1. Yihowa hedinore wonshate maa assa dandaanno?

 YIHOWA hedinore wonshate ikka hasiꞌrannore baala ikka dandaanno. Lawishshaho, isi Rosiisaancho, sheshifachishannohanna Wongeelaawicha ikkino; kuri isi ikka dandaannori giddo gamareetilla. (Isa. 48:17; 2 Qor. 7:6; Gal. 3:8) Ikkirono, isi hedinore wonshate duucha woyite manna horoonsiꞌranno. (Mat. 24:14; 28:19, 20; 2 Qor. 1:3,  4) Qoleno ninke baalunku Yihowa hedinore wonsha dandiineemmo gede isi hayyonna jawaante aannonke. Mitu egennaammi yitanno garinni Yihowa suꞌmi afiꞌrino tiro giddo gama kuriiti.

2. (a) Yihowa horoonsiꞌranni noonketa huluullammeemmohu mayira ikkara dandaanno? (b) Konni birxichira maa ronseemmo?

² Ninke baalunku Yihowa horoonsiꞌrankera hasiꞌneemmo; kayinni mitu isi horoonsiꞌrannonsata huluullantara dandiitanno. Mayira? Insa huluullantannohu dirinsanni, heeshshonsa garinni woy dandoonsanni ikkara dandaanno. Wolootu kayinni soqqammanni heeꞌnoommo geeshshi ikkino yitanno daafira albinni roore soqqamate disharrantanno. Konni birxichira Yihowa ninke baalunku isi hedinore wonshineemmo gede ikkadda assannonkehu hiittoonniitiro ronseemmo. Hakkiinni Yihowa labballunna meya soqqamaasinesira isi hedinore wonsha dandiitanno gede hasattonna wolqa uyinonsa gara kultannota Qullaawu Maxaafi xagge ronseemmo. Jeefote Yihowa horoonsiꞌrannonke gede ninkeneeto shiqisha dandiineemmo gara laꞌneemmo.

3. Filiphisiyusi Sokka 2:13 kultanno garinni Yihowa hedinore wonsha dandiineemmo gede hasatto aannonkehu hiittoonniiti?

³ Filiphisiyusi Sokka 2:13 nabbawi. b Yihowa hedinore wonsha dandiineemmo gede hasatto aannonke. Isi hatto assannohu hiittoonniiti? Songote giddo kaaꞌlineemmori noota anfammora dandiineemmo. Woy songote cimeeyye songonke qoqqowi gobbaanni loosa hasiissanno loosi noota kultannota sinu biiro sokkino sokka nabbabbanna macciishshinammora dandiineemmo. Hatto ikkiro, ‘Tennera kaaꞌlate maa assa dandeemmo?’ yine ninkeneeto xaꞌmino. Woy uyinoonninkeha shota ikkinokki looso danchu garinni loosa dandiineemmoronna teꞌee huluullammeemmoha ikkara dandaanno. Woy mite Qullaawu Maxaafi qummeeshshuwa nabbambummo gedensaanni, tenne hedo woloota kaaꞌlate horoonsiꞌra dandeemmohu hiittoonniiti? yine hendeemmoha ikkara dandaanno. Yihowa mitto coyeno asse yee digiddeessannonke. Kayinni Yihowa mitto coye loosate hendoommota afiro hakko coye loonseemmo gede hasatto aannonke.

4. Yihowa hedinore wonshineemmo gede wolqa aannonkehu hiittoonniiti?

⁴ Qoleno Yihowa hedinore wonsha dandiineemmo gede wolqa aannonke. (Isa. 40:29) Isi dandoonke woyyeessiꞌneemmo gede qullaawa ayyaanasi aannonke. (Fulo 35:30-35) Yihowa dirijjitesi widoonni qole uyinoonninke looso loosa dandiineemmo gara rosiissannonke. Uyinoonniꞌne looso loossinanni gara huluullantiniro kaaꞌlo xaꞌmidhe. Qoleno shaqqadu iimi Anninke “mannu wolqara aleenni ikkitino wolqa” aannoꞌne gede huuccidhe. (Luq. 11:13; 2 Qor. 4:7) Qullaawu Maxaafi giddo Yihowa labballunna meentu isi hedinore wonsha dandiitanno gede ikkadda assinonsa gara kultannoti batinye lawishshuwa no. Kuri giddo gama lawishshuwa laꞌneemmo woyite Yihowa ninkeno hakko garinni horoonsiꞌrannonke doogga hedate woꞌnaallo.

5. Yihowa mannasi gatisate Muse horoonsiꞌrino garinninna yannanni maa ronseemmo?

⁵ Yihowa Muse Israeelete dagara gatisaancho asse horoonsiꞌrinosi. Ikkina Yihowa Muse horoonsiꞌrinohu mamooteeti? Muse “Gibitsete gobba egenno baala” rose ikkado ikkoommo yee hedi yannaraatini? (Soq. 7:22-25) Deeꞌni; Yihowa Muse horoonsiꞌrinohu isi umo heeshshi assannohanna jooga mancho ikkanno gede rosiisisihu gedensaanniiti. (Soq. 7:30, 34-36) Yihowa Muse wolqaataamu Gibitsete gobba gashshaanchi albaanni uurra dandaanno gede worba mancho assinosi. (Ful. 9:13-19) Yihowa Muse horoonsiꞌrino garinninna yannanni maa ronseemmo? Yihowa horoonsiꞌrannohu isi baxanno akati noonsareetinna jawaante afiꞌrate iso addaxxitannoreeti.—Fil. 4:13.

6. Yihowa Barzilayi Moote Daawiti kaaꞌlara horoonsiꞌrino doogonni maa ronseemmo?

⁶ Lowo diri gedensaanni Yihowa Barzilayi yinanni manchi Moote Daawiti kaaꞌlanno gede horoonsiꞌrinosi. Daawitinna mannisi beettisi Abeseloomi shorranna xooqqanni heedhe ‘hudidhino, daafurtino’ hattono ‘goodhino.’ Barzilayi hattee yannara geerchoho; ikkirono isi wolootu ledo kaaꞌlame Daawitinna ledosi noo manna kaaꞌlate heeshshosi nafa qarru giddo tugino. Barzilayi geedhino daafira xaate Yihowa dihoroonsiꞌrannoe yee dihedino. Hatteentenni isi shaqqillunni noosire oye Maganu soqqamaasine  kaaꞌlino. (2 Sam. 17:27-29) Konni lawishshinni maa ronseemmo? Dirinke ikkihano ikkiro, Yihowa gobbankerano ikko wole gobbara heedhannore hasiisannonsare hooggino roduuwanke kaaꞌlate horoonsiꞌrankera dandaanno. (Law. 3:27, 28; 19:17) Roduuwanke heedhannowa marre kaaꞌla hoongummorono alamete doyicho loosira woxe fushshine kaaꞌlo hasiissannonsa roduuwa kaaꞌla dandiineemmo.—2 Qor. 8:14, 15; 9:11.

7. Yihowa Simiooni horoonsiꞌrinosihu hiittoonniiti? Tenne afanke jawaachishshannonkehu ma garinniiti?

⁷ Yihowa Yerusaalamete heeꞌrannohu Simiooni yinannihu ammanamino manchira Mesihicha laikkinni reyannokkita kule qaale einosi. Isi Mesihichu daannota agadhe lowo diro keeshshino daafira kuni qaali lowo geeshsha jawaachishinositi dihuluullissannote. Ammanasinna cincasi kiissinosi. Mitto barra iso “Qullaawu Ayyaani” massageennasi qullaawu minira haꞌrino. Hakkiicho isi qaaqqo Yesuusa afino; Yihowa Simiooni Mesihicha ikkannohu konni qaaqqi daafira masaalo coyiꞌranno gede assino. (Luq. 2:25-35) Simiooni Yesuusi uullate aani soqqanshosi hanafara albaanni reyinoha ikkirono, isi afiꞌrino qoosso lowo geeshsha naadino; albillitte roore atoote afiꞌranno. Kuni ammanamino manchi haaro alame giddo Yesuusi gashshooti uullate aana heedhannote mannu oosora abbanno atoote laꞌꞌanno. (Kal. 22:18) Ninkeno Yihowa isi soqqanshora aannonke qoosso baalanta naandeemmo.

8. Yihowa Barnabaasi horoonsiꞌri gede ateno horoonsiꞌrara dandaannohu hiittoonniiti?

⁸ Umi xibbi diro Yooseefi yinannihu shaqqadu manchi Yihowa horoonsiꞌrasira isonooto shiqishino. (Soq. 4:36, 37) Soqqamaasine isira suꞌma Barnabaasi yite fushshitino; Barnabaasi yaa “Jawaantete Beetto” yaate; insa isira hatto yite suꞌma fushshitinohu woloota sheshifachishate dandoo noosihura ikkara dandaanno. Lawishshaho, Saawuli ammanaancho ikkihu gedensaanni, isi alba Yesuusi harunsaanora darte iillishannoha ikkino daafira batinyu roduuwi isiwa shiqa waajjitino. Baxillaancho ikkinohu Barnabaasi kayinni Saawuli kaaꞌlinosi; Saawuli Barnabaasi kaaꞌlinosi daafira lowo geeshsha hagiidhinoti dihuluullissannote. (Soq. 9:21, 26-28) Gedensoonni Yerusaalamete heedhanno cimeeyye Sooriyu Antsookira noo roduuwa jawaachisha hasidhino. Insa hakkira aye sokkuyya? Barnabaasi sokkino. Iso soyansa garaho! Barnabaasi “baalunku woꞌmu wodaninni kaajjite Mootichaho ammanante heedhanno gede” jawaachishinonsa. (Soq. 11:22-24) Hatteente gede xaa yannarano Yihowa ammanate roduuwinkera “jawaantete” buicho ikkineemmo gede kaaꞌlannonke. Lawishshaho, shiidhinore jawaachinsheemmo gede horoonsiꞌrankera dandaanno. Qoleno dhiwantinore woy yaaddo amaddinonsare marre woy silke bilbille jawaachinsheemmo gede assankera dandaanno. Yihowa Barnabaasi horoonsiꞌri gede horoonsiꞌrahera ateneeto shiqishatto?—1 Tes. 5:14.

9. Yihowa Vaasili yinanni rodii worba cimeessa ikkanno gede kaaꞌlinosi doogonni maa ronseemmo?

⁹ Yihowa Vaasili yinanni rodii worba cimeessa ikkanno gede kaaꞌlinosi. Iso 26 dirisinni songote cimeessa assinisita songo ayyaanaamittetenni hakko iso qarru iillinonsa roduuwa kaaꞌlate ikkado diꞌꞌikkoommo yee waajjino. Ikkirono isi woꞌnaalshu noonsa roduuwiwiinna Mangistete Soqqansho Rosi Mine dancha qajeelsha afiꞌrino. Isi dandoosi woyyeessiꞌrate sharramino. Lawishshaho, loosannohu mitu loosira mixo fushshiranno. Vaasili mitte mittenta mixosi wonshiꞌriti gale hosanni waajja qeeꞌlino. Isi xa togo yiino: “Hakkawaro waajjoommo coyi xa lowo hagiirre afiꞌreemmo gede assinoe. Yihowa songote giddo mitto rodoo  sheshifachisheemmoha dancha qummeeshsha afiꞌreemmo gede kaaꞌlannoe; tini lowo hagiirre afiꞌreemmo gede assitannoe.” Roduuwa, kiꞌneno Vaasili gede Yihowa horoonsiꞌraꞌnera kiꞌneneeto shiqqishshiniro isi songote giddo lowo looso loosa dandiitinanni gede kaaꞌlannoꞌne.

10. Abigiya maa assitino? Ninke ise lawishshinni maa ronseemmo?

¹⁰ Daawitinna ammanamino mannisi Moote Saaooli shorranni noonsa yannara kaaꞌlo hasiissinonsa. Daawiti manni Naabaali yinanniha dureessa Israeelaawicha shiima sagale aannonsa gede xaꞌmidhino. Insa halalla saadasi agartanno daafira aannonke yite heddino. Ikkollana honqooqichu manchi Naabaali hilire nafa hoꞌlinonsa. Daawiti hanqe Naabaalinna minesi noo labballo baala gudara kaino. (1 Sam. 25:3-13, 22) Abigiya yinanniti xuma Naabaali minaama kayinni xiinxallate. Ise Daawiti lekkara ubbe rabbisiꞌre mundeete shedinni amadamannokki gede amaaltinosi; tini worbimmase leellishshanno. Ise Daawiti coye Yihowara kule aguranno gede hayyotenni amaaltino. Abigiya shaqqillunni coyidhinorinna wodanchatenni assitinori Daawiti hedinore aguranno gede assinosi. Daawiti Abigiya isiwa soyinohu Yihowa ikkinota huwatino. (1 Sam. 25:23-28, 32-34) Yihowa Abigiya horoonsiꞌrinosehu danchu akati nooseta ikkitino daafiraati. Hatteente gede Yihowa xaa yannarano hayyootanna xiinxalla meya roduuwa maatensanna wole songote roduuwa jawaachishanno gede horoonsiꞌrannonsa.—Law. 24:3; Tit. 2:3-5.

11. Shaluumi seenni maa assino? Xaa yannara insa lawishsha harunsitanni noori ayeooti?

¹¹ Lowo diri gedensaanni Yihowa Yerusaalamete huxxa wirro huxxate horoonsiꞌrinori giddo Shaluumi seenni no. (Neh. 2:20; 3:12) Anninsa gashshaancho ikkirono, insa konne shota ikkinokkihanna qarrisanno looso loosate maahoyye yiino. (Neh. 4:15-18) Insa umonsa heeshshi asse huxxa huxxa giwinohu ayirradu Teqoa manni gedeere diꞌꞌikkino. (Neh. 3:5) Shaluumi seenni huxxu 52 barri giddo huxxame goofinohura mageeshshi geeshsha hagiidhinoro hanni hedde! (Neh. 6:15) Xaa yannarano uminsa fajjonni baxxitinota qullaawa soqqansho soqqamannori meya roduuwi lawishshaho, Yihowa soqqanshora horoonsiꞌnanni mine minanna gatamara kaaꞌlansanni hagiidhanno. Insa dandoo, diinaaggenna ammanamansa kuni loosi seyanno gede assitanno.

12. Yihowa Xabita horoonsiꞌri gede ninkeno horoonsiꞌrankera dandaannohu hiittoonniiti?

¹² Yihowa Xabita “dancha looso loossanni” roorenkanni gunnoota kaaꞌlitanno gede horoonsiꞌrinose. (Soq. 9:36) Ise shaqqado ikkitino daafira reyituta lowo manni xissiisiꞌrino. Soqqamaasinchu Pheexiroosi ise reyotenni kayisita kayinni hakko manni lowo geeshsha hagiidhino. (Soq. 9:39-41) Xabita lawishshinni maa ronseemmo? Baalunku yaano ajuno akkaluno, meyahuno labbaahuno roduuwanke kaaꞌlannore assa dandiineemmo.—Ibi. 13:16.

13. Yihowa manna ille qasse laꞌꞌa waajjitannota Ruuti yinanni rodoo horoonsiꞌrinohu hiittoonniiti? Ise mayite coyidhino?

¹³ Manna ille qase laꞌꞌa waajjitannoti Ruuti yinanni rodoo misiyoone ikka hasidhino. Ise shiima heedhe tiraakte tuqissanno woyite minunni mine rakke rakke hadhanno. Ise “Konne looso lowo geeshsha baxeemma” yitino. Ikkirono ise xullichoho uurrite mannaho Maganu Mangiste daafira sabbaka waajjitanno. Ruuti manna ille qasse laꞌꞌa waajjitannoha  ikkirono, 18 dirisenni woꞌma yanna suwisaancho ikkitino. Ise 1946 Giiliyaadi Qullaawu Maxaafi Rosi Mine eꞌe rossino; hakkunni gedensaanni Jaappaanetenna Hawayi yinanni gobbara soqqantino. Yihowa ise horoonsiꞌre hatte gobbuwara danchu duduwi halaꞌlanno gede assino. Ise 80 meddi yaanno diro soqqantuhu gedensaanni togo yitino: “Yihowa woꞌmanka woyite jawaachishinoe. Isi waajja qeeꞌla dandeemma gede kaaꞌlinoe. Yihowa iso addaxxitannore horoonsiꞌrannota horo dihuluullameemma.”

14. Qolasiyaasi Sokka 1:29 kultanno garinni Yihowa horoonsiꞌrannonke gede maa assa hasiissannonke?

¹⁴ Yihowa hundinni kayise soqqamaanosi fajjosi wonsha dandiitanno gede addi addi doogganni horoonsiꞌrino. Yihowa ate maa assattora kaaꞌlannohe? Yihowa horoonsiꞌrannohehu ateneeto shiqishitto deerrinniiti. (Qolasiyaasi Sokka 1:29 nabbawi.) Ateneeto shiqishittoro, Yihowa diinaggaabbe soqqamatto sawaakicha, dancha rosiisaancho, woloota sheshifachishate dandoo nooheha, qajeela loosaasincho, dancha jaala ikka dandaatto gede, woy wole wonshattora hasiꞌranno fajjosi baala wonsha dandaatto gede horoonsiꞌrannohe.

15. Umi Ximootewoosi 4:12, 15 kultanno garinni xaa yannara wedellu Yihowa maa ikkitanno gede kaaꞌlansara huucciꞌra hasiissannonsa?

¹⁵ Jajjabba ikkitinanni heedhinoonniri kiꞌne wedellu roduuwina? Songote soqqamaano ikkite songo kaaꞌlate wolqa noonsari lowohu labballu roduuwi hasiissanno. Batinye songuwara soqqamaanote kiironni cimeeyyete kiiro roortanno. Wedella, songote giddo albinni roore soqqamate hasatto heedhannoꞌne gede assiꞌra dandiitinanni? Mito woyite mitu roduuwi “halashshaancho ikke soqqamummoro ikkannoe” yitanno. Atino hatto yite hedattoha ikkiro Yihowa songote soqqamaancho ikkate hasatto heedhannohe gedenna isira woꞌmu wodaninni soqqamate wolqa aannohe gede huucciꞌri. (Ros. 12:1) Ate kaaꞌlo lowo geeshsha hasiissannonke!—1 Ximootewoosi 4:12, 15 nabbawi.

16. Yihowa maa huucciꞌra hasiissannonke? Mayira?

¹⁶ Yihowa fajjosi wonsha dandaatto gede horoonsiꞌrannohe. Hakko daafira isi loososi loosate hasattonna hasiissannohe wolqa aannohe gede huucciꞌri. Wedelluno jajjabbuno xaa yannara yannaꞌne, wolqaꞌnenna woxeꞌne Yihowara ayirrinye abbate horoonsidhe. (Ros. 9:10) Waajjitine woy dandoo dinoe yitine heddineenna Yihowara woꞌma giddoꞌnenni soqqantinanniti kaajja faro saꞌe baꞌoonkeꞌne. Baxillaanchu iimi Anninke ayirranno gede shiimare nafa assa dandaanke lowo qoossooti!