1. Yihowa calla magansiˈra hasiissannonkehu mayiraati?

YIHOWA Kalaqaanchonkenna heeshsho uyinonkeha ikkino daafira iso calla magansiˈra hasiissannonke. (Aju. 4:11) Kayinni hatto assa qarra ikkitankera dandiitanno. Yihowa banxeemmohanna ayirrinseemmoha ikkirono, iso calla magansiˈneemmokki gede guficho ikkannori iillankera dandaanno. Togoo coyi iillannonkehu hiittoonniitiro afa hasiissannonke. Hanni balanxe, Yihowa calla magansiˈrate yaa mayyaatero laˈno.

2. Fulo 34:14 kultanno garinni Yihowa calla magansiˈra hasiˈnummoro maa assa dihasiissannonke?

² Qullaawu Maxaafi Yihowa calla magansiˈrate yaa iso lowo geeshsha baxa ikkitinota kulanno. Ayino woy aye coyino Yihowanni roorankera diwodhineemmo.—Fulo 34:14 nabbawi.

3. Yihowa calla magansiˈneemmohu isi daafira mittoreno anfummokkinni diˈˈikkino yineemmohu mayiraati?

³ Yihowa calla magansiˈneemmohu isi daafira mittoreno anfummokkinni diˈˈikkino. Hatto yineemmohu mayiraati? Korkaatuno Yihowa banxeemmohu isi daafira halaale ikkinore ronsoommohuraati. Yihowata dancha akatta naandeemmo. Qoleno, isi baxannorenna giwannore anfoommo; hattono kuri coyibbara isite gedee lao noonke. Isi mannu oosora hedinore anfoommo; qoleno biddishshisi garinni heeˈne tenne hedosi harunsineemmo. Yihowa jaallasi ikkineemmo faro faninonke  daafira hagiidhineemmo. (Far. 25:14) Kalaqaanchinke daafira ronseemmori baalu isiwa shinqeemmo gede assannonke.—Yai. 4:8.

4. (a) Daawuloosi Yihowara noonke baxille ajishate sharramannohu hiittoonniiti? (b) Konni birxichira maa ronseemmo?

⁴ Tenne alame gashshaanchi Daawuloosiiti; isi alamete noo coyibba horoonsiˈre kalaqamu hasattonkeranna maalu yortonkera qeelammeemmo gede assate woˈnaalanno. (Efe. 2: 1-3; 1 Yoh. 5:19) Daawuloosi mixo wole coyibba quwa saˈne banxe Yihowa calla magansiˈneemmokki gede assate. Hanni Daawuloosi hatto assara dandaannota lame doogga laˈno. Umihunni isi jiro shorrineemmo gede assate woˈnaalanno; layinkihunni busha boohaarsha doodhineemmo gede assate sharramanno.

5. Woxu baxille qoropha hasiissannonkehu mayiraati?

⁵ Ninke baalunku gari sagale, dancha uddanonna danchu mini heeˈrankera hasiˈranke bunshe diafidhino. Ikkirono woxu baxille qoropha hasiissannonke. Sheexaanu alame wido ikkinohu batinyu manni ‘woxenna’ woxunni hidhinanni coye baxannoho. (2 Xim. 3:2) Yesuusi harunsaanosira woxu baxilli fonqolo ikkansara dandaannota afino. Isi togo yino: “Mittu manchi lamu Mootichira soqqama didandaanno, woy mitto giwe mitto baxanno; woy mitto ayirrise mitto mishanno. Hattonni mittu manchi Maganohonna woxeho borojjicho ikka didandaanno.” (Mat. 6:24) Mittu manchi Yihowa magansiˈranni heeˈrenni alamete jiro duuˈnate sharramanni yannasinna wolqasi gudannoha ikkiro, lamu mootichira soqqamate woˈnaalanni noohu gedeeti. Kuni manchi Yihowa calla magansiˈranni no yaa didandiinanni.

