:2, 4, 5,  8 nabbawi. Kuri qummeeshshuwa Yihowa magansidhannosiri assitara hasiꞌrannoha wole coye kultanno. Baalunku addu Kiristaani Bayira Baabiloone ledo xaadooshshe afiꞌrinohu aye coyiwiinnino xeertiꞌra hasiissannonsa. Mittu Qullaawu Maxaafi rosaanchi halaale rosara albaanni kaphu ammaꞌno miila ikkara dandaanno. Isi insa ledo magansiꞌrannohanna addi addi doogonni kaaꞌlannoha ikkara dandaanno. Woy hatte dirijjite woxunni kaaꞌlannoha ikkara dandaanno. Qullaawu Maxaafi rosaanchi cuuaminokki halashshaancho ikke soqqamanno gede fajjinasira albaanni kaphu ammaꞌno ledo noosi lase baala agura hasiissannosi. Isi alba eanno Beetekiristaanera xaate miillansa ikkinokkita kule sokkate borro borreessa, hattono Bayira Baabiloone ledo xaado afidhinote baalante dirijjite ledo noosi aante agura hasiissannosi. f

17. Mittu Kiristaanchi hiittoo looso diloosanno? Mayira?

¹⁷ Addu Kiristaanchi loosanno loosi Bayira Baabiloone ledo xaadooshshe afiꞌrinoha ikkannokki gede qoropha hasiissannosi. (2 Qor. 6:14-17) Lawishshaho, Beetekiristaanete qaxarame diloosanno. Qoleno, wole dirijjitera qaxarame loosanno Kiristaanchi kaphu ammaꞌnora horoonsiꞌnanni minna ledo xaadooshshe afiꞌrinoha lowo looso diloosanno. Hattono, mittu Kiristaanchi Bayira Baabiloone ledo xaadooshshe afidhino dirijjite giddo mitore loosate dicaratanno woy togoo dirijjitewiinni kontiraata adhe diloosanno. Togoore effiꞌne gimbeemmohu mayiraati? Korkaatuno Maganu illera baattaame  ikkitinotehu kaphu ammaꞌno loosiranna cubbisera karsama hasiꞌneemmokki daafiraati.—Isa. 52:11. g

18. Mittu rodii loosanno looso lainohunni Qullaawu Maxaafi biddishsha seekke cuꞌmiꞌrinohu hiittoonniiti?

¹⁸ Boodu dirira albaanni mitto hanaatsimmate looso loosannoha songote cimeessa isi heeꞌranno katami giddo noo Beetekiristaanera shiima hanaatsimmate looso loosanno gede xaꞌminoonnisi. Loosanno gede xaꞌminosi manchi roduu Beetekiristaanete ledo xaado afiꞌrino looso loosa hasiꞌrannokkita afino. Tenne yannara kayinni kuni manchi loosanno manna lowo geeshsha hasiꞌrino. Roduu kayinni Qullaawu Maxaafi biddishsha seekke cuꞌmiꞌrino daafira konne looso loosa giwino. Aantino lamalara wolu hanaatsichi Beetekiristaanete masqala sutanna leellishshanno foto hakko qooxeessira attammanni gaazeexira fultino. Rodiinke hakko looso adhinoha ikkoommero gaazeexu aana fultannoti isi fotooti. Hatto ikkiro ammanate roduuwisira isira mayi lao heedhannonsaro heda dandiineemmo! Qoleno Yihowara mayi macciishshamasira dandaannoro hedde!

19-20. (a) Konni birxichira maa ronsoommo? (b) Aananno birxichira maa ronseemmo?

¹⁹ Qullaawu Maxaafi masaalo garinni aantete alamete aana ikkitannoti qara ikkito buusantino daga muli yanna giddo “salaamenna teense heeꞌnanni yanna daggino!” yite lallabbanno lallawooti. Yihowa rosiisinonke daafira buusantino daga alamete geeddanno salaame abbite affannokkita anfoommo. Konni lallawiranna aante daggannote hedeweelcho baora albaanni maa assa hasiissannonke? Yihowa Mangistesiha dancha duduwo diinaggaambe sabbankammoranna albinni roore manna rosaano assinammora hasiꞌranno. Qoleno kaphu ammaꞌno baalantewiinni xeertiꞌra hasiissannonke. Hatto assa dandiineemmo doogga giddo mitte, kaphu ammaꞌno ledo xaadooshshe afidhino dirijjittawiinni xeertiꞌratenna Bayira Baabiloone ledo xaado afiꞌrino looso giwate.

²⁰ ‘Goofimarchu barri’ jeefora ikkannori wolurino no. Qoleno Yihowa assinammora hasiꞌrannohu wolu coyino no. Kuri coyibba maati? Muli yannara ikkanno coyi baalunkura qixxaawa dandiineemmohu hiittoonniiti? Aananno birxichira tenne daafira ronseemmo.