HUNDINNI kayise Maganu manni isira kakkalo shiqishiꞌranni keeshshino. Hunda Isiraeele saadate kakkalo shiqishidhanno; Kiristaanu qole “galatu kakkalo” shiqishiꞌratenni egannamino. Magano lowo geeshsha hagirsiissannoti wole kakkalono no. (Ibi. 13:15, 16) Konni woroonni noo lawishshi leellishanno garinni, togoo kakkalo shiqishiꞌra hagiirrenna atoote afiꞌnanni gede assitanno.

Haanna yinanniti ammanantinoti Maganu soqqamaancho, labbaa qaaqqo ilate laalaattinnoha ikkirono, ise ooso ila didandiitino. Haanna labbaa qaaqqo ilturo “heeꞌranno diro baala iso qole atera eemma” yite huuccattotenni Yihowara xano xaꞌnitino. (1 Sam. 1:10, 11 ) Yannate gedensaanni Haanna labbaa qaaqqo iltino; ise qaaqqoho suꞌma Saamueeli yite fushshitino. Saamueeli unuuna aguranni heeꞌreenna Haanna xaꞌnitino xano garinni qaaqqose xaadu dunkaana hadhe massitino. Haanna umise horo agurtinohura Yihowa maassiꞌrinose. Ise wole onte ooso iltino; Saamueelino masaalaanchonna Qullaawu Maxaafi borreessaancho ikkino.—1 Sam. 2:21.

Yannankera noo Kiristaanino Haannanna Saamueeli gede heeshshonsa Kalaqaanchinsara sayise aa dandaanno. Yesuusi Yihowara soqqamate yine aguroommorinni roorino atoote afiꞌneemmota coyiꞌrino.—Maq. 10:28-30.

Dorqa yinanniti umi xibbi diro heedhino Kiristaancho “dancha looso loossanni buxane kaaꞌlitanno;” ise umise horo agurte wole manna kaaꞌlitannote. Yannate gedensaanni kayinni ise dhiwante reyitino; tennera songo lowo geeshsha dadillitino. Yesuusi rosaano, Pheexiroosi hakko qooxeessira noota affuti isi rahe insawa daanno gede xaꞌmidhino. Hakkiinni Pheexiroosi daye Dorqa reyotenni kayisita Yesuusi rosaano lowo geeshsha hagiidhitinoti egennantinote; hakkuyira albaanni wolu soqqamaasinchi manna reyotenni kayise diegennino! (Soq. 9:36-41) Maganu Dorqa assitinore dihawino. (Ibi. 6:10) Isi ise assitinori ninkera dancha lawishsha ikkankera Qaalisi giddo borreessinanni gede assino.

Soqqamaasinchu Phaawuloosino yannasinna wolqasi mararikkinni woloota kaaꞌle dancha lawishsha ikkinonke. Isi Qorontoosi heeꞌranno Kiristaanira togo yee borreessino: “Kiꞌne daafira . . . anenee sayise uummoro nafa tashshi yaannoe.” (2 Qor. 12:15) Phaawuloosi wole manna kaaꞌlate yine meessi horo agurriro, harshammo afiꞌnannitanna baalunkunni roore Yihowa hagiirsiisanna isi atoote afiꞌra dandiinannita umisi heeshshonni buuxino.—Soq. 20:24, 35.

Xaano, Yihowa yannankenna wolqanke Maganu Mangiste looso halashshatenna wole manna kaaꞌlate horoonsiꞌnanna lairo lowo geeshsha hagiidhannoti dihuluullissannote. Ikkina, Maganu Mangisteha sabbakate looso kaaꞌla dandiineemmoti wole doogga no? Ee no! Baxillunni kaꞌne loonseemmo loosono aguranna meessi fajjonni woxe fushshine Magano ayirrisa dandiineemmo. Meessi fajjonni fushshinanni woxe alame woꞌmate loonsanniha wongeelu looso kaaꞌlate, yaano misiyoonenna wole baxxitinota woꞌma yanna soqqamaanora hasiisannonsare wonshate horoonsiꞌnanni. Hattono borronna viidiyo qixxeessinannihunna tirrannihu, dano illitinonsare kaaꞌlinannihunna haaro Gambooshshu Addaraashe minnannihu meessi fajjonni fushshinanni woxinniiti. Ee, ‘elanno manchi durooꞌmanno!’ Baalunkunni roore, muxxe ikkinore Yihowara uyineemmoha ikkiro Isi hagiidhanno.—Law. 3:9; 11:25.