6. Yesuusi Lodooqiyu songora coyiˈrinorinni maa ronseemmo?

⁶ Umi xibbi diri jeefora Lodooqiyu katamira  noo songo miilla giddo mitu “Ani dureessaho; lowo jiro nooe; xeinoeri mitturino dino” yite naaxxitino. Kayinni insa Yihowanna Yesuusi albaanni ‘gadadaammaho, hawaaxaammaho, buxante, illiweelootahonna mullootaho.’ Yesuusi insa amaalinohu dureeyye ikkitinohura ikkikkinni, woxu baxilli Yihowa ledo noonsa jaalooma hunanni noonsa daafiraati. (Aju. 3:14-17) Woxu baxilli wodaninke giddo mura hanafinota wodanchinummoro, ranke hedonke biddi assiˈra hasiissannonke. (1 Xim. 6:7, 8) Hatto assiˈra hoongummoro, wodaninke bebbeehamanno; hatto ikkiro Yihowa magansiˈranke diadhanno. Isi ‘woˈmu wodaninni’ banxasira hasiˈranno. (Maq. 12:30) Woxu baxilli guficho ikkankera dandaannohu hiittoonniiti?

7-9. Deevidi yinanni cimeessi lawishshinni maa ronseemmo?

⁷ Hanni Deevidi yinannihu Ameerikaho heeˈrannohu mittu diinaggaawe loosanno cimeessi lawishsha laˈno. Isi alba qaxarame loosanno woyite loosisira laalaatannota coyiˈrino. Isi loosanno dirijjite giddo lowo deerra iillino, hattono hattee gobbara loosanno loosinni egennaminoha ikkino. Deevidi togo yiino: “Hatte yannara qiniinoehu Yihowa masirinoe daafiraati yee hedoommo.” Ikkina hatto yee hedasi garahoni?

⁸ Deevidi loosanno loosi Yihowa ledo noosi jaalooma hunanni noosita gale hose huwatino. Isi togo yiino: “Songote gambooshshiwanna soqqanshonniwa nafa hedeemmohu loosu basera noo qarri daafiraati. Lowo woxe afiˈranni noommoha ikkiro nafa yaadaameessa ikkoommo hattono maateˈya giddo qarru kalaqamino.”

⁹ Deevidi balaxisiisanni noo coye layiˈra hasiissinosita huwatino. Isi “heeshshoˈya gara biddi assiˈrate murciˈroommo” yee coyiˈrino.  Gedensoonni isi loosisi pirogiraame biddi assiˈre kae tenne loosiisaanchisira kulino. Hakkiinni mayi ikkiyya? Deevidi loosunni shorrinoonnisi. Isi maa assiyya? Togo yiino: “Layinki barra kaaˈlaancho suwisaancho ikke soqqamammora forme wonshoommo. Deevidinna minaamasi hasiisannonsare wonshiˈrate mitto jawa hintsa fiitanno. Hakkiinni isi woˈma yanna suwisaancho ikke soqqama hanafino; gedensoonni iseno suwisaancho ikkite soqqama hanaffino. Insa lowo manni mishanno looso loosa doodhino, ikkirono, heeshshonsa giddo lowo geeshsha hasiisanno coyi loosanno looso diˈˈikkino. Alba afiˈranno woxe hendiro xa afiˈrannohu lowo geeshsha shiima ikkirono, hasiisannonsare hidhate ikkanno woxe afiˈranno. Insa Yihowa balaxisiisino, hattono Maganu Mangistesi balaxisiissannore towaatannota uminsa heeshshonni laino.—Mat. 6:31-33.

10. Wodananke agadha dandiineemmohu hiittoonniiti?

¹⁰ Noonke jiro lowotano ikkito shiima wodananke agadha hasiissannonke. Hiittoonni? Jirote baxilli rumuxxoonkeˈne. Loossinanni loosi Yihowa soqqanshonni rooraˈnera wodhitinoonte. Loosonke balaxisiinsanni heeˈnoommota afa dandiineemmohu hiittoonniiti? Hanni ninkeneeto togo yine xaˈmino: ‘Duucha woyite gambooshshunniwanna soqqanshonniwa hedeemmohu loosu daafiraati? Woˈmanka woyite albillitte woxe afiˈrate daafira yaadeemmo? Woxunna maalaamittete jiro anenna galteˈya mereero qarra kalaqqanni no ikka? Wolootu mishshanno looso ikkirono, Yihowara soqqameemmota lowo yanna afiˈreemmo gede assannoe looso doodheemmo?’ (1 Xim. 6:9-12) Kuri xaˈmuwa hiincineemmo woyite Yihowa baxannonketanna isi baxxannosirira “horo diagureemmohe; dicallachisheemmohe” yee qaale einota qaango. Soqqamaasinchu Phaawuloosi “woxu baxille qorophe” yee borreessinohu iseraati.—Ibi. 13:5, 6.

11. Mitto mancho doodhanno boohaarshi massasira dandaanno?

¹¹ Yihowa hagiirraamma ikkinammora hasiˈranno; boohaarshu qole hagiirre afiˈneemmo gede kaaˈlankera dandaanno. Qullaawu Maxaafi togo yaanno: “Mannaho daafure loosiˈrinohunni hagiidhanni itatenna agate kaˈaanni woliri kaaˈlannosiri dino.” (Ros. 2:24) Kayinni alamete noohu roore boohaarshi gawajjankera dandaannoho. Kuni boohaarshi mannu amanyootu seera agadhannokki gedenna lashshi assanno gede jawaachishanno;  wole agurina Maganu Qaali hoolannore nafa banxanni gede assanno.

12. Umi Qorontoosi 10:21, 22 kultanno garinni boohaarsha qorophine doodha hasiissannonkehu mayiraati?

¹² Yihowa calla magansiˈra hasiˈneemmo daafira ‘Mootichu sagalenna durriisu sagale ita didandiineemmo.’ (1 Qorontoosi 10:21, 22 nabbawi.) Mittu manchi ledo sagale ita duucha woyite jaalooma leellishshanno. Finqille, agaanintete loosonna foorre woy wole maalu yortonna akatta jawaachishanno boohaarsha doodhineemmoha ikkiro, Maganu diinna shiqishshanno sagale intanni heeˈnoommohu gedeeti. Tini ninkeneeto calla ikkikkinni Yihowa ledo noonke jaaloomano gawajjitanno.

13-14. Yaiqoobi 1:14, 15 kultanno garinni boohaarsha qorophine doodha hasiissannonkehu mayiraati? Lawishsha kuli.

¹³ Hanni boohaarshu intanni sagale gedeeti yineemmohu mayiraatiro laˈno. Inteemmo sagale doodha dandiineemmo. Kayinni egemminummohu gedensaanni sagale bisinke giddo eˈe ikkitannore hoolle dianfeemmo. Dancha sagale fayyimmankera kaaˈlitannonke; busha sagale kayinni fayyimmanke gawajjitanno. Intoommo sagale assitannori bayichonko leella hoogankera dandaanno; gale hose kayinni leellasi digattanno.

¹⁴ Hatteente gede boohaarsha doodhineemmo woyite surrenke giddora eanno coye doodha dandiineemmo. Doodhinummohu gedensaanni kayinni boohaarshu, surrenkenna wodaninke giddo assannore hooˈla didandiineemmo. Danchu boohaarshi wolqanke haaronsanno; bushu boohaarshi kayinni gawajjannonke. (Yaiqoobi 1:14, 15 nabbawi.) Bushu boohaarshi abbanno qarri bayichonko leella hoogankera dandaanno; gale hose kayinni leellasi digattanno. Qullaawu Maxaafi togo yee qorowisiisannohu iseraati: “Umoˈne dogginoonte. Mannu wixiˈrinoha mixxanno daafira, Magano arrassa didandiinanni. Maalasi hagiirsiisate wixiˈrannohu, maalisinni reyo mixxanno.” (Gal. 6:7, 8) Addanko, Yihowa giwanno coye assineemmo gede jawaachishanno boohaarsha baala giwa hasiissannonke.—Far. 97:10.

15. Yihowa hiittee baxissanno elto uyinonke?

¹⁵ Batinye Yihowa Farciˈraasine interneete widoonni saˈannota televizhiinete pirogiraamera shiqqannota JW Biroodikaaste laˈˈa baxxanno. Merliyiini yinanni rodoo togo yitino: “JW Biroodikaaste dancha lao heedhannoe gede kaaˈlitinoe; qoleno shiqqanno pirogiraame baalanti dancha ikkitino daafira doodhanni diqarrameemma. Callimma amaddannoe woyitenna hexxo mudheemma woyite jawaachishanno lallawonna soodo magansiˈrara shiqqanno pirogiraame macciishsheemma. JW Biroodikaastete qixxaawo heeshshoˈya lowo geeshsha woyyeessitinoe.” Atina tenne Yihowa eltonni horo afidhanni nootto? Aganu kiiro shiqqannota haaro pirogiraameno aguranna JW Biroodikaastera qoonqotenni calla qaddaˈnoonnitinna viidiyote qixxaabbino pirogiraame hattono jawaachishshanno faarsuwa fultanno.

16-17. Mageeshshi yanna boohaarreemmoro qorophine heda hasiissannonkehu mayiraati? Hatto assa dandiineemmohu hiittoonniiti?

¹⁶ Hiittoo boohaarsha boohaarreemmoro calla ikkikkinni boohaarranni mageeshshi yanna keeshshineemmorono heda hasiissannonke. Hatto assa hoongummoro, Yihowara soqqammeemmotenni roortino yanna boohaarshaho gundammora dandiineemmo. Lowo mannira boohaartanni sayissanno yanna ajisha qarra ikkitinonsa. Abigayeeli yinanniti 18 diri rodoo togo yitino: “Daafure hosoommati daye Televizhiine laeemma woyite  hisateemma. Kayinni laˈˈanni lowo yanna gudeemma.” Saamueeli yinannihu wedellichu rodii togo yiino: “Interneetete batinye shiimmaadda viidiyubba laeemmo. Mitte viidiyo calla laeemmo yee hanafe, afummokkinni sase woy shoole saate keeshsheemmo.”

¹⁷ Boohaartanni sayisatto yanna ajisha dandaattohu hiittoonniiti? Balaxxe boohaartanni mageeshshi yanna sayisattoro afa hasiissannohe. Mitte lamala giddo boohaarshaho mageeshshi yanna sayisoottoro mayira borreessite diamaxxatto? Televizhiine laˈanni, Interneetete mitore laˈanni, woy mobayilekkinni geeme godoˈlitanni keeshshatto yanna borreessite amaxxi. Boohaarshaho lowo yanna guddanni noottoti leeltuhero, pirogiraamekki biddi assiˈrate woˈnaali. Balaxxe lowo geeshsha hasiisanno looso loosate pirogiraame fushshiˈri, gattino yanna boohaarshaho horoonsiˈra dandaatto. Hakkiinni fushshiˈrootto pirogiraame harunsa dandaatto gede kaaˈlahera Yihowa huucciˈri. Hatto assittoro, Qullaawa Maxaafa xiinxallate, maatete magansiˈrara, songote gambooshshira, hattono sabbakatenna rosiisate loosinni Yihowara soqqamatto yanna afiˈratto. Qoleno boohaarshaho lowo yanna gudanni noommo yite digaabbatto.

18-19. Yihowa calla magansiˈneemmota leellisha dandiineemmohu hiittoonniiti?

¹⁸ Soqqamaasinchu Pheexiroosi Sheexaanu alame jeefo daafiranna haaro alame daggannota borreessihu gedensaanni togo yiino: “Jaallaˈya! Kuni baalu ikkanno barra galaalchitinanni heedhiniro, Mootichu saalunna minshanniri nookkire ikkitine keere heedhineenna afiˈrannoˈne gede feeffattine heedhe.” (2 Phe. 3:14) Tenne amaale macciishshine woˈmanka woyite amanyootunninna ayyaanaamittete xuro nookkire ikkine heeˈnummoro, Yihowa calla magansiˈneemmota leellinsheemmo.

¹⁹ Sheexaanunna alamesi Yihowa agurre wole coye balaxisiinseemmo gede assate sharrama diagurtanno. (Luq. 4:13) Aye qarri iillinkerono, ayino woy aye coyino Yihowawiinni roorankera diwodhineemmo. Yihowara hasiisannore isira calla aate yaano iso calla magansiˈrate murciˈnoommo